Nziza Training Academy yatanze impamyabushobozi ku nshuro ya 3

  • NTAWITONDA JEAN CLAUDE
  • Mata 5, 2022
  • Hashize imyaka 2
Image

Ikigo Nyarwanda gitanga amahugurwa ahanitse ku barangije za Kaminuza mu masomo y’imyuga “Nziza Training Academy”  cyatanze impamyabushobozi ku banyamwuga 117 bahuguwe mu masomo ajyanye no gukora inyigo z’imishinga y’ubwubatsi bw’amazu, ibiraro, kubarura imari mu mishinga y’ubwubatsi, gusesengura ubukomere bw’inyubako ndende n’imitingito, kuyobora imishinga minini y’ubwubatsi byose bikorwa ifashishijwe ikonarabuhanga.

Ibirori byo gutanga impamyabushobozi  byabaye ku mugoroba wo ku wa Mbere taliki ya 4 Mata 2022. Nzirorera Alexandre uyobora “Nziza Training Academy”   yavuze ko ubumenyi batanga buza bwunganira ubwo bakuye muri za Kaminuza, ariko bukaba bwisumbuyeho kuko bakoresha ikoranabuhanga rigezweho dore ko ari byo bikenewe ku isoko ry’umurimo.

Yagize ati : “Ubumenyi dutanga hano ni ubumenyi bw’ikirenga cyane ko tunashaka abarimu bafite ubuhanga buhanitse (Experts) bavuye mu bihugu bitandukanye byadutanze iterambere, aho twe amasomo yacu aza kuziba icyuho kiri  mu masomo atangwa naza Kaminuza mu Rwanda.”

Nzirorera Alexandre, Umuyobozi wa Nziza Training Academy

Yakomeje agira ati : “Twifashisha ikoranabuhanga (Technology) rigezweho , uko twe hasohotse ikoranabuhanga rishya ni ryo tujyana naryo kuko ni byo bikenewe ku isoko ry’umurimo, mu bihe byashize wasangaga nta munyarwanda wajya gupiganwa ugasanga akazi kikubirwa n’abanyamahanga gusa.”

Nzirorera Alexandre avuga ko bitanga umusaruro, kuko usanga amazina y’Abanyarwanda bahuguriwe mu kigo mu binyamakuru muri Turikiya, dore ko hari n’inzobere ziva muri icyo gihugu zije guha amuguhugurwa abanyarwanda baminuje hifashishijwe ikoranabuhanga rihanitse.  Ashimangira ko u Rwanda rutazatera imbere muri nzego zo kwakira neza gusa cyangwa imiyoborere myiza honyine ko ahubwo rugomba no gutera imbere mu bwubatsi bwifashisha ikoranabuhanga ry’ikirenga.

Eng.Kazawadi Papias ukuriye ihuriro ry’ingaga zaba Enjiniyeri  muri Afurika yasabye abasoje amasomo kutazapfusha ubusa ubumenyi bahawe bw’ikirenga ko bagomba kubufashisha u Rwanda n’amahanga.

Ati: “Impamyabushobozi mwahawe zigaragaza ubumenyi bw’ikirenga, ndabasaba kuzabukoresha neza haba mu Rwanda muri aka Karere  no muri Afurika yose muri rusange, muzakomeze kunga ubumwe mwirinde gupfusha ubusa ubumenyi n’ubushobozi mwahawe muhesha ishema u Rwanda n’iki kigo cyabahuguye.”

Umuyobozi ushinzwe ubujyanama mu bya Tekiniki muri Minisiteri y’Uburezi “MINEDUC”, Gatabazi Pascal yavuze ko umuntu ubumenyi akura muri Kaminuza buba budahagije, aba akeneye amahugurwa nk’aya yisumbuye anunganira ibyo yize.

Gasana Pascal, Umuyobozi ushinzwe ubujyanama mu bya Tekiniki muri MINEDUC

Ati : “Ubumenyi nk’ubu bukenewe ku isoko ry’umurimo buba bukenewe, kuko ubwo ukura muri Kaminuza ntibuba buhagije, turashima cyane Nziza Training Academy ku bw’aya mahugurwa, kuko u Rwanda rukeneye aba Enjeniyeri  b’inzobere bafite ubumenyi bw’ikirenga, ari nayo mpamvu usanga bahugurwa n’ababizobereyemo babimazemo igihe mu bihugu byabo, aya mahugurwa ni ingenzi rero kuko aziba icyuho cy’amasomo batakuye mu mashuri yacu.”

Umwe mu basoje  amasomo, Irakoze Gilbert wize muri KIST yavuze ko ubumenyi n’ubushobozi yakuye muri Nziza agiye kubukoresha neza dore ko asanzwe anafite akazi, hari byinshi agiye guhindura mu mikorere ye.

Iki kigo cyafunguye imiryango mu mwaka wa 2018 ariko gikomwa mu nkokora n’icyorezo cya COVID-19, ubu kimaze gutanga ubushobozi n’ubumenyi ku bagera kuri 200 kuva cyatangira, ubu bikaba byari ku nshuro ya gatatu.

Abarangije bahize kuzana impinduka mu mwuga w’ubwubatsi
Abahize abandi basabwe gushyira ingufu no kubyaza umusaruro ubushobozi bahawe

Amafoto

  • NTAWITONDA JEAN CLAUDE
  • Mata 5, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE