Kigali: Abanyeshuri biyemeje guhanga ibishya mu guhangana n’imihindagurikire y’ibihe

  • KAMALIZA AGNES
  • Ugushyingo 17, 2023
  • Hashize amezi 4
Image

Bamwe mu banyeshuri basoje amahugurwa y’amezi icyenda ajyanye no gutanga amakuru mu guhangana  n’imihindagurikire y’ibihe, baravuga ko baje gutanga umusanzu wabo  bafata ingamba, banakangurira bagenzi babo kwirinda kohereza ibyuka bihumanya ikirere dore ko ahanini kuba abantu badafite amakuru biri mu bituma bangiza ikirere.

Ni amahugurwa yateguwe n’Ikigo cy’Igihugu cyo kubungabunga ibidukikije(REMA) ku bufatanye na Kaminuza ya AIMS, ari na yo basorejemo amasomo yabo.

Bamwe muri aba banyeshuri bavuga ko guhabwa aya masomo byabongereye ubumenyi bwisumbuye ku bwo bari bafite  bujyanye  n’imihindagurikire y’ibihe kandi bafite inshingano zo kwirinda no kubikangurira abandi.

Ndayisaba Cyprien avuga ko nubwo hari ibikorwa bya muntu bitahagarara ariko nibura abantu bakwiye kumenya amakuru yuko bakwirinda.

Ati: “Isi yose dufite ikibazo cy’imihindagurikire y’ibihe uretse kuba iterwa n’ibikorwa bya muntu igira ingaruka ku muntu no kubikorwa bye, rero hakenewe ingamba kandi bisaba ko abantu baba bafite amakuru ahagije tukamenya ingaruka z’ibyuka twohereza mu kirere nubwo hari ibyo tutahagarika ariko tukamenya uko twabyirinda cyangwa tukabana na byo.”

Yongeyeho ko mu buryo bw’imihindagurikire y’ibihe bakwiye kureba uko hagabanywa ibyuka bihumanya ikirere, no kumenya uburyo bwo guhangana n’ingaruka z’igihe kirekire.

Dukuze Marie Dalie ni umukozi wa REMA nawe usoje aya mahugurwa, avuga ko ibikorwa bya muntu bidakwiye kubangamira ibidukikije kandi ko bikwiye ko Abanyarwanda birinda icyatera imyuka ihumanya.

Ati: “Dukwiye gufata ingamba tukamenya ngo icyo dukoze uyu munsi kizagira izihe ngaruka mu myaka  mirongo itanu iri imbere? Nubwo dutera imbere mu bintu byinshi bitandukanye n’ibyo ko tugabanya ikigero cy’imyuka twohereza mu kirere ku buryo bitazagira ingaruka ku hazaza h’igihugu.”

Munyazikwiye Faustin, Umuyobozi wungirije mu Kigo cy’Igihugu cyo kubungabunga Ibidukikije (REMA), avuga ko aya mahugurwa agamije kubaka ubushobozi bw’abakozi mu kubara no kubarura imyuka yoherezwa mu kirere kandi biri no muri gahunda y’igihugu yo guhangana n’ingaruka z’imihindagurikire y’ibihe.

Ati: “Bahuguwe ku bijyanye no gukoresha porogaramu za mudasobwa ku buryo bwimbitse bibafasha gukora akazi kabo ka buri munsi, birimo kubara no kubarura imyuka ihumanya twohereza, kandi tuzi ko igihugu cyiyemeje kubaka ubudahangarwa mu guhangana n’imyuka ihumanya ikirere bitarenze mu mwaka 2050.”

Abanyeshuri bose hamwe basoje amasomo yabo ni 50, bakaba biyemeje gukoresha ubumenyi bahawe mu guhugura bagenzi babo.

U Rwanda ni kimwe mu bihugu byasinye amasezerano y’i Paris mu Bufaransa yo kugabanya imyuka yoherezwa mu kirere, rwiyemeza kugabanya ku kigereranyo cya 38 %. Ni mu gihe ikigereranyo cy’ubushyuhe mu Rwanda mu myaka 30 ishize  cyiyongereyo dogere selisiyusi 1.7.

KAMALIZA AGNES

  • KAMALIZA AGNES
  • Ugushyingo 17, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE