Leta y’u Rwanda irashimirwa guteza imbere imyuga n’ubumenyi ngiro

  • NTAWITONDA JEAN CLAUDE
  • Kamena 27, 2022
  • Hashize imyaka 2
Image

Uko umwaka ushira undi ugataha ni ko mu Rwanda haboneka abasore n’inkumi batanga icyizere cyo kurandura ubushomeri mu gihugu binyuze mu guhanga imirimo ishingiye ku masomo y’imyuga n’ubumenyi ngiro bakurikiye mu mashuri yisumbuye no muri Kaminuza.

Ishuri ry’Imyuga n’Ubumenyi Ngiro ryitiriwe Mutagatifu Laburenti rya Gaseke (Saint Laurent Gaseke TVET School) ni rimwe mu mashuri yishimira ko akomeje gutsindisha abanyeshuri bajya ku isoko ry’umurimo abandi bagakomeza muri Kaminuza bifitiye icyizere ko batazahura n’ubushomeri.

Imibare itangazwa n’Urwego rw’Igihugu rushinzwe guteza Imbere Imyuga n’Ubumenyingiro (RTB), igaragaza ko nibura 60% by’abanyeshuri barangiza kaminuza mu myuga n’ubumenyi ngiro badashobora kurenza amezi atandatu batarabona imirimo, hakaba harimo n’abayihangira bagakoresha bagenzi babo.

Ubuyobozi bwa Saint Laurent Gaseke TVET School burashimira Leta y’u Rwanda yashyize imbere gahunda y’uburezi kuri bose, by’umwihariko imyuga n’ubumenyi ngiro bigashyirwa hejuru mu guharanira kubaka ubukungu bushingiye ku bumenyi.

Nshimiyimana Alexis, Umuyobozi wa Saint Laurent Gaseke TVET School,  yabigarutseho ku Cyumweru taliki ya 26 Kamena 2022 mu birori (Graduation) byo kwishimana n’abanyeshuri 100 barangije amasomo mu ishami ry’amashanyarazi mu mwaka wa 2019/2020 n’uwa 2020/2021.

Yavuze ko ibyo birori bikozwe ku nshuro ya kabiri nyuma y’ibyabanje byabaye mu mwaka wa 2019 hishimirwa intsinzi y’abanyeshuri 42 bari batsindiye ku manota meza mu kizamini cya Leta gisoza amashuri yisumbuye.

Mu birori by’uyu mwaka hakiriwe abanyeshuri bo mu myaka ibiri kubera ko ibihe by’icyorezo cya COVID-19 byatumye badakorerwa ibirori buri mwaka no mu bihe bikwiye nk’uko ubuyobozi bw’icyo kigo bwabyiyemeje.

Nshimiyimana yavuze ko bashimishijwe n’uburyo abanyeshuri basoje amasomo mu bihe bigoye by’icyorezo ari bo batsinze kurusha n’aba mbere, kuko nko mu 2020/2021 abagera kuri 28 muri 58 bakoze ikizamini cya Leta bagize amanota ari hejuru ya 50 kuri 60.

Nshimiyimana Alexis, Umuyobozi wa Saint Laurent Gaseke TVET School aganiriza abanyamakuru

Yagize ati: “Abanyeshuri bose twishimira kuri uyu munsi ni 100, aho 42 muri bo barangije umwaka wa 2019/2020 ndetse na 58 barangije mu mwaka wa 2020/2021 bose biga mu ishami ry’amashanyarazi… Ibi byose kugira ngo bigerweho ni ubufatanye bw’inzego zose zabigizemo uruhare by’umwihariko aho dushimira Leta y’u Rwanda yashyize imbere uburezi kuri bose kandi bufite ireme. Abandi dushimira ni Diyosezi Gatolika ya Byumba yabyukije iri shuri aho ryari rimaze imyaka myinshi ryarahagaze, bakaribyutsa bigisha ubumenyi ngiro.”

Yakomeje avuga ko Ishuri rya St. Laurent Gaseke TVET School rishyigikiye kuba Leta ishyize imbaraga mu kubaka ubukungu bushingiye ku bumenyi, yibutsa abanyeshuri ko Igihugu n’imiryango yabo babatezeho byinshi.

Abanyeshuri barangije muri icyo kigo na bo bashimiye ubushishozi bw’Igihugu cyarebye kure kuko ubu bamaze kubona amahirwe y’ubuzima abatandukanya n’ubushomeri yagura inzozi zabo.

Irakoze Belise, wagize amanota 56 kuri 60 mu kizamini cya Leta, yagize ati: “Ubu nakomeje amasomo, ndiga muri IPRC Kicukiro mu ishami rya Electric Technology Engineering. Ikintu cyabingejejeho ni ugukorera ku ntego, icyo nabwira abakobwa babyifuza ndetse n’abakirimo kubyiga mu yisumbuye, ni ugutinyuka kandi bakumva bakomeye, bagakunda icyo biga mbere y’uko abandi bakibakundisha.”

Irabizi David wiganye na Irakoze bakaba barananganyije amanota mu kizamini cya Leta, yongeyeho ati: “Kumva intsinzi nagize nabyakiriye neza cyane byaranshimishije, kandi tubikesha uburezi n’uburere butangirwa kuri iri shuri. Ubu niga muri IPRC Kicukiro nakomeje amashanyarazi mu ishami rya Mecatronic kandi nizera ko nzasohoka ndi umuhanga ngatanga umusanzu wanjye mu kubaka Igihugu.”

Misigaro Vincent, umurezi kuri St Laurent TVET School, na we yashimangiye ko abanyeshuri biga muri iki kigo bahakura umwihariko kuko uretse ubumenyi bongererwaho n’ikinyabupfura byose bikabafasha mu kubaka ahazaza habo.

Ati: “Duha abanyeshuri impamba ihagije izabafasha mu rugendo bazaba bafitemo mu buzima. Iri shuri ritanga uburezi bufite ireme bwongeraho n’ikinyabupfura, kwiyoroshya, kwitwararika no kuzuza indangagaciro zikwiriye Umunyarwanda.”

Ubuyobozi bw’Akarere ka Gicumbi ndetse n’ubwa Diyosezi Gatolika ya Byumba, bwashimiye abanyeshuri basoje amasomo yabo mu myaka ibiri ishize, bubibutsa kudatezuka ku ntego bihaye, kubyaza umusaruro ubumenyi bahawe n’uburere batojwe.

By’umwihariko, ubuyobozi bw’Akarere ka Gicumbi bwijeje ko bugiye gukorera ubuvugizi icyo kigo ku mbogamizi cyagaragaje zirimo kuba kitagira imodoka itwara kwa muganga abanyeshuri barwaye mu gihe ibitaro bivurizaho biri kure y’ishuri n’ibibuga by’imikino n’imyidagaduro bidahagije.

Saint Laurent TVET School ni ishuri ryashinzwe mu mwaka wa 2016 ritangirana abiga amashanyarazi, ariko ubu haje n’andi mashami abiri arimo iryigisha gukora porogaramu za mudasobwa (Software Development) ndetse n’iryigisha ibijyanye na elegitoronike (Electrical and Electronic), ku buryo umwaka utaha hazatangira gusohoka abarangije muri ayo mashami.  

Iryo shuri ryatangiranye abanyeshuri babarirwa muri 60 gusa, kuri ubu ryigisha abanyeshuri 259, mu gihe rifite ubushobozi bwo kwakira abagera kuri 270.

Abanyeshuri barangije muri iki kigo bishimira ko bamwe bamaze kwinjira muri kaminuza abandi bakaba bafite imirimo itandukanye
  • NTAWITONDA JEAN CLAUDE
  • Kamena 27, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE