Kigali: Umunyeshuri yakoze uburyo busimbura abantu mu nganda no ku marembo

  • NTAWITONDA JEAN CLAUDE
  • Mutarama 3, 2024
  • Hashize amezi 5
Image

Imikoreshereze y’amashanyarazi mu nganda itandukanye n’iyo abantu benshi bamenyereye mu ngo zabo, kuko iyo ahujwe n’ikoranabuhanga rigezweho abyara imbaraga zikoresha zishobora gusimbura imbaraga z’abantu ibihumbi cyangwa amagana.

Mushinzimana Jean de Dieu wiga mu Ishuri Ryisumbye ry’Imyuga n’Ubumenyi Ngiro rya Don Bosco TSS, ni umwe mu batangiye kubona urundi ruhande rw’amashanyarazi rurenze ku kumurikira abantu, gucomeka telefoni, mudasobwa n’ibindi bikoresho byo mu ngo.

Uyu musore yiga mu mwaka wa gatanu w’amashuri yisumbuye (L5) mu bijyanye n’amashanyarazi akoreshwa mu nganda, ari na ho yamenyeye ko amashanyarazi akoreshwa mu gutwara imizigo bituma yubaka uruhererekane (circuit) rushobora gukora amasaha 24/24 rukura ibicuruzwa aho byakorewe rubigeza aho byinjirizwa mu bubiko cyangwa bigatwarwa n’abakiliya.

Mu kiganiro n’Imvaho Nshya, Mushinzimana yavuze ko ubwo buryo bwitwa “semi forward and reverse automatically” ari na bwo bukoreshwa iyo hakorwa amarembo yifungura akanikinga bidasabye ko haba hari umuzamu wo kubikora.

Avuga ko uretse kuba iyo sisitemu ikoreshwa mu nganda no ku marembo, ishobora no gukoreshwa mu kuzamura ikintu mu ntera runaka cyangwa kugikurayo.

Ubushobozi bw’ibishobora guterurwa bijyana na moteri yakoreshejwe iyo circuit yubakwa, ku buryo ifite imbaraga ngo iba ishobora no guterura toni 10 ingunga imwe.

Mu kubaka ubwo buryo hakoreshwa ibyitwa contacteurs bigenda bihererekanya amakuru bitewe n’iminota yateganyijwe kugira ngo umuzigo, cyangwa urugi rw’igipangu bigere aho bikwiye kugera.

Yagize ati: “Ukuntu imeze ibanza ikajya imbere (muri forward), iminota wayihaye nyuma y’iminota washyizemo ihita iruhuka, umuntu agakuraho umutwaro. Contacteur ya gatatu ni iyo gusubira inyuma ikajya kuzana undi mutwaro, contacteur ya kane irongera na yo ikaruhuka na yo iriho ingengagihe (timer) iba yashyiriweho. Iyo imaze gupakira irongera ikagenda nanone mu buryo bwayo gutyo gutyo, ishobora gukora amasaha 24 kuri 24.”

Yakomeje agira ati: “Gukoresha iri koranabuhanga bifite agaciro no ku marembo y’abakire, circuit ukayishyira ku irembo ry’igipangu cyawe. Urabona igih uyishyize ku marembo yawe ntabwo ushobora gukenera umuzamu uzajya agufungurira mu gihe utashye. Ushyiraho akumvirizo noneho waza ikumva igafungura muri forward wamara kwinjira igafunga muri reverse. Ubwo urumva umumaro wayo ituma utabasha gushyiraho umuntu ugufungurira.”

Mushinzimana avuga ko kwiga imyuga byamufunguriye amahirwe atandukanye kuko n’iyo agiye mu biruhuko akorera amafaranga afasha abaturage bashyira amashanyarazi mu ngo zabo.

Ati: “Ibi bintu ndimo kwiga ndamutse nsoje amasomo bishobora kumfasha cyane. Nshobora nko kujya gusaba akazi mu nganda, muri REG kubera ko iyo umaze kwiga muri L5 uba umaze kumenya ibintu byinshi bikoreshwa mu nganda. Umwuga ni cyo kintu cya mbere cyiza, ntushobora kwiga umwuga ngo uzisange mu bashomeri, iyo utabonye akazi na we uba ushobora kukihangira.”

Yavuze ko iyo yabonye ikiraka aba ashobora gukorera amafaranga y’u Rwanda arenga ibihumbi 100 ku cyumweru.

Ubumenyi uyu musore amaze kunguka yabumurikiye mu imurikabikorwa ryateguwe n’abiga imyuga mu bigo byitiriwe Mutagatifu Don Bosco ryabaye ku ya 29 no ku ya 30 Ukuboza 2023, mu Kigo cya Don Bosco Gatenga TSS giherereye mu Karere ka Kicukiro.

Ni imurikabikorwa ryitabiriwe n’amashuri ya Tekiniki, Imyuga n’Ubumenyi Ngiro (TVET) ya Don Bosco uko ari atatu ari yo Don Bosco Gatenga TSS riri mu Murenge wa Gatenga Akarere ka Kicukiro, Don Bosco Rango TVET School riherereye mu Karere ka Huye ndetse na Don Bosco Muhazi TVET School riherereye i Gikomero mu Karere ka Gasabo.

Padiri Gatete Innocent, Umusaleziyani wa Don Bosco akaba Umuvugizi w’Umuryango w’Abasaleziyani mu Rwanda n’Umuyobozi wa Rango TSS, yavuze ko iryo murikabikorwa ryateguwe mu rwego rwo kumurika ibikorerwa muri buri kigo.

Mu byamuritswe harimo ibyakozwe n’abiga imyuga ijyanye n’amazi, ubudozi, iby’ubwiza (beauty), ububaji, ubwubatsi, amashanyarazi, gusudira no guteka (culinary art).

Yavuze ko iryo murikabikorwa riri muri gahunda y’ubukangurambaga bugamije gushishikariza ababyeyi kuyobora abana mu myuga ndetse n’abana na bo bakarushaho kuyikunda kuko ari cyo cyerekezo cy’Igihugu.

Gahunda ya Guverinoma y’imyaka 7 yo kwihutisha iterambere (NST1) itenganya ko umwaka wa 2024 ugomba kurangira nibura 60% y’abanyeshuri barangiza icyiciro rusange cy’amashuri yisumbuye (O’ Level) bagomba kwiga imyuga n’ubumenyi ngiro, 40% bakaba ari bo biga amashuri y’ubumenyi rusange.

Yagize arti: “Uyu mwaka muri gahunda z’itumanaho no kumenyekanisha ibyo dukora twateguye uyu munsi uza ukurikira undi munsi twakoze muri buri kigo, wo gukora ubukangurambaga kugira ngo urubyiruko rwo mu Rwanda rwitabire amasomo y’imyuga n’ubumenyi ngiro kuko ni gahunda twasabwe n’Igihugu.”

Padiri Gatete yavuze ko ibyamuritswe n’abo banyeshuri ari bike cyane ugereranyije n’ibikorerwa mu mashuri ya Don Bosco TSS, kandi bakora uko bashoboye bagashyigikira udushya bahanga bakanabafasha gushakira isoko ibishobora kugurishwa bikarushaho gushyigikira imyigire yabo.

Yemeje ko muri ayo mashuri usanga hari ibyuma byagenewe kumurikirwamo ibishya byahanzwe n’abo banyeshuri ku buryo uhageze akabikunda ahabwa amahirwe yo guhaha, akaba anashyigikiye abo banyeshuri kuko bongera kugura ibikoresho bigiraho.

Padiri Gatete Innocent, Umusaleziyani wa Don Bosco akaba n’Umuyobozi wa Rango TSS
  • NTAWITONDA JEAN CLAUDE
  • Mutarama 3, 2024
  • Hashize amezi 5
TANGA IGITEKEREZO
lg says:
Mutarama 4, 2024 at 8:47 am

ibyo si ibintu bishya bisanzwe bikoreshwa mu Rwanda imyaka ni myaka muba mutazi ibyo muvuga imashini ziterura imizigo munganda !!jya munganda urugero muli TOLIRWA kuva muli za 90 izifungura ibipangu ibyo ubu imodoka yanyiri urugo iyo igeze imbere umuryango ulifungura ukifunga yagera kurugi rwinzu rukikingura none namwe muli murayo ngo mwavumbuye uburyo

Andika igitekerezo

AMATEGEKO AGENGA IYANDIKA RY'IGITEKEREZO CYAWE