Gen. Muhoozi yatangiye uruzinduko rw’akazi mu Rwanda

Umugaba Mukuru w’Ingabo za Uganda, Gen Muhoozi Kainerugaba, yageze mu Rwanda mu ruzinduko rw’akazi rw’iminsi ibiri rugamije gushimangira umubano n’ubufatanye hagati y’ingabo z’ibihugu byombi.

Gen Muhoozi yageze ku kibuga cy’indege cya Kigali kuri uyu wa Gatandatu tariki 25 Nyakanga 2026. Yakiriwe na mugenzi we, Gen Mubarak Muganga, ndetse biteganyijwe ko azagirana ibiganiro byihariye na Perezida Paul Kagame.

Yaherukaga mu Rwanda muri Werurwe 2025, icyo gihe yaganiriye n’abayobozi bakuru mu ngabo z’u Rwanda ku bufatanye bw’impande zombi, asura Ishuri Rikuru rya gisirikare rya Nyakinama riri mu Karere ka Musanze.

Uyu musirikare yigishije abanyeshuri biga muri iri shuri baturutse mu bihugu 20, isomo ryo kongera imbaraga mu bufatanye nk’ishingiro ryo kurinda umutekano wa Afurika.

Yasabye abo banyeshuri kwibanda ku guharanira ubumwe bw’Abanyafurika, nko kurinda inyungu zikomeye za Afurika, kurinda umutekano w’abaturage no guharanira ubuvandimwe bw’abatuye kuri uyu mugabane.