Ibyihariye kuri GS. St. Jean Munini yatashywe ku munsi wo Kwibohora 28

  • NTAWITONDA JEAN CLAUDE
  • Nyakanga 5, 2022
  • Hashize imyaka 2
Image

Urwunge rw’Amashuri Rwitiriwe Mutagatifu Yohana rwa Munini (G.S St. Jean Munini) ni ishuri ryavuguruwe ku buryo bugezweho, rikaba riri mu bikorwa remezo ntangarugero byubatswe mu Karere ka Nyaruguru byatashywe mu kwizihiza isabukuru ya 28 yo Kwibohora.

Iri shuri ryatashywe ku mugaragaro na Minisitiri w’Intebe Dr. Edouard Ngirente, ryahise rijya ku rwego rw’amashuri afite ibikoresho n’ikoranabuhaga rigezweho mu Rwanda bitewe n’ibikorwa remezo n’ibindi bya ngombwa nkenerwa ryagenewe.

Iri shuri ryubakiwe ibyumba by’ubushakashatsi bigezweho (Laboratories) bitandukanye birimo icyumba cy’Ubutabire; Ibinyabuzima; Icyumba cy’Ubugenge, ndetse kandi iri shuri ryahawe n’isomero rifite ibitabo bihagije.

Rifite ibyumba by’amashuri 47, aho bategurira amafunguro ha kijyambere, aho bafatira amafunguro, ikibuga abana bidagaduriramo, isomero rigezweho, abana bigira kuri musadobwa ndetse hari n’ibindi bikoresho byose nkenerwa ku ishuri.

Minisiteri y’Uburezi ivuga ko iryo shuri ryongerewe ubushobozi rizafasha mu kugabanya ubucucike bw’abanyeshuri, ndetse no guteza imbere imyigire n’imyigishirize cyane cyane mu masomo ajyanye na siyansi n’ikoranabuhanga.

Uretse iryo shuri, Minisitiri w’Intebe Dr. Ngirente yanatashye ibikorwa by’Iterambere mu Karere ka Nyaruguru bigizwe n’Umuhanda wa kaburimbo Huye-Kibeho-Munini-Ngoma, Umudugudu w’Icyitegererezo wa Munini n’Ibitaro bya Munini.

Yavuze ko ibyo bikorwa byose ari igihamya ndakuka kigaragaza uburyo Leta y’u Rwanda yiyemeje kudatezuka mu guharanira kunoza imibereho y’Abanyarwanda n’iterambere rishingiye ku mahoro n’umutekano mu Gihugu.

Ati: “Nk’uko twese tubizi, ibi byose byagezweho kubera imiyoborere myiza. Ubuyobozi bufite icyerekezo burangajwe imbere na Perezida Paul Kagame, ndetse kuri uyu munsi dukwiye kumushimira iterambere yagejeje ku baturage.”

By’umwihariko, Umudugudu w’Icyitegererezo wa Munini hamwe n’ibindi bikorwa remezo biwugize, wubatswe na Minisiteri y’Ingabo ukaba wuzuye utwaye milliyari zisaga 15 z’amafaranga y’u Rwanda.

Uwo mudugudu watujwemo imiryango 48 itarabaga ahantu hatekanye, ugizwe n’inzu zo guturamo, urugo mbonezamikurire y’abana bato (ECD), isoko n’ikiraro rusange cyororewemo ingurube.

Abaturage batujwe mu Mudugudu wa Munini barashimira Nyakubahwa Perezida wa Repubulika y’u Rwanda Paul Kagame wabatuje heza, kandi akaba akomeje kuyobora umuvuduko w’iterambere ry’Igihugu ugeze ahashimishije.

Ibyo bikorwa remezo ni bimwe mu bigize imishinga y’ibikorwa rusange 497 birimo  ibikorwa 150 by’iterambere ry’ubukungu n’ibindi 300 bijyanye n’imibereho myiza y’abaturage.

Minisitiri w’Ubutegetsi bw’Igihugu Gatabazi Jean Marie Vianney yavuze ko iyo mishinga yitezweho kugira uruhare rukomeye mu guhindura imibereho y’Abanyarwanda.

Minisitiri w’Intebe Dr. Ngirente Edouard
Imwe mu nyubako zigize Umudugudu w’Icyitegererezo wa Munini
  • NTAWITONDA JEAN CLAUDE
  • Nyakanga 5, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE