Itsinda ry’abaganga muri RDF ryitabiriye ibikorwa byo kuvura abaturage muri Tanzania

Itsinda ry’abaganga n’abandi bakozi bo mu Ngabo z’u Rwanda (RDF), riyobowe na Brig. Gen. Dr. Jean Chrysostome Kagimbana, ryitabiriye ibikorwa by’ingabo z’Umuryango wa Afurika y’Iburasirazuba cyahariwe ubufatanye hagati y’Ingabo n’abasivili (CIMIC), i Dar es Salaam muri Tanzania.

Ibi bikorwa byatangijwe ku wa Gatatu, tariki 26 Kanama 2026, bibaye ku nshuro ya Gatandatu, aho bizamara Icyumweru, byibanda ku gutanga serivisi z’ubuvuzi, ubufasha mu by’ubutabazi ndetse no kuvugurura bimwe mu bigo nderabuzima byatoranyijwe.

Umugaba Mukuru ushinzwe abakozi ku cyicaro gikuru cy’Ingabo za Tanzania (TPDF), Lt Gen SH Othman, yagaragaje intego z’icyumweru cya CIMIC, zirimo gutanga serivisi z’ubuvuzi ku buntu ku baturage, imikoranire n’ubumwe hagati y’ibihugu bigize EAC.

Uyu muyobozi yakomeje ashimira ibihugu byitabiriye iki gikorwa kubera ubwitange bigaragaza mu guteza imbere imikoranire n’ubufatanye bw’akarere, anashimira Abakuru b’Ibihugu ndetse n’Abagaba bakuru b’Ingabo ku murongo no guha umwanya ukwiye gahunda zo guteza imbere ibikorwa by’ubufatanye hagati y’Ibihugu by’Umuryango wa Afurika y’Iburasirazuba.

Uretse u Rwanda, izindi ngabo zohereje abakozi muri Tanzania ni iza Kenya, u Burundi, Uganda na Somalia.

Nyuma y’umuhango wo gutangiza, abaganga baturutse mu Ngabo z’ibihugu bitandukanye bagiye kuvura abaturage mu bice bitandukanye harimo Arusha, Dar es Salaam, Dodoma, Coast Region, Zanzibar.

Itsinda ry’abaganga ba RDF, ku bufatanye na TPDF, bo batanze serivisi z’ubuvuzi ku Bitaro bya Tumbi byo muri Coast Region, ku bilometero bigera kuri 40 uvuye i Dar es Salaam.

Serivisi zatanzwe zirimo ubuvuzi bw’amagufwa n’ingingo, kubaga, ubuvuzi bw’abagore n’ababyeyi, ubuvuzi bw’indwara z’imbere mu mubiri, ubuvuzi bw’igifu n’amara, ubuvuzi bw’abana, indwara z’amatwi n’amazuru n’umuhogo (ENT), isuzuma ry’ubushobozi bwo kumva, ubuvuzi bw’amenyo, indwara z’uruhu ndetse n’ubuvuzi bw’amaso.