Imyororokere yagizwe ‘ingingo nsangizamasomo’ mu mashuri yo mu Rwanda

  • NGABOYABAHIZI PROTAIS
  • Mutarama 14, 2024
  • Hashize amezi 4
Image

Ubuyobozi bw’ Ikigo cy’Igihugu gishinzwe Uburezi bw’Ibanze mu Rwanda (REB) bwatangaje ko hakomeje kongerwa imbaraga muri gahunda yo kugabanya inda zidateganijwe, kugabanya indwara zandurira mu mibonano mpuzabitsina harimo n’icyorezo cya SIDA binyuze mu burezi.

By’umwihariko gahunda yo kurwanya indwara zandurira mu mibonano mpuzabitsina nka SIDA no kongera ubumenyi ku buzima bw’imyororokere kuva ku bana bafite imyaka 10 kuzamura yagizwe ingingo nsangizamasomo.

Mukayirege Julienne, Umuyobozi w’ishami rishinzwe uburezi budaheza muri REB, yavuze ko Keta yashyizeho ingamba zireba abarezi ndetse n’izireba abanyeshuri.

Mu ngamba zireba abanyeshuri ni ho bigishwa amasomo yose agomba gukomoza ku buzima bw’imyororokere iyo bibaye ngombwa.

Ati: “Urugero nk’umuntu ageze mu mibare agiye kwiga ubwiyongere bw’abaturage, akavuga ku buzima bw’imyororokere mu bijyanye no kubyara abo dushoboye kurera, icyo gihe bakiga uko umuntu yabyara abo ashoboye kurera. Nko mu ndimi washaka umwandiko uvuga ku bijyanye na Virusi itera SIDA.”

Hari n’andi masomo nanone biga ibjyamye n’imyororokere, nk’isomo ry’ubumenyi n’ikoranabuhanga mu mashuri abanza haba hari n’ibishushanyo, aha ni ho buri mwana yigishwa kwiyitaho.

Ku ruhande rw’abarimu,  bahabwa amahugurwa mu kwigisha ubuzima bw’imyororokere, bikajyana no kubaha imfashanyigisho zigenewe abana cyane cyane guhera mu mwaka wa mbere kugeza mu wa gatandatu w’amashuri abanza.

Mukayirege yakomeje agira ati: “Noneho no mu mashuri yishuke na bo tubigisha ko nta muntu ukwiye gukinisha ibitsina byabo.”

Inzego z’uburezi zafashe icyemezo cyo kongera ubumenyi ku buzima bw’imyororokere no kwirinda indwara zandurira mu mibonano mpuzabitsina, mu gihe imibare y’Ikigo cy’Igihugu igaragaza ko virusi itera SIDA igenda yiyongera mu rubyiruko rufite hagati y’imyaka 15 na 24.

Umuyobozi wa GS Nyanza ya Kicukiro

Yavuze ko kugira ngo intego yo gukumira icyorezo cya SIDA igerweho hari gahunda y’uko kuri buri kigo hazaba hari umuntu wahuguwe ku bijyanye no kwigisha urubyiruko uburyo bwo kwirinda.

Yagize ati: “Ubu hariho gahunda yo guhugura abarezi ku bijyanye no kwigisha urubyiruko ibijyanye n’imyororokere bishingiye ku makuru aba agezaweho, usibye ko hari aho mwarimu ajyanwa ku kindi kigo akahasiga icyuho. Ubu rero turimo kureba ikigo cyaba kidafite uwo murezi ngo tumushyireho kuko na byo twasanze ari bumwe mu buryo bwiza bwo gukumira SIDA.”

Bamwe mu bayobozi b’ibigo by’amashuri bashimangira ko kugira ngo koko SIDA ibe yagabanyuka hasabwa ubufatanye busesuye hagati y’ababyeyi n’abarezi bahereye ku ndangagaciro za Kirazira z’umuco Nyarwanda.

Padiri Egide Nsabirema, Umuyobozi w’Urwunge rw’Amashuri rwa Mutagatifu Andre, yagize ati: “Mbere na mbere ni byiza ko umwana aganizwa ku bijyanye no kwirinda virusi itera SIDA; bikwiye gutangirira mu muryango agasobanurirwa ibibi byo kwiyandarika harimo no kwirinda ingeso mbi z’ubusambanyi. ubwo rero iyo umwana ageze ku ishuri n’umurezi iyo abikomojeho birumvikana cyane.”

Uwizera Bernadette Umuyobozi w’Urwunge rw’amashuri rwa Nyanza ya Kicukiro, na we yongeyeho ko buri wese akwiye gutekereza ku gikwiye gukorwa kugira ngo ubwiyongere bw’uwandu bushya bwa virusi itera SIDA cyane cyane mu rubyiruko.

Yagize ati: “Birasaba ko umubyeyi atoza umwana we indangaciro z’umuco, akamugira inshuti amwumvisha ibyiza by’ubuzima bwiza buri imbere.”

Mu biganiro UNESCO yagiranye n’abayobozi b’ibigo by’amashuri, abafite aho bahuriye n’ubuzima, inzego z’umutekano n’abandi,   Umukozi w’uyu muryango mu Rwanda Dr Mpozembizi Alexandre, avuga ko nubwo hari inyigisho zihabwa urubyiruko mu bigo by’amashuri mu kwirinda SIDA hakirimo icyuho.

Yagize ati: “Kenshi urabibona guhuza umuco, imyemerere no guhuza iterambere, aho ngaho ni ho hari imbogamizi. Aha rero ni ho tugomba gushyira imbaraga cyane cyane mu buryo tubihuza noneho mu mashuri y’ibigo by’amadini ntabwo bari babyumva neza  bisaba ngo nabo bigishwe ku buryo wa mwana warenze  wageze aho kwifata byanze nawe yigishwe ko agakingirizo ari ngombwa.”

Raporo ya RBC igaragaa ko mu bantu 42248 baryamanye n’abafite Virusi itera SIDA kuva muri Kmena 2022 kugeza muri Nyakanga 2023, 8% by’abakobwa bari hagati y’imyaka 15 na 24 bahise bandura mu gihe abahungu banduye bangana na 7.8%.

Dr Mpozembizi
  • NGABOYABAHIZI PROTAIS
  • Mutarama 14, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE