Uburezi bubera mu ishuri, bugakomereza mu rugo-MINEDUC

  • NTAWITONDA JEAN CLAUDE
  • Werurwe 16, 2022
  • Hashize imyaka 2
Image

Minisiteri y’Uburezi (MINEDUC) irasaba ababyeyi gukomeza gushyira imbaraga mu kwigisha ikinyarwanda abana b’u Rwanda kuko ngo uburezi bukwiye gukomereza mu rugo.

Yabigarutseho ubwo hatangizwaha imishinga ibiri ifite agaciro ka miliyari 48.9 z’amafaranga y’u Rwanda igamije kuzamura ubumenyi bw’abanyeshuri bo mu mashuri y’inshuke no mu mashuri abanza.

Twagirayezu Gaspard, Umunyamabanga wa Leta ushinzwe amashuri abanza n’ayisumbuye muri MINEDUC, asaba buri wese kugira uruhare mu burezi bw’umwana by’umwihariko bahereye mu muryango kuko ngo ari wo gicumbi cy’uburezi.

Ati: “Ni byiza ko ababyeyi bafasha abana babo gukora zimwe mu mfashanyigisho kuko bibongerera ubumenyi ndetse n’ubusabane hagati y’abagize umuryango”.

Akomeza asaba ababyeyi ndetse n’abarezi uko babishoboye gukomeza gufasha aba bana kwiga kandi bakiga neza.

N’iyo ubushobozi bwaba budahagije ariko ngo ntibashobora kubura ubwo kwibuka ko umwana akwiye gukomeza amasomo mu gihe ageze mu rugo.

Yagize ati: “Ibyo ni ibintu tuzakomeza kwibutsa ababyeyi nkuko nabivuze, uburezi bubera mu ishuri ariko bugakomereza mu rugo”.

Yibutsa ko ibikorwa byose by’uburezi bagomba kuzirikana ko biba bishingiye ku munyeshuri kuko ngo umunyeshuri ni we shingiro rya byose, bakaba bagira ngo ibyo bakora byose bimufashe kwiga no gutsinda amasomo.

Pauline Okumu uhagarariye World Vision mu Rwanda, avuga ko ibikorwa byose bakora bigamije kugira ngo “Uburezi iwacu mu ngo bwunganire uburezi bubera ku ishuri binyuze mu mushinga tuzashyira mu bikorwa wa ‘Tunoze Gusoma’”.

Jonathan Kamin, Umuyobozi w’Ikigo cya Leta zunze ubumwe z’Amerika gishinzwe iterambere mpuzamahanga mu Rwanda no mu Burundi (USAID), avuga ko bazakomeza kugira uruhare mu burezi bw’umwana.

Yongeraho kandi ko abana bo mu cyiciro cya mbere cy’amashuri abanza bazakomeza kwitabwaho hagamijwe kubaka uburezi bufite ireme.

MINEDUC yagaragaje ko abana biba byiza iyo bakomereje amasomo mu rugo
  • NTAWITONDA JEAN CLAUDE
  • Werurwe 16, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE