Kigali: Itorero ryo mu biruhuko rifasha abanyeshuri kutishora mu bishuko

  • NTAWITONDA JEAN CLAUDE
  • Kanama 10, 2022
  • Hashize imyaka 2
Image

Minisitiri w’Ubutegetsi bw’Igihugu Gatabazi Jean Marie Vianney yifatanyije n’Umujyi wa Kigali n’izindi nzego mu gutangiza gahunda y’Intore mu biruhuko igamije gutoza abana bari mu biruhuko indangagaciro z’Abanyarwanda, kwishakamo ibisubizo, gukuza impano zabo mu mikino no kubarinda ibishuko n’ihohoterwa.

Ni igikorwa cyabaye ku gicamunsi cyo ku wa Kabiri, gitangirizwa i Nyamirambo kuri Club Rafiki, Umuyobozi w’Umujyi wa Kigali Pudence Rubingisa ari kumwe na Minisitiri w’Ubutegetsi bw’Igihugu Gatabazi Jean Marie Vianney n’Umunyamabanga wa Leta muri Minisiteri y’Urubyiruko n’Umuco Emmanuel Bigenimana aho batangije gahunda y’Itorero ryo mu biruhuko 2022.

Gahunda y’intore mu biruhuko y’uyu mwaka ifite insanganyamatsiko igira iti ‘Ibiruhuko bifite intego, Agaciro kanjye’.  

Minisitiri w’Ubutegetsi bw’Igihugu Gatabazi Jean Marie Vianney yakanguriye abana kugira umurongo wo kugenderaho kugira ngo ahazaza habo hazabe heza. Yibukije kandi ababyeyi kugira umwanya wo kuganira n’abana kuko iyo umwana ari inshuti y’umubyeyi ntakibasha kumuhungabanya kuko akimenya kare.

Yasabye kandi abakora ubucuruzi bw’inzoga ndetse n’abategura ibikorwa by’imyidagaduro kwitondera ko abana bato batajya mu bintu bibangiza birimo no kunywa inzoga n’izindi ngeso mbi.

Umuyobozi w’Umujyi wa Kigali Rubingisa Pudence yibukije ko gahunda y’Intore mu biruhuko igamije gukangurira abana n’urubyiruko kubyaza umusaruro ibihe by’ibiruhuko bagaragaza umusanzu wabo mu iterambere ry’umuryango n’Igihugu muri rusange kandi bakabungabungwa.

Yanavuze ko bateganya ko iyi gahunda izajya ikomeza no bihe bitari ibiruhuko, ati: “Ubu dufite site zigera ku 166 mu Mujyi mu bikorwa birimo gukorwaho mu Turere dutandukanye, tukaba dufite n’urubyiruko rurenga 700, rwatanze umwanya wabo mu mpano zabo.

Iyi gahunda nta n’ubwo tuzayikomeza gusa mu biruhuko, ahubwo izajya inakorwa no mu yindi minsi isanzwe abana batari ku ishuri, kugira ngo bakomeze kubaba hafi mu bikorwa bitandukanye”.

Gahunda y’Intore mu biruhuko izamara ukwezi, izasoza ku italiki ya 9 Nzeri 2022.

Abanyeshuri mu biruhuko, iyo bari mu Itorero bateza imbere impano zabo (Foto MINALOC)
Minisitiri w’Ubutegetsi bw’Igihugu Gatabazi Jean Marie Vianney yashishikarije ababyeyi kuganira n’abana kuko bibafasha kubisanzuraho (Foto MINALOC)
  • NTAWITONDA JEAN CLAUDE
  • Kanama 10, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE