Uko Uturere twahize utundi mu gutsindisha neza ibizamini bya Leta 2025/26

Minisiteri y’Uburezi yatangaje amanota y’ibizamini bya Leta bisoza amashuri abanza n’icyiciro rusange cy’amashuri yisumbuye igaragaza ko uturere turimo amashuri yatsindishije neza tuyobowe na Kayonza na Kirehe.

Abanyeshuri bakosowe mu bizamini by’amashuri abanza ni 277 593 aho batsinze ku kigero 88,21% bavuye kuri 75,6% mu 2024/2025. Abakobwa batsinze ni 87,1% na ho abahungu ni 89,59%.

Uturere tuza imbere y’utundi mu gutsindisha ku kigero cyo hejuru cya ni Kayonza na Kirehe twatsinze kuri 99,88%, Ngoma iri ku kigero cya 95,27% na Musanze batsinda ku kigero cya 93,90%.

Uturere tuza inyuma ni Gasabo, aho batsinze ku kigero cya 82,23%, Gisagara ku kigero cya 81,78% na Nyamagabe ku kigero cya 81,45%.

Rwego Mutijima Bruno Licky wiga mu ishuri rya Ecole Internationale La Racine riherereye mu Karere ka Bugesera ni we wahize abandi bana bose mu cyiciro cy’amashuri abanza n’amanota 99,6%, aho yakurikiwe n’abanyeshuri barindwi bose banganya amanota 99,4%.

Abo ni Ntwali Ngabo Pacifique wigaga kuri Wisdom Centre; Ineza Singizwa Musengimana Annie wa Ecole Internationale La Racine; Byoseniyo Aimee Albine wa Kigali Harvest School; Irumva Bigwi Hugo wa APACOPE; Ingabire Ella Jesca na Shingiro Ivan Muhimba bo muri Saint Andre; ndetse na Cyusa Mugisha Ivan wa Ecole Les Rossignols.

Mu Cyiciro cya mbere cy’amashuri yisumbuye abanyeshuri 149 533 ni bo bakoze ibizamini, batsinda ku kigero cya 85,70% bavuye kuri 64% mu mwaka ushize, barimo abakobwa batsinze ku kigero cya 82,63% n’abahungu bangana na 89,8% by’abakoze bose.

Uturere tuza imbere y’utundi ni Kayonza yatsindishije ku kigero cya 88% Kirehe iri kuri 86%, Rusizi na Rutsiro banganya ku kigero cya 85%.

Uturere dutanu tuza inyuma ni Nyabihu batsinze ku kigero cya 78%, Nyamagabe na Burera banganya ku kigero cya 77% naho Gakenke na Nyarugenge biri ku kigero cya 75%.

Mu banyeshuri batandatu ba mbere bahembwe babiri banganyije amanota ya mbere. Abo ni Uwamariya Leontine wigaga ku ishuri rya ISF Nyamasheke na Musonga Isimbi Orah wigaga kuri Fawe Girls School banganyije amanota 98,7%.

Bakurikiwe na Ganza Joël wigaga muri Saint Ignatius High School mu Karere ka Gasabo, wagize amanota 98,06%, Uwitonze Milton College Saint Andre mu Karere ka Nyarugenge wagize amanota 98,4% na Uwase Divine wiga Ecole de Science Byimana mu Karere ka Ruhago yagize amanota 98,3%.

Umuyobozi Mukuru w’Ikigo cy’Igihugu Gishinzwe Ibizamini n’Ubugenzuzi bw’Amashuri (NESA), Dr. Bahati Bernard, yagaragaje ko muri uyu mwaka w’amashuri abanyeshuri bagaragaje gutsinda ku rwego rwo hejuru ugereranyije n’umwaka ushize.

Nko mu bizamini bisoza amashuri abanza, yagaragaje ko mu 2025 abana bari bafite hagati y’amanota 30% na 40% bari ibihumbi 10 birenga, ariko muri uyu mwaka baragabanyutse baba ibihumbi bine.