Musanze: Abarangije Kaminuza biyemeje guhanga umurimo no gutanga akazi

  • Imvaho Nshya
  • Ugushyingo 18, 2023
  • Hashize amezi 6
Image

Abarangije muri Kaminuza y’u Rwanda basaga 8000 bahawe impamyabumenyi, bavuze ko bagiye kwihangira umurimo biteza imbere ndetse bagatanga n’akazi kuri bagenzi babo.

Hari abarangije kaminuza bavuga ko guhanga umurimo ari kimwe mu bisubizo byo kunganira Leta mu gufasha umuturage kubaho neza ndetse no guteza imbere igihugu nk’uko Muragijimana Damascene, urangije mu ishami ry’ubutabire n’ibinyabuzima mu Ishuri Rikuru ry’Uburezi rya Rukara yabitangarije Imvaho Nshya.

Yagize ati: “Ndangije mu Ishuri Rikuru ry’Uburezi  kwigisha amasiyanse, ubu rero igikurikiyeho ni uko tugiye kuba umusemburo w’iterambere mu gihugu, ibi tuzabigeraho twihangira imirimo kuko twahawe ubushozi, twashinga ibigo by’amashuri, twakora ibindi bikorwa by’iterambere kuko buriya iyo umuntu yize kaminuza aba ari injijuke kandi agendeye ku bumenyi yahawe yabigeraho, akihangira umurimo akawuha n’abandi”.

Muragijimana akomeza avuga ko bitakiri ngombwa ngo umuntu yige ategereje ko Leta izamuha akazi.

Ati: “Hari bamwe barangiza kaminuza  bagatangira kubungana amabaruwa asaba akazi ngo Leta izakamuha, oya ntibikiri ngombwa dufite igihugu cyiza cyatweretse ko byose bishoboka kandi umusingi urahari dufite amahoro, ubumenyi  burahari, ikindi ni uko kugeza ubu gushora imari wisunze ibigo by’imari byarorohejwe cyane, dushobora guhera ku mahirwe ari hano hafi tukiyubaka”.

Kuba guhanga umurimo hari ubushobozi urangije kaminuza cyangwa se igishoro yaheraho bishimangirwa na Dr Celine Byukusenge na we urangije mu masiyanse aho yize kwigisha, akaba ari n’umushakashatsi mu bijyanye n’ibinyabuzima.

Dr Celine Byukusenge urangije Kaminuza uvuga ko bagiye kwihangira umurimo

Yagize ati: “Ubu ni bwo dutangiye urugamba rw’ubuzima cyane ko tugiye guhindura imibereho, twihangira umurimo kandi igishoro kirahari; kuko ubuyobozi bwarabyaroheje, aho dufite ikigega cy’ingwate nka BDF, ndizera ko mu minsi mike koko urangije kaminuza azakomeza kwitwa intiti n’umuhanga bishingiye ku buryo na we ubwe azaba yitwaye n’ibyo ageza ku bo asanze, abafasha guhindura imibereho”.

Ubwo Minisitiri w’Uburezi, Gaspard Twagirayezu, yashyikirizaga impamyabumenyi abanyeshuri barangije byiciro bitandukanye, kuva ku cya mbere cya kaminuza kugeza ku y’Ikirenga, PhD ku wa 17 Ugushyingo 2023, yabasabye gukomeza guhangana n’ibibazo Isi ifite harimo ubukungu ndetse no guhagurukira gukoresha ikoranabuhanga kimwe no guhanga imirimo kandi abizeza ko Leta ihari ku bwabo izakomeza kubashyigikira.

Yagize ati:  “Nubwo Isi ikomeje guhinduka mu buryo butandukanye bigizwemo uruhare n’ibirimo ikoranabuhanga, Kaminuza y’u Rwanda na yo ntiyicaye gutyo gusa, ahubwo yakomeje kujyana n’impinduka kugira ngo ikomeze gutanga ubumenyi bufite ireme, nkaba mboneyeho gusaba aba bose barangije kwiga ko badakwiye kumva ko basoje amasomo ahubwo bakwiye gukomeza kwiteza imbere bongera ubumenyi, kandi bakoresha uburyo bwose bushoboka kugira ngo babe umusemburo w’iterambere bahanga umurimo kandi batanga akazi, Leta nayo izakomeza kubigiramo uruhare”.

Abahawe impamyabumenyi bagera ku   8321 ni abarangije amasomo muri Kaminuza y’u Rwanda.

NGABOYABAHIZI PROTAIS

  • Imvaho Nshya
  • Ugushyingo 18, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE