U Rwanda rwiteze byinshi ku barimu 45 baje kubyutsa Igifaransa mu mashuri

  • NTAWITONDA JEAN CLAUDE
  • Mata 21, 2022
  • Hashize imyaka 2
Image

Kuri uyu wa Kane, Leta y’u Rwanda yakiriye abarimu 45 b’intyoza mu rurimi rw’Igifaransa bagiye kugira uruhare mu kurushaho gutoza abanyeshuri n’abarimu bigisha urwo rurimi hagamijwe kurushaho kurwimakaza mu myigire n’imyigishirize y’Igifaransa mu gihugu.

Igifaransa ni rumwe mu ndimi mpuzamahanga rukoreshwa mu bihugu bitandukanye ku Isi, ku buryo rubonwamo nk’amahirwe akomeye ku barwiga bakarumenya, kuko baba babonye amahirwe y’inyongera yo kuba bashobora guhatana ku isoko ry’umurimo atari mu Rwanda gusa ahubwo no mu ruhando mpuzamahanga.

Igifaransa gifite amateka maremare mu Rwanda nk’igihugu cyakolonijwe n’Ababiligi, ariko guhera mu mwaka wa 2009 cyatangiye kugabanya imbaraga n’umuvuduko cyari gifite mu mashuri ya Leta ubwo cyasimburwaga n’Icyongereza nk’ururimi rwo kwigishamo.

Icyemezo cyo gukoresha Icyongereza nk’ururimi rwigishwamo mu Rwanda cyafashwe n’Inama y’Abaminisitiri yo ku wa 8 Ukwakira 2008. Urwo  rurimi rwakomeje kuba mu ndimi enye zemewe n’Itegeko Nshinga rya Repubulika y’u Rwanda  kugeza n’ubu, hamwe n’Icyongereza, Ikinyarwanda n’Igiswahili.

Mugenzi Ntawukuriryayo Léon,Umuyobozi w’Ishami rishinzwe iterambere n’Imicungire y’Abarimu mu Rwego rw’igihugu rushinzwe uburezi bw’Ibanze (REB), yavuze ko aba barimu uko ari 45 baturuka mu bihugu bivuga ururimi rw’Igifaransa, bakaba baje gufasha kongera ubumenyi bw’abarimu bigisha Igifaransa mu Rwanda ndetse no gufasha abanyeshuri bacu mu kwiga neza.

Aba barimu ni icyiciro cya kabiri nyuma y’abandi 25 bagiye kumara imyaka ibiri mu Rwanda bahugura abarimu bigisha uru rurimi binyuze mu mushinga ‘Mobilité des Enseignants’ watangijwe n’Umuryango w’Ibihugu bikoresha Igifaransa (OIF).

Mugenzi yagize ati: “Aba barimu iyo bari mu Rwanda bashyirwa mu mashuri nderabarezi, kugira ngo abo banyeshuri bitegura kuzaba abarezi bamenye urwo rurimi hakiri kare kugira ngo bazabashe kujya kwigisha na bo bazi urwo rurimi. Twishimiye kwakira aba barimu mu Rwanda kandi tubitezeho byinshi.”

Yakomeje avuga ko kuba aba barimu bari mu Rwanda bitavuze ko ururimi rwo kwigishamo rugiye guhinduka Igifaransa mu mashuri, ahubwo ni ururimi rugiye kwigishwa nk’ururimi rw’amahanga kugira ngo rumenyekane.

Biteganywa ko mu gihe kiri imbere ururimi rw’igifaransa rushobora kuzagaruka ku rutonde rw’amasomo abazwa mu kizamini cya Leta mu rwego rwo gukomeza gushishikariza kurwiga.  

Umuyobozi Ushinzwe guteza imbere ururimi rw’Igifaransa n’uruhererekane rw’imico y’Ibihugu bikoresha urwo rurimi Madamu Nivine Khaled, yavuze ko iyi gahunda yatangijwe ku mugaragaro n’Umunyamabanga mukuru wa OIF Louise Mushikiwabo mu rwego rwo kwimakaza ururimi rw’Igifaransa mu bihugu bikoresha Igifaransa byasabye ubufasha ko byifuza kuruteza imbere.

Avuga ko ifite intego zo guharanira ko abarimu babishoboye baza kugira uruhare mu kunoza imyigire n’imyigishirize y’Igifaransa mu mashuri abanza, n’ayisumbuye by’umwihariko mu bigo bitoza abarimu b’ahazaza (TTCs).

U Rwanda na Ghana ni byo bihugu biza imbere byasabye ubu bufasha, ndetse u Rwanda rwatangiye kubona umusaruro wabo mu Gihugu hose bitewe n’abarimu ba mbere baje mu myaka ibiri ishize bakaba barasoje amasezerano yabo bahita bajya gutoza mu bindi bihugu bibakeneye.  

Madamu Khaled yashimangiye ko habayeho kwitondera igikorwa cyo gutoranya aba barimu kugira ngo harebwe abashoboye kandi bashobora kubahiriza itandukaniro ry’imico yo mu bihugu bikoresha Igifaransa byibumbiye muri uyu muryango uko ari 11.

Gaspard Twagirayezu, Umunyamabanga wa Leta muri Minisiteri y’Uburezi Ushinzwe Amashuri Abanza n’Ayisumbuye muri Minisiteri y’Uburezi, yavuze ko icyo u Rwanda rwifuza muri iyi gahunda ari uko abana b’u Rwanda bamenya indimi  nyinshi kugira ngo bazabashe guhangana n’abandi ku isoko ry’umurimo mu Gihugu no hanze yacyo.

  • NTAWITONDA JEAN CLAUDE
  • Mata 21, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE