Hope Growers ECD yubakiwe ubushobozi ihabwa inkunga ya miliyoni 3.5 Frw

  • NTAWITONDA JEAN CLAUDE
  • Gicurasi 3, 2022
  • Hashize imyaka 2
Image

Ikigo mpuzamahanga cy’ubutwererane cya Koreya (KOICA), ku bufatanye n’abanyamuryango b’Ishyirahamwe ry’abanyeshuri barangije amasomo ku nkunga ya KOICA Rwanda  (KORAA), bakoze umuganda hagamijwe gukangurira abaturage guhangana no kurwanya COVID-19 mu mu rugo mbonezamikurire “Hope Growers ECD” ruherereye mu Karere ka Rwamagana.

KOICA yateguye ibikorwa byo kwegera abaturage muri ‘Gahunda yo guhangana no kurwanya COVID-19’ ku bufatanye na KORAA, ku italiki ya 29 Mata 2022 muri Hope Growers ECD Centre “Ku Mukindo” mu Kagari ka Nyarubuye, Umurenge wa Fumbwe, Akarere ka Rwamagana.

KORAA ni Ishyirahamwe ry’abanyeshuri barangije muri KOICA Rwanda harimo abahabwa amahugurwa y’igihe gito biga mu buryo bw’ikoranabuhanga (iyakure) ndetse n’abakurikira icyiciro cya gatatu cya kaminuza (Master’s) hagamijwe ‘Kongera ubushobozi no Guteza imbere Ahazaza (CIAT)’.

Ni igikorwa cyahuje ababyeyi, abahagarariye ibiro by’uburezi mu Murenge, Umunyamabanga Nshingwabikorwa w’Akagari ka Nyarubuye, abana ba ECD n’ababyeyi babo, KOICA na bamwe mu banyamuryango ba KORAA.

Bimwe mu bikorwa birimo gutanga umusanzu mu baturage, harimo gusukura imihanda, gukuraho ibihuru, no gutanga ibikoresho by’isuku nkenerwa bya buri munsi.

By’umwihariko, ibiro bya KOICA mu Rwanda byatanze ibikoresho by’isuku n’isukura bikenerwa mu buzima bwa buri munsi, amafunguro, amasabune n’udupfukamunwa, ibitabo byo gusoma by’abana, ibikoresho byo kwandika no gusiga irangi mu kigo cya ECD, kugira ngo bifashe kuzamura umusaruro w’uburezi bw’abana bigamije iterambere ry’abana ba ECD.

Agaciro rusange k’impano zatanzwe mu baturage no muri ECD nihafi miliyoni 3.5 z’amafaranga y’u Rwanda (USD 3.500).

Umuyobozi wungirije uhagarariye KOICA mu Rwanda Myung Keun Choi yagize ati: “Mu gutegura uyu muganda, turashaka kubaka umuryango, tubaha ubushobozi mu guhangana no kurwanya COVID-19 binyuze muri gahunda zacu zitandukanye kandi tugatanga umusanzu mu kigo cya Hope Growers ECD mu gushimangira imirire ndetse n’uburere bw’abana”.

Yongeyeho ati: “By’umwihariko, bazaganira n’abafatanyabikorwa ku bijyanye n’ejo hazaza ha ECD kandi basobanure uruhare n’inshingano zayo kugira ngo bagere ku ntego nyamukuru y’uburenganzira bwo kwiga bw’abana bakiri bato”.

Ushinzwe uburezi mu Murenge yashimye KOICA Rwanda kuba yarateye inkunga abana barererwa muri ECD n’ababyeyi babo, anashimangira ko ibikorwa byo kubegera byari igitekerezo cyiza kandi abaturage bakikije iki kigo bazashishikarizwa kurushaho kwibanda ku mibereho y’abana babo.

Yagize ati: “Kwegera abaturage muri Hope Growers Foundation birerekana intambwe ikomeye iganisha ku kubaka ubushobozi no kuzamura ibitekerezo mu baturage bo mu Kagari ka Nyarubuye mu Murenge wa Fumbwe”.

Kuva mu 1991, KOICA yashyize mu bikorwa gahunda zayo z’inkunga mu Rwanda, itanga miliyoni z’amadolari y’Amerika 150 binyuze mu mishinga itandukanye na gahunda yo kongera ubushobozi.

Ibiro bya KOICA mu Rwanda byafunguwe ku mugaragaro mu 2011. Kuri ubu KOICA ifite imishinga irenga 10 mu Rwanda mu nzego z’uburezi, ubuhinzi n’ikoranabuhanga.

COVID-19 itangiye, KOICA yashyigikiye Guverinoma y’u Rwanda mu rwego rwo guhangana n’iki cyorezo itanga imodoka igendanwa (laboratwari) mu gusuzuma hamwe n’ibikoresho byo kwikingira (PPE) bifite agaciro ka miliyoni imwe y’amadolari y’Amerika.

  • NTAWITONDA JEAN CLAUDE
  • Gicurasi 3, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE