Miliyari 48.9 Frw zashowe mu kwigisha gusoma no kwandika neza Ikinyarwanda

  • Imvaho Nshya
  • Werurwe 15, 2022
  • Hashize imyaka 2
Image

Minisiteri y’Uburezi (MINEDUC) ku bufatanye n’abandi bafatanyabikorwa mu iterambere, yatangije imishinga ibiri ifite agaciro ka miliyari 48.9 z’amafaranga y’u Rwanda igamije kuzamura ubumenyi bw’abanyeshuri bo mu mashuri y’inshuke no mu mashuri abanza ya Leta n’afashwa na Leta.

Imishinga y’imyaka itanu yiswe “Tunoze Gusoma” na “Uburezi Iwacu” igamije guhugura abanyeshuri bagera kuri miliyoni 2 mu gusoma no kwandika neza, bahereye ku Kinyarwanda nk’ururimi rwabo kavukire.

Ibi byagarutsweho ubwo Ikigo cy’Igihugu gishinzwe Uburezi bw’Ibanze (REB) cyasinyanaga amasezerano y’ubufatanye n’ikigo Mpuzamahanga cy’Abanyamerika cyita ku Iterambere (USAID), agamije guteza imbere umuco wo gusoma no kwandika neza Ikinyarwanda mu banyeshuri biga mu mashuri y’inshuke n’abanza.

Ayo masezerano azamara imyaka itanu yashyizweho umukono akubiyemo imishinga ibiri itandukanye harimo ‘Tunoze Gusoma’ ugamije guteza imbere umuco wo gusoma ndetse na ‘Uburezi Iwacu’ ugamije gutegura uburyo bwiza abana bafashwamo kwiga aho bari mu ngo zabo ndetse no kubaha umwanya wo kwisanzura mu masomo.

Umunyamabanga wa Leta muri Minisiteri y’Uburezi ushinzwe amashuri abanza Twagirayezu Gaspard, yavuze ko Leta y’u Rwanda yihaye gahunda yo guteza imbere uburezi hibanzwe cyane ku burezi bw’ibanze binyuze muri Minisiteri y’Uburezi.

Yagaragaje ko abanyeshuri bakwiye kurushaho gufashwa kugira ngo aho bari hose bakomeze kugira amahirwe yo gukomeza gufashwa kwiga bitabagoye.

Ati: “Umwana yigira ku Ishuri, mu rugo ndetse n’aho ari hose. Tugomba gushyiramo imbaraga kugira ngo umwana aho ari hose agire imbaraga zo gukomeza kwiyungura ubumenyi. Abagize umuryango bakwiye gufatanya kuzamura ubumenyi bw’abana.”

Yakomeje agira ati: “Dukomeze dushyire imbaraga mu kwigisha abana bacu ururimi rwacu kubera ko iyo barumenye ni na ho bahera biga n’indimi z’amahanga tunifuza ko na zo bazimenya.”

Twagirayezu yagaragaje ibiteganywa gukorwa avuga ko byose bizakorwa bizaba bishingiye ku banyeshuri ndetse asaba ababyeyi kubigiramo uruhare kuko bishimangira uburezi n’uburere buboneye.

Umuyobozi wa REB Dr Nelson Mbarushimana, yagaragaje ko USAID ikomeje kuba umufatanyabikorwa mwiza mu burezi bw’u Rwanda binyuze mu mishinga itandukanye igenda itera inkunga.

Yavuze ko ibikorwa imishinga yombi izibandaho bihuye n’intego z’uburezi za Guverinoma y’u Rwanda kandi ko ubufatanye hagati y’iyo mishinga ari bwo buzatanga umusaruro.

Yakomeje agira ati: “Twijeje ubufatanye hagati y’iyo mishinga yombi, kandi tuzayifasha kugera ku ntego zayo. Tuzafasha abana b’Abanyarwanda kongera ubumenyi bwabo mu gusoma no kwandika ndetse n’ibindi bikorwa byateganyijwe muri iyi mishinga.”

Umuyobozi Mukuru wa USAID mu Rwanda Jonathan Kamin yavuze ko biteguye gukomeza gutanga umusanzu mu guteza imbere uburezi bw’u Rwanda.

Yagaragaje ko iyi mishinga izatanga umusaruro ufatika mu burezi bw’u Rwanda na cyane ko abishyize hamwe ntakibananira bityo ko bazakomeza ubufatanye na Leta y’u Rwanda mu ishyirwa mu bikorwa ry’iyo mishinga.





  • Imvaho Nshya
  • Werurwe 15, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE