Leta yaringanije amafaranga y’ishuri, hakumirwa ibigo byakaga ay’umurengera

  • NTAWITONDA JEAN CLAUDE
  • Nzeri 14, 2022
  • Hashize imyaka 2
Image

Minisitiri w’Uburezi Dr. Uwamariya Valentine, yatangaje ko Guverinoma y’u Rwanda yafashe icyemezo cyo kuringaniza amafaranga y’ishuri atangwa mu bigo bya Leta n’ibifatanya na Leta mu mashuri y’inshuke, abanza n’ayisumbuye, mu rwego rwo gukumira ibigo byakaga umusanzu w’umurengera.

Dr. Uwamariy, yabigarutseho mu kiganiro n’abanyamakuru kuri uyu wa Gatatu taliki 14, aho yashimangiye ko iki cyemezo kigamije guca imikorere itanoze yagaragaraga mu byemezo by’ibigo by’amashuri byikorezaga ababyeyi umutwaro uremereye.

Biteganyijwe ko mu mashuri y’inshuke n’abanza umubyeyi azajya yishyurira umwana we amafaranga y’u Rwanda 975 ku gihembwe nk’umusanzu we kugira ngo umwana we agaburirwe ku ishuri, hatarimo imyenda y’ishuri, amakayi n’ibindi akenera mu myigire.

Ni mu gihe amashuri yisumbuye uwiga ataha azajya yishyura amafaranga 19,500 na ho uwiga acumbikiwe mu kigo akishyura amafaranga 85,000.

Ku bana biga mu mashuri y’inshuke n’abanza ya Leta, Guverinoma yanzuye ko igiciro kirenga ku bigenda kugaburira umwana ku ishuri mu minsi y’amasomo kizishyurwa na Leta, bityo nta mfaranga yandi y’ishuri akenewe ku mubyeyi.

Amashuri ashobora gusaba ababyeyi andi mafaranga afitiwe impamvu ifatika kugira ngo akemure ibindi bibazo ariko ngo ntagomba kurenga 7,000 Frw ku gihembwe mu mashuri yisumbuye.

Iki cyemezo cyakiranywe yombi n’ababyeyi batandukanye bitegura kohereza abana babo ku ishuri, kuko gikuyeho akajagari n’ubusumbane bukabije bwagaragaraga mu misanzu yo mu mashuri ya Leta.

Ku mashuri asanzwe acumbikira abanyeshuri kandi akabaha matora mu buryo bwo kuzikodesha nka kimwe mu biryamirwa, yemerewe kwaka abanyeshuri bashya bonyine umusanzu w’amafaranga y’u Rwanda atarenze ibihumbi icyenda (Frw 9.000) atangwa rimwe gusa mu myaka itatu (3) kugira ngo hashobore gusimburwa matora zishaje.

Dr. Uwamariya ati: “Nta shuri rya Leta cyangwa irikorana na Leta ku bw’amasezerano ryemerewe gusaba abanyeshuri ibindi bikoresho bitaboneka ku rutonde rwatanzwe. Ni itegeko ko buri munyeshuri yambara umwambaro w’ishuri wemewe mu gihe ari ku ishuri, ava cyangwa ajyayo.”

Urwo rutonde rw’ibikoresho umubyeyi asabwa kugurira umunyeshuri wiga mu mashuri yisumbuye birimo umwambaro w’ishuri n’ibikoresho by’umunyeshuri; ibikoresho by’isuku; ibikoresho byo kumeza; ibiryamirwa; inzitiramibu; ikarita y’umunyeshuri; ikarita y’imyitwarire ; amafoto magufi n’ubwishingizi bw’urnunyeshuri.

Ku munyeshuri wiga mu mashuri y’inshuke n’abanza, umubyeyi asabwa kumugurira umwambaro w’ishuri n’ibikoresho by’umunyeshuri.

Yavuze ko ishuri ari ryo rigena ibara ry’umwambaro w’ishuri, imiterere n’imidodere yawo. Igitambaro cyatoranyijwe kudodwamo umwambaro w’ishuri ntikigomba kugira amabara menshi.

Nta mubyeyi utegetswe kugurira umwambaro w’ishuri cyangwa ikindi gikoresho icyo ari cyo cyose ku ishuri umwana yigaho, keretse abyihitiyemo.

Aya mabwiriza azatangira gushyirwa mu bikorwa guhera mu mwaka w’amashuri 2022/2023, keretse gusa ibwiriza rijyanye n’umwambaro w’ishuri rizatangira gushyirwa mu bikorwa mu mwaka w’amashuri 2023/2024.

Niba ishuri rihuye n’ibibazo byihariye mu ishyirwa mu bikorwa ry’aya mabwiriza, ibyo bibazo bizajya bisuzumwa kandi byemezwe na Minisiteri y’Uburezi ku busabe bw’Inteko Rusange y’Ababyeyi.

  • NTAWITONDA JEAN CLAUDE
  • Nzeri 14, 2022
  • Hashize imyaka 2
TANGA IGITEKEREZO
Beya says:
Nzeri 14, 2022 at 12:50 pm

IKIBAZO MFITE KIRAGIRA KITI:” ESE UBUNDI NIBA BARINGANYIJE AYO MAFARANGA MU BIGO BYA LETA N’IBIFASHWA NAYO, UBUNDI BYARI BISANZWE BIHAGAZE BITE (IKIGO CYAKAGA MENSHI CYANE CYAKAGA ANGAHE, ICYAKAGA MAKE CYAKAGA ANGAHE)? ” . SIKO ABABYEYI BOSE BARERERA MURI AYO MASHURI, ARIKO NI BYIZA KO ABANYARWANDA BABIMENYA.

Rameki says:
Nzeri 14, 2022 at 4:49 pm

Turabyishimiye cyane.

Andika igitekerezo

AMATEGEKO AGENGA IYANDIKA RY'IGITEKEREZO CYAWE