Ibyo mwigisha bigomba kubaranga- IGP Munyuza abwira urubyiruko

  • NTAWITONDA JEAN CLAUDE
  • Mata 26, 2022
  • Hashize imyaka 2
Image

Komiseri Mukuru wa Polisi y’Igihugu IGP Dan Munyuza, yasabye urubyiruko rw’abakorerabushake kwigisha abaturage bagahindura imyumvire kandi rukigisha ibikwiye kuba biruranga.

Yabigarutseho kuri uyu wa Mbere mu muhango wo gusoza amahugurwa y’urubyiruko rw’abakorerabushake yaberaga mu kigo cya Polisi i Gishari mu Karere ka Rwamagana.

Amahugurwa yari agamije kongerera ubumenyi n’ubushobozi urubyiruko rw’abakoranabushake bo mu Ntara y’Iburasirazuba mu rwego rwo kwihutisha iterambere n’imibereho myiza y’abaturage.

IGP Munyuza avuga ko kurwanya ibyaha ari umusingi w’iterambere, arusaba kudasinda.

Ati: “Ibyo mwigisha abaturage ni byo bikwiye kubaranga, ntimugasinde, ntimwajya kwigisha abaturage kudasinda kandi namwe muri abasinzi, si byiza. Ntimukarangwe n’ubunebwe, gukora ibyo twiyemeje birimo no kubungabunga umutekano”.

Akomeza asaba urubyiruko kugira isuku no kubanza kwitangaho urugero mu gihe rwigisha abaturage. Ati: “Ibyo twigisha ni byo bigomba kuturanga”.

IGP Munyuza, avuga ko polisi ikora ibishoboka mu gushyira imbaraga ahashobora kuba inzira itangirwamo ruswa.

Urubyiruko rw’abakorerabushake rushishikarizwa kwirinda ibikorwa bibi, imico mibi, ibyaha bishobora guteza umutekano muke, abapfobya Jenoside yakorewe Abatutsi, abapfobya gahunda za Leta, ibiyobyabwenge, amakimbirane mu miryango, ubujura n’ibindi byaha kuko bidindiza iterambere.

Guverineri w’Intara y’Iburasirazuba, CG Gasana K. Emmanuel, yashimiye ubufatanye bwimbitse buri hagati ya Minisiteri y’Ubutegetsi bw’Igihugu, Polisi y’igihugu n’urubyiruko rw’abakorerabushake.

Amahugurwa yitabiriwe n’urubyiruko rusaga 200

Ubuyobozi bw’Intara bunashimira abafatanyabikorwa barimo umuryango mpuzamahanga uharanira amahoro Interpeace, Plan International Rwanda n’Umuryango utari uwa Leta Haguruka batumye aya mahugurwa ashobora kuba.

Urubyiruko rwahigiye kugira uruhare mu iterambere

Urubyiruko rw’abakorerabushake rwiyemeje kurwanya isuri kuri hegitari 204 z’imirwanyasuri.

Nsanganwa Dodos, uhagarariye urubyiruko rw’Abakorerabushake mu Ntara y’Iburasirazuba, asobanura ko biyemeje kwitabira kugira ubwizigame bw’igihe kirekire (Ejo Heza)ku kigereranyo cya 80%  hagamijwe gushora imari no kwiteza imbere mu bukungu.

Urubyiruko rw’abakorerabushake rwiyemeje gufasha ingo gukora ibimpoteri ku kigereranyo cya 75%, gutera ibiti by’imbuto ziribwa 11,802 n’ibiti bivangwa n’imyaka 10,260.

Urubyiruko rw’abakorerabushake twiyemeje kugira uruhare mu kubakira abatishoboye amacumbi 1,692, gusana inzu zimeze nka nyakatsi 4,526.

Ruzubaka ubwiherero ku miryango itishoboye itabufite 1,979, gusana ubwiherero butujuje ibisabwa 9,862.

Hazarwanywa imirire mibi hubakwa imirima y’ibikoni 50,500, gukurikirana ingo mbonezamikurire 11,340 no kugira uruhare mu gukurikirana abana kuva mu mirire mibi (100%).

Urubyiruko rw’abakoranabushake rwiyemeje kugira uruhare mu kurandura umuco wo kurarana n’amatungo ingo 4,040.

Abana bataye amashuri, urubyiruko ruzayabagaruramo 100% ariko runakangurire abaturage gutanga ubwisungane mu kwivuza 100%.

Urubyiruko rw’abakoranabushake ruzakora ubukangurambaga bwo kurwanya inda ziterwa abangavu 100%.

Nsanganwa avuga ko bagiye kurwanya abahakana n’abapfobya Jenoside yakorewe Abatutsi.

Amahugurwa y’urubyiruko rw’abakorerabushake mu Ntara y’Iburasirazuba yamaze iminsi 6 yitabirwa n’urubyiruko rusaga 200.

Urubyiruko rw’abakorerabushake mu Ntara y’Iburasirazuba rwasabwe kwiyubaha no kubaha (Foto Eric)
Urubyiruko rw’abakorerabushake rwahigiye kugira uruhare mu iterambere ry’Intara
Urubyiruko rw’abakorerabushake rwanahawe Certificat nyuma y’amahugurwa
Visi Meya ushinzwe imibereho myiza mu Karere ka Gatsibo, Mukamana Marceline, aganira n’urubyiruko rw’abakorerabushake mbere yuko rusubira iwabo
  • NTAWITONDA JEAN CLAUDE
  • Mata 26, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE