Ingabo z’u Rwanda n’iza Maroc zahuriye mu nama ya mbere yiga ku bufatanye 

Inama ya mbere ya Komisiyo Ihuriweho y’Ubufatanye mu bya Gisirikare hagati y’u Rwanda na Maroc iteraniye i Rabat mu Bwami bwa Maroc, kuva taliki 18 ikazageza ku ya 22 Mutarama 2026. 

Muri iyo nama, u Rwanda ruhagarariwe n’Intumwa za Minisiteri y’Ingabo z’u Rwanda na RDF ziyobowe na Brigadier General Patrick Karuretwa, Umuyobozi Mukuru ushinzwe Ubutwererane Mpuzamahanga mu bya Gisirikare.

Iyo nama igamije gushimangira ubufatanye hagati y’Ingabo z’u Rwanda n’Ingabo z’Ubwami bwa Maroc mu nzego zifitiye impande zombi inyungu zihuriweho, hashingiwe ku Masezerano y’Ubufatanye mu bya Gisirikare yasinywe hagati y’ibihugu byombi muri Kamena 2025.

Mu kwezi k’Ugushyingo na bwo Umugaba w’Ingabo zirwanira ku Butaka Maj. Gen. Vincent Nyakarundi, yagiriyeyo uruzinduko rw’akazi rwari rugamije kurushaho gushimangira ubutwererane bw’ibihugu byombi mu bya gisirikare. 

Mu biganiro bagiranye, Maj. Gen. Nyakarundi yagaragaje uburyo u Rwanda runyuzwe n’umubano ukomeye urangwa hagati y’u Rwanda na Maroc. 

Yavuze ko urwo ruzinduko yagiriye muri icyo gihugu ari intambwe y’ingenzi mu kurushaho kwimakaza ubutwererane mu bya gisirikare bwagura amahirwe y’ibiganiro bihoraho hagati y’ingabo. 

Abayobozi ba gisirikare b’ibihugu byombi biyemeje gukomeza kwagura ubufatanye bwitezweho kuba intangarugero mu ruhando mpuzamahanga. 

U Rwanda na Maroc bisangiye amateka maremare y’ubutwererane, bwarushijeho gutera imbere guhera mu mwaka wa 2016 ubwo Umwami Mohammed VI wa Maroc yasuraga Kigali. 

Uruzinduko rw’Umwami Mohammed VI rwabaye umusingi wo kurushaho kwagura ubutwererane mu nzego zitandukanye zirimo ubuhinzi n’ubworozi, ubucuruzi, politiki no gushakira ibisubizo ingorane zibasira Afurika. 

Urwo ruzinduko kandi rwatanze urubuga rwo gusinyana amasezerano menshi arimo aharurira inzira ibiganiro bihoraho mu rwego rwa Politiki, arebana na serivisi z’indege, gukuraho viza, ubutwererane mu by’umutekano ndetse n’ubukerarugendo. 

Amasezerano y’ubufatanye mu bya gisirikare yasinywe nyuma y’uko Minisitiri w’Ingabo wa Maroc Abdeltif Loudyi yakiraga Minisitiri w’Ingabo Juvénal Marizamunda n’itsinda ryari rimuherekeje. 

Icyo gihe ni na bwo hasinywe amasezerano y’ubutwererane mu bya gisirikare akubiyemo ubufatanye mu mahugurwa, imyitozo ya gisirikare, ubufasha bwa tekiniki, urwego rw’ubuzima rwa gisirikare, no guhererekanya ubumenyi. 

Ayo masezerano kandi ni yo yashyizeho Komisiyo ya Gisirikare ihuriweho iteranye muri iki cyumweru, aho igomba guha umurongo inzego zinyuranye z’ubutwererane bwa gusirikare kandi igakorana inama zihoraho zigamije kurushaho kwimbika mu butwererane.