Kayonza: Abayobozi b’ibigo by’amashuri bibukijwe uruhare bafite mu iterambere rizana impinduka

  • NTAWITONDA JEAN CLAUDE
  • Mata 22, 2022
  • Hashize imyaka 2
Image

Umuyobozi w’Akarere ka Kayonza John Bosco Nyemazi yayoboye inama yaguye y’uburezi yarebeye hamwe ishusho y’uburezi mu karere bungurana ibitekerezo, hanasinywa imihigo hagati y’Umuyobozi w’Akarere n’abayobozi b’ibigo by’amashuri yose ndetse bibutswa ko bafite uruhare mu iterambere rizana impinduka binyuze mu gutanga uburezi bufite ireme.

Umuyobozi w’Akarere ka Kayonza yatangiye inama ashimira abitabiriye inama, ashima n’uruhare bagira mu kuzamura ireme ry’uburezi muri ako Karere.

Ati: “Igihugu cyacu cyahisemo iterambere ryihuta kandi rizana impinduka, abayobozi b’ibigo y’amashuri mufite uruhare muri iryo terambere rizana impinduka”

Meya yavuze ko iyo nama ibaye mu ntangiriro z’igihembwe cya gatatu ngo bagire ingamba bafata zigamije guteza imbere ireme ry’uburezi.

Ati: ”Twifuje kugirana inama namwe mu gihe dutangira igihembwe cya gatatu kugira ngo tugire ibyo twumvikanaho dufate ingamba zigamije kwihutisha ireme ry’uburezi”.

Umukozi ushinzwe uburezi bw’amashuri yisumbuye n’ay’imyuga mu Karere Kayonza yagaragarije abitabiriye inama y’uburezi imitsindire y’abanyeshuri mu kizamini cya Leta cy’umwaka wa 2020-2021.

Mu mashuri abanza, ibigo bigera kuri 30 abanyeshuri bose batsinze ku kigero cya 100%. Ikigereranyo rusange cy’imitsindire mu mashuri abanza ni 89.5%. Ikigo cya mbere mu Karere kikaba ari ORP CARE. Mu mashuri yisumbuye, mu cyiciro rusange ikigo cya New Life Christian Academy ni cyo cyabaye icya mbere mu Karere.

Ikigereranyo rusange cy’imitsindire mu cyiciro rusange mu Karere ni 94.9%. Iki kigo kikaba cyaranabaye icya mbere mu mitsindire ku banyeshuri basoza amashuri yisumbuye.

Umuyobozi w’Akarere ka Kayonza wungirije ushinzwe imibereho myiza y’Abaturage Harelimana Jean Damascene yatanze ikiganiro cyibanze kuri gahunda ya NST1 mu burezi.

Umuyobozi w’Akarere ka Kayonza wungirije ushinzwe imibereho myiza y’Abaturage Harelimana Jean Damascene

Yagaragaje ko mu mwaka wa 2024, 60% by’abanyeshuri bagomba kuzaba biga mu mashuri y’imyuga n’ubumenyi ngiro, Abanyeshuri kandi bazashishikarizwa kwiga amasomo ya siyansi. Amashuri y’incuke azongerwa, hazatezwa imbere ikoranabuhanga mu kwiga no kwigisha. Yavuze kandi ko umubare w’abarimu bafite ubumenyi mu kwigisha uzakomeza kongerwa.

Nyuma y’ibiganiro byatanzwe, abitabiriye inama bunguranye ibitekerezo ku buryo bwo kuzamura ireme ry’uburezi. Ibitekerezo byatanzwe byibanze ku gutoza abana ikinyabupfura, gushishikariza abana kwitabira imikino n’ubuyobozi bw’ibigo bukabigiramo uruhare.

Meya  kandi yasabye abayobozi b’ibigo kwibutsa no gushishikariza abarezi kwita ku banyeshuri bigisha, gusaba ababyeyi gufasha abana gufatira ifunguro ku ishuri, batanga umusanzu ukenewe. Hari kandi gukoresha neza umutungo wa Leta uhabwa ibigo by’amashuri kugira ngo ufashe ibigo mu burezi bw’abana.

Abayobozi b’ibigo by’amashuri basinye imihigo

Nk’uko byari biteganyijwe, abayobozi b’ibigo by’amashuri n’abanyamabanga nshingwabikorwa b’imirenge basinyanye imihigo n’umuyobozi w’akarere.

Muri iyo mihigo, abayobozi biyemeje ko abana bose bagomba gufatira ifunguro ku ishuri, kurwanya amakimbirane mu bigo bayobora, gukoresha ikoranabuhanga mu myigire n’imyigishirize, kuzuza amakuru yose akenewe muri SDMS, kuzamura imitsindire y’abanyeshuri mu kizamini cya Leta ikaba 100%, n’iyindi.

Aba ni abari bitabiriye inama yaguye y’uburezi mu Karere ka Kayonza (Foto Akarere ka Kayonza)

Meya ati: “Turabizeza ubufatanye mu kwesa imihigo muri businye uyu munsi, turabasaba kandi kujya mutugisha inama aho muhuye n’imbogamizi.”

Mu butumwa yahaye abitabiriye inama, Meya yagaragaje ko ahazaza h’igihugu hashingiye ku burezi.

Ati: “Iyi mihigo tumaze gusinya igamije guha abana bacu ubumenyi bwa nyabwo kuko aba bana ni bo bayobozi b’ejo hazaza”

Yavuze ko gusinya imihigo ari kimwe no kuyishyira mu bikorwa bikaba ikindi gikorwa. Ati: “Mugende murebe muri iyo mihigo muyisome neza muvanemo icyatuma ibigo muyoboye bitera imbere.

 Meya kandi yasabye abayobozi kubaka imibanire myiza n’abarimu ndetse n’abanyeshuri bayobora. Yabibukije ko abana bigisha ndetse n’ababyeyi babo ari bo bafatanyabikorwa babo ba mbere.

Abari mu nama bunguranye ibitekerezo (Foto Akarere ka Kayonza)

Yasoje ashimira abayobozi, abasaba kongera ikibatsi mu kazi kabo ka buri munsi kugira ngo bazamure ireme ry’uburezi mu Karere ka Kayonza.

Ati: “Icyo tugamije hano twese ni ugushaka gutsinda no guhora imbere”.

Abayobozi b’ibigo by’amashuri n’Abanyamabanga Nshingwabikorwa b’Imirenge basinyanye imihigo n’Umuyobozi w’Akarere

Iyi nama yitabiriwe n’abayobozi bo mu nzego zitandukanye harimo Visi Meya Harelimana Jean Damascene. inzego z’umutekano, abafatanyabikorwa mu burezi, abayobozi b’Imirenge, abashinzwe uburezi mu Mirenge n’abayobozi b’ibigo byose by’amashuri yo mu Karere ka Kayonza.

  • NTAWITONDA JEAN CLAUDE
  • Mata 22, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE