Kwibohora29: Umuturage yahawe ijambo ibitekerezo bye bihabwa agaciro

  • NTAWITONDA JEAN CLAUDE
  • Nyakanga 4, 2023
  • Hashize amezi 11
Image

Abaturage bo mu Karere ka Ngororero batangaza ko ibitekerezo by’umuturage bihabwa agaciro, akagira ijambo mu bikorwa by’iterambere bitandukanye, harimo no kubaka amashuri, abantu bagaca ukubiri n’ubujiji.

Mu Karere ka Ngororero, hatashywe ibikorwa bitandukanye bigaragaza uburyo abaturage bishimira ibyiza bamaze kugeraho mu kwizihiza Isabukuru y’imyaka 29 ishize u Rwanda rwibohoye. 

Umuyobozi w’Akarere ka Ngororero, Nkusi Christophe ari kumwe n’itsinda yari ayoboye yafunguye ku mugararo ishuri ry’imyuga rya Runayu ryigisha ubudozi n’ububaji mu Murenge wa Muhanda.

Mu butumwa Meya Nkusi yatanze yashishikarije urubyiruko kugana iri shuri ry’imyuga ari benshi kugira ngo bahavane ubumenyi buzabafasha kwihangira umurimo, no kwirinda ingeso mbi.

Yagize ati: “Urubyiruko by’umwihariko ndabashishikariza kugana amashuri y’imyuga kuko ubumenyi muhakura buzabafasha kwihangira imirimo muce ukubiri n’ubushomeri bwabakururira kwishora mu ngeso mbi zirimo gukoresha ibiyobyabwenge, ubujura, ubusambanyi, n’ibindi”.

Ishuri ry’imyuga rya Runayu ryatwaye miliyoni 90, ryakemuye ibibazo byinshi mu rubyiruko rw’abahungu n’abakobwa birimo ubushomeri, ingeso mbi nko gufata ibiyobyabwenge.      

Abaturage bashimiye Nyakubahwa Perezida wa Repubulika Paul Kagame ibikorwa byiza akomeje kubagezaho.

Hategekimana Bernard utuye mu Mudugudu wa Kimiramba, Akagari ka Nyenyeri, Umurenge wa Kabaya mu Karere ka Ngororero yavuze ko icyo kigo ari gishyashya, ari ahantu   hatai amashui, none bakaba baruhutse urugendo rurerure bakoraga.

Yagize ati: “Aha nta mashuri yari ahari, abana bajyaga Kageshi, abana bakajya Kinanira, Mubugu ariko ababyeyi bo muri aka gace, ni bo batangiye mu byerekeye kwibohora, kuko muri Leta ya mbere nta muturage wagiraga ijambo ngo abe yavuga ngo hano tuhakeneye ishuri, ibibazo byavaga hejuru bikamanuka bavuga ngo ahangaha tuzahubaka ishuri. 

Ariko ubu ibibazo bisigaye biva hasi bikazamuka ari byo bigaragaza kwibohora, biva hasi bikagera hejuru, ahubwo bakareba bati ba baturage ba hariya hasi bakeneye iki? Icyo kintu abaturage bakeneye akaba ari cyo bamanuka baza gutera inkunga n’uruhare rw’abaturage  rukagaragaramo”.

Yongeyeho ati: “Kwibohora ni icyo bimaze kuko mbere umuturage ntiyavugaga ngo azatekereza ku gikorwa cy’ishuri, byabaga ari ibya Leta, gusabiriza Leta. […] ariko ubu abaturage ni bo bagira uruhare mu bikorwa, Leta ikareba ibyo badashoboye ikabibateramo inkunga”.

Mu murenge wa Kabaya itsinda riyobowe n’Umuyobozi w’Akarere  ka Ngororero wungirije ushinzwe imibereho myiza y’abaturage Mukunduhirwe Benjamine ryatashye ibyumba by’amashuri 3 bizigirwamo n’abana b’inshuke rya Kimiramba, igikoni n’ibyumba by’ubwiherero 6.

Mu butumwa Visi Meya Mukunduhirwe yageneye abaturage harimo kubasobanurira impamvu yo kwibohora no gusubiza abana mu mashuri.

Iri shuri ry’inshuke ryakemuye ikibazo cy’abana bo mu Mudugudu wa Kimiramba batagiraga aho kwigira. Ababyeyi bashize impungenge kuko abana batazongera kwandagara igihe bagiye mu mirimo cyane ko hari ibikenerwa by’ibanze nk’igikoni n’ubwiherero.

  • NTAWITONDA JEAN CLAUDE
  • Nyakanga 4, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE