Inzozi za Ihirwe Ange wiga ubudozi muri Nyamata TSS

  • KAYITARE JEAN PAUL
  • Ukuboza 4, 2023
  • Hashize amezi 3
Image

Ihirwe Ange Eloiyse ni umukobwa w’imyaka 18, yiga mu ishuri ry’imyuga rya Nyamata TSS riherereye mu Karere ka Bugesera mu Ntara y’Iburasirazuba.

Ageze muri L5 mu Ishami ry’ubudozi. Yatangarije Imvaho Nshya ko yakuze akunda kudoda, akongeraho ko igitangaje ni uko mu muryango we nta muntu udoda cyangwa ngo abe yarabigerageje.

Ihirwe avuka mu Karere ka Muhanga mu Ntara y’Amajyepfo, amashuri abanza yayize muri G.S Gitarama, icyiciro rusange cy’amashuri yisumbuye acyiga kuri ES Mukingi, nyuma akomereza muri Nyamata TSS.

Yakomeje agaragaza ko ari amahirwe kwiga amasomo y’imyuga n’ubumenyingiro kuko ngo nubwo akiri umunyeshuri, mu gihe cy’ibiruhuko akorera amafaranga.

Avuga ko mu buto bwe ntawigeze amwigisha uko bafata urushinge n’urudodo ahubwo yisangaga yabifashe kandi yanabikoze.

Ati “Nashoboraga gufata umwenda ushaje nkawukuramo akantu, nta muntu wambwiye ngo ndabigenza gutya ahubwo nisangaga nabikoze”.

Yajyaga afata impapuro akazifunika agakuramo ajenda(agenda) nziza.

Mu buhamya bwe avuga ko yakoraga udukapu kandi akabona tubaye tuzima ku buryo yatujyana ku isoko bakatugura.

Ibyo ngo yabikoraga yiga mu mashuri abanza.

Ati “Nagize amahirwe yo kugira ababyeyi banshyigikira muri byose”.

Intego ye ni ukwikorera nyuma yo kurangiza kwiga. Ati: “Imana imfashije nkabona ubushobozi natangiza Atelier ikomeye cyangwa byanashoboka nkatangiza uruganda aho naha abandi akazi kandi byose birashoboka”.

Indi ntego afite ni ugukomeza akiga amashuri makuru kandi akiga ubudozi nk’umwuga yakuze akunda.

Agira ati “Mfite intego yo kuzakomeza kwiga Kaminuza nubwo twebwe ishami turimo rigoye, dukomereza muri IPRC Kicukiro mu ishami ry’ubuhanzi n’imideli (Fashion designer), kugira ngo ubone kaminuza ntabwo ari ibintu byoroshye.

Bitinde bitebuke nziga kaminuza kuko ntayikomeje ni nkaho naba narataye umwanya w’ubusa.

Ngeze hanze ku isoko ry’umurimo ntaho naba ntandukaniye na wawundi wize bisanzwe ariko nibura iyo kaminuza naba mfite, nagenda nkahangana n’abandi”.

Asobanura ko yahisemo kwiga ubudozi kubera ko yakuze abikunda kandi yumva ko ari byo bintu bimurimo agomba kuzakora mu buzima bwe.

Ajya guhitamo kwiga umwuga w’ubudozi, ababyeyi be baramushyigikiye ntibamuca intege.

Ihirwe Ange avuga ko kwiga ubudozi ari ibintu ashyigikiwemo n’ababyeyi be

Andi mahirwe yagize ngo ni uko Leta yashyizeho amashuri y’imyuga n’ubumenyi ngiro, ibyo bikaba byaramufashije agashobora kuyiga.

Ati: “Nagize amahirwe yo kubyiga mu mashuri yisumbuye nkaba nizera ko nzabyiga muri Kaminuza”. Mu gihe cyo guhitamo icyo baziga, abenshi bahisemo kujya muri Siyansi, ibintu avuga ko nabyo yari kubyiga ariko akumva kwiga imyuga ari byo bimurimo.

Yarebaga ahazaza akabona aho iterambere ririmo kugana, ari ukwikorera.

Ati: “Nabonaga kwikorera ari ibyo birimo kuza imbere kuruta uko najya kwiga andi masomo. Kubera ko nakundaga ubudozi ni byo nahisemo.

Ku bw’amahirwe ibyo nasabye n’ikigo nasabye barabimpa.

Ikigo nakigezemo nsanga bafite ibikoresho no kuba nzagira amahirwe yo kwiga Kaminuza nabyo ndabibona ko bishobora kuzakunda”.

Asaba ababyeyi guha amahirwe abana bakabareka bakiga ibyo bakunze kuko ngo ari byo bibafasha.

Ku rundi ruhande, ababyeyi bamuguriye imashini akoresha mu rugo, aho ayifashisha mu kwiyibutsa ibyo yiga ariko ngo ikanamwinjiriza amafaranga.

Avuga ko nibura mu biruhuko binini ashobora kwinjiza ibihumbi 30 bivuye mu byo akorera ku mashini akoresha mu rugo.

Ati: “Mu rugo mfite imashini idoda, nibura mu biruhuko binini iyo nagize amahirwe nkorera amafaranga y’u Rwanda 30,000”.

Ahamya ko abo biganye iyo bamubonye adoda bamuseka, bakumva ko yakabaye yiga siyansi cyangwa n’andi masomo y’ubumenyi rusange.

Yongeraho ko iyo akorera amafaranga mu biruhuko, mu bamuseka hari ababa bibereye iwabo ntacyo bakora.

Akomeza agira ati “Iyo abantu babona ndoda birabatangaza cyane cyane nk’abo twiganye kuko baba bumva ari ibintu bidashoboka.

Ihirwe yiga muri Nyamata TSS ishuri ry’imyuga n’ubumenyi ngiro
  • KAYITARE JEAN PAUL
  • Ukuboza 4, 2023
  • Hashize amezi 3
TANGA IGITEKEREZO
lg says:
Ukuboza 6, 2023 at 2:11 pm

Amahirwe azaguhire mukobwa mwiza iyo umuntu afite intego akiyemeza ayigeraho byanze bikunze imana yagure ibitekerezo byawe kandi ikurinde byose wifuza uzabigeraho komeza uyizere

Andika igitekerezo

AMATEGEKO AGENGA IYANDIKA RY'IGITEKEREZO CYAWE