U Rwanda rwatangiye gutegurira abato kuzahangana na robo

  • NTAWITONDA JEAN CLAUDE
  • Nzeri 16, 2022
  • Hashize imyaka 2
Image

Isi irimo kwiruka amasigamana mu bijyanye n’ikoranabuhanga na tekinoloji, ku buryo mu myaka irenga 50 iri imbere, abantu bazaba bakigendera ku myumvire iriho ubu bazaba barasimbuwe na robo n’izindi mashini zikoresha ubwenge muntu butari karemano (Artificial intelligence/AI).

Impuguke zigaragaza ko urubyiruko ruriho ubu ruzaba rugeze mu zabukuru, ruhanganye n’impinduka zidasanzwe, zisaba kuba umuntu afite ubumenyi n’ubuhanga buruta ubw’izo mashini kugira ngo abashe gukorana na zo no kuzikoresha, mu nzego zitandukanye zirimo ubuhinzi n’ubworozi, ubwubatsi, gutunganya ingufu, kwiga no kwigisha, inganda, gutanga serivisi n’ibindi.

Umuyobozi w’Ikigo cy’Igihugu Gishinzwe Guteza Imbere Amashuri y’Imyuga n’Ubumenyingiro (RTB) Ing. Paul Umukunzi, yavuze ko Leta y’u Rwanda yatangiye gutegura uko abakiri bato babaho neza bageze mu zabukuru mu Isi izaba itandukanye n’iyo babayemo uyu munsi.

Yabigarutseho mu butumwa yagejeje ku rubyiruko rwitabiriye ibitaramo n’ibiganiro bigamije gusobanurira urubyiruko inyungu iri mu kugana amashuri yisumbuye ya Tekiniki mu Karere ka Musanze, ku wa Kane taliki ya 15 Nzeri 2022.

Yagize ati: “Muzaba muhanganye n’ibintu bikomeye cyane; muzaba murwana na tekinoloji, muzaba murwana n’amarobo ayoboye Isi, imashini zitandukanye ziyoboye Isi, ubuzima bwarahindutse butameze nk’uko turimo umunsi wa none. U Rwanda, nk’Igihugu gikunda Abanyarwanda, ruri gutekereza uburyo mwazabaho mu buryo butandukanye n’ubwo turiho uyu munsi. Hari ubuzima turimo ndetse twanabayemo mwebwe urubyiruko rw’uyu munsi mukwiye kwanga mukabuhindura kandi ni mwe muzabigiramo uruhare.”

Ing. Umukunzi yavuze ko kimwe mu bibazo byugarije Afurika ari ukuba yarahindutse abaryi (consummers) gusa ariko nta kintu na kimwe iratangira gukora Isi yose yakenera mu muvuduko w’iterambere rihari.

Yagaragaje ingero zitandukanye z’uburyo uhereye ku byo twambara, ibyo turya, serivisi n’ibikoresho bizitanga dukenera, usanga byose byaraturutse mu mahanga, Abanyafurika bakaba babereyeho kubikoresha kandi banabiguze ku giciro gihanitse.

Yagaragarije urubyiko ko ibihugu by’Afurika na byo bigomba guhatanira kugera ku muvuduko w’iterambere ririho kugira ngo abana babyo bazabashe kubaho mu Isi ihindagurika uko bukeye n’uko bwije.

Yakomeje agira ati: “Kugira ngo Igihugu gitere imbere rero, hakenewe mwebwe urubyiruko. Ariko kugira ngo muzabashe kubaho neza mudategeye amaboko abanyamahanga, hari ibintu nibura tugomba guhindura byanze bikunze. Tugomba kugira ibikorwa remezo bigezweho by’ikoranabuhanga (software development), tugomba guteza imbere ibijyanye n’ikoranabuhanga byose, tugomba guteza imbere ubwiyongere bw’ingufu z’amashanyarazi, tugomba guteza imbere inganda zitunganya umusaruro dufite waba ukomoka ku buhinzi, waba amabuye y’agaciro n’ibindi byose.”

Ikindi yashimangiye ni uko u Rwanda rukeneye kugira abahanga mu bijyanye n’itumanaho, bikazajyana no kubaka ubushobozi mu bijyanye n’ubumenyi mu nzego zinyuranye. Yavuze ko ugendeye no ku biriho ubu, ibihugu bitezwa imbere n’udushya bigenda bihanga tugakundwa n’amahanga.

Ati: “Ibitekerezo byanyu ntibigarukire ngo ndakura he aho ngura inkweto, aho ngura isaha, aho ngura telefoni igezweho, ahubwo vuga ngo mu biriho ku Isi ni iki njye nakongeraho kugira ngo kibashe kugira icyo kimarira, kigirire akamaro Igihugu cyanjye n’Isi yose.”

Yakomeje agira ati: “Ikindi mukwiye kumva, iyi Si turimo iri ku muvuduko uri hejuru cyane, uyu munsi uko utakaje umunsi urasigara. Ubu tugeze aho abandi barimo gukora ibijyanye n’ikoranabuhanga rifite ubwenge muntu butari karemano (AI), hari gusohorwa amarobo ameze nk’abantu azi ubwenge no kuturusha, imodoka udashobora kugongesha ngo ibyemere, hari gusohoka uburyo umuntu azabaho nta kindi kintu arimo gukora byose biri gukorwa n’imashini.”

Bivuze ko iyo Si izaba isaba ko umuntu areka gutekereza gukora ibyo imashini ishoboye gukora nko gucunga umutekano, gukora imirimo y’ingufu, ahubwo akiga ubuhanga buzatuma arushaho guhangira imirimo izo mashini na we akabasha kwitunga agatunga n’abandi.

Yavuze ko ari muri urwo rwego Leta y’u Rwanda yatangije gahunda z’amasomo zivuguruye zitangirwa mu mashuri yisumbuye ya Tekiniki (Technical Secondary Schools) kugira ngo urubyiruko rubone amahirwe yo kugera ku bumenyi nk’isoko rukumbi izatuma rubasha guhangana ku isoko.

Muri Porogaramu nshya zivuguruye zitangirwa mu mashuri yisumbuye ya tekiniki, harimo amasomo ajyanye n’ubwubatsi bw’ibikorwa remezo bigezweho, arebana n’ingufu z’amashanyarazi, arebana n’ikoranabuhanga rya mudasobwa, tekiniki y’isakazamakuru n’itumanaho, ubuhinzi bugezweho, gutunganya umusaruro ukomoka ku buhinzi, amahoteli n’ubukerarugendo, tekiniki ikoreshwa mu binyabiziga no muri gahunda yo gutwara abantu n’ibintu, ndetse n’amasomo ubuhanzi n’ubugeni.

Umuyobozi ya RTB ivuga ko ayo masomo yahujwe n’ibikenewe ku isoko ry’umurimo, ku ruhando mpuzamahanga. Umuntu wese urangije ayo masomo ku rwego rwa 5 aba afite ubushobozi bwo gukomeza amasomo y’ubwenjenyeri mu mashuri makuru na Kaminuza.

Ubukangurambaga kuri ayo masomo bukomeje mu Ntara zose z’Igihugu, urubyiruko rukaba rukomeje kugaragaza ko rwishimiye kumenya ayo mahirwe mashya yo kubona ubumenyi buzarufasha kugendana n’impinduka zikenewe ku Isi.

Bushali yataramiye urubyiruko rwahawe impanurozo kwiga amasomo ya tekiniki
Hatoranyijwe abana bafite impano baziga mu ishuri rya Muzika
  • NTAWITONDA JEAN CLAUDE
  • Nzeri 16, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE