Kicukiro: Abarimu bahigiye kudatererana Perezida Kagame

  • NTAWITONDA JEAN CLAUDE
  • Kanama 11, 2022
  • Hashize imyaka 2
Image

Baca umugani mu Kinyarwanda ngo ‘Akuzuye umutima gasesekara ku munwa’, uyu mugani kimwe n’indi ifatiye kukwerekana amarangamutima y’ibyishimo ni yo irimo gucibwa hanze aha.

Aho unyuze muri karitsiye dutuyemo wumva akanyamuneza ari kose ku barimu mu ngeri zose kuva ku wigisha mu mashuri abanza kugeza mu yisumbuye ukongeraho n’abayobozi b’ibigo by’amashuri.

Dukuzumuremyi Jovith, umwarimu mu ishuri ribanza mu Karere ka Kicukiro mu Murenge wa Masaka, ashima ikizere Perezida wa Repubulika Paul Kagame akomeje kubagaragariza.

Ni nyuma y’aho Guverinoma itangarije ko umushahara wa mwarimu ukorera kandi agahemberwa ku mpamyabumenyi y’amashuri yisumbuye A2, yongerewe 88% by’umushahara utahanwa w’umutangizi cyangwa amafaranga y’u Rwanda 50.849.

Umwarimu ukorera kandi agahemberwa ku mpamyabumenyi y’icyiciro cya mbere cya Kaminuza A1, yongerewe 40% by’umushahara utahanwa w’umutangizi cyangwa 54.916 frw.

Umwarimu ukorera kandi agahembwa ku mpamyabumenyi y’icyiciro cya kabiri cya Kaminuza A0 yongerewe 40% by’umushahara utahanwa w’umutangizi cyangwa 70.195 frw.

Rukebanuka Adalbert, Umuyobozi Nshingwabikorwa wungirije wa Kicukiro, yijeje ko azatumikira abarimu

Ni mu gihe hongerewe kandi umushahara w’abayobozi b’amashuri, abayobozi bungirije, n’abandi bakozi bo mu bigo by’amashuri ya Leta n’afatanya na Leta ku bw’amasezerano.

Dukuzumuremyi avuga ko ubwo bari mu mahugurwa ajyanye n’Ibarura Rusange rya Gatanu ry’abaturage n’imiturire bumvise inkuru nziza yuko mwarimu yongerewe umushahara.

Yagize ati: “Ni ikintu twishimiye. Turashimira Perezida Paul Kagame cyane kuba atwizera yarangiza akongera akadutekerezaho, ntabwo tuzigera tumutererana”.

Aha ni ho ahera atuma ubuyobozi bw’Umurenge wa Masaka n’ubw’Akarere ka Kicukiro ko bakunda Perezida.

Akomeza agira ati: “Twaramutoye ibyo byo ntabwo ari ibanga tuzakomeza kumuba inyuma muri byose, mumutubwirire ko tumukunda”.

Kazuba Alice na we wigisha mu Karere ka Kicukiro yahamirije Imvaho nshya ko mu gihe kiri imbere uburezi buzaba buhagaze neza kuko ngo bagiye gukorana imbaraga zose zishoboka kuko ngo ubushobozi burahari.

Dukuzumuremyi na we yongera kwizeza ko mu myaka 10 u Rwanda ruzaba ruri mu bifite ubukungu bwiza biturutse ku musaruro mwarimu atanga.

Rukebanuka Adalbert, Umuyobozi Nshingwabikorwa wungirije w’Akarere ka Kicukiro, yijeje ko nk’ubuyobozi bazatumikira mwarimu kuko afite agaciro ku iterambere ry’igihugu.

Ubuyobozi bwijeje kuzatumikira abarimu
  • NTAWITONDA JEAN CLAUDE
  • Kanama 11, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE