Abarimu 154 boherejwe na Zimbabwe bakiriwe mu Rwanda

  • NTAWITONDA JEAN CLAUDE
  • Ukwakira 20, 2022
  • Hashize umwaka 1
Image

Icyiciro cya mbere cy’abarimu 154  boherejwe na Leta ya Zimbabwe gutanga umusanzu wabo mu kuzamura ireme ry’uburezi mu Rwanda, cyaraye cyakiriwe ku Kibuga cy’Indege Mpuzamahanga cya Kigali mu ijoro ryo ku wa Gatatu taliki ya 19 Ukwakira 22. 

Abarimu bemerewe kuza mu Rwanda ni abatsinze ibizamini by’amabazwa bahawe mu minsi yashize, bakaba barimo ab’igitsina gore 80.

Abo barimu bageze i Kigali mu masaha ashyira saa yine z’ijoro, aho bivugwa ko  bahise berekezwa gucumbikirwa muri Hoteli ya La Palisse Nyamata mu Karere ka Bugesera. 

Kugeza ku wa Gatandatu ni bwo bazahabwa ibisobanuro byose nkenerwa ku birebana n’umuco ndetse n’amateka yose y’ingenzi ku Rwanda, mbere yo hoherezwa mu bigo aho bagomba gutangira inshingano zibazanye. 

Biteganyijwe ko abo barimu boherezwa mu bigo by’amashuri bitandukanye birimo na Kaminuza y’u Rwanda, Amashuri Makuru Nkomatangamyuga (IPRCs), mu yisumbuye cyane cyane ay’Inderabarezi (TTCs), n’amashuri y’imyuga n’ubumenyi ngiro (TVET). 

Iryo tsinda ryaje riyobowe na Minisitiri w’Abakozi ba Leta, Umurimo n’Imibereho myiza y’Abaturage muri Zimbabwe, Paul Mavima. 

Umunyamabanga Uhoraho muri Minisiteri y’Uburezi (MINEDUC) Charles Karakye, ni we wemeje ko aba barimu babanza kumenyerezwa kugeza ku wa Gatandatu taliki ya 22 Ukwakira mbere yo koherezwa mu bigo by’amashuri bazatangamo umusanzu. 

Yagize ati: “Gahunda yo kubamenyereza iraba ikubiyemo kubasobanurira ibijyanye n’umuco wacu, indangagaciro n’amateka, mu guharanira ko amakuru y’ingenzi yose bayabona mbere y’uko boherezwa mu bigo by’amashuri bitandukanye.”

Yongeyeho ko bazabona umwanya wo gusura Urwibutso rwa Jenoside rwa Kigali n’Ingoro y’Urugamba rwo guhagarika Jenoside yakorewe Abatutsi, ari na ho bazasobanurirwa byimbitse ibyerekeye urugamba rwo guhagarika Jenoside no kubohora u Rwanda. 

Iryo tsinda ryitezweho guhita ritangira gutanga ubumenyi buzafasha abanyeshuri ndetse n’abarimu basanze mu burezi bwo mu Rwanda. 

Itumizwa ry’abo barimu rije rikurikiye amaseserano yasinywe hagati ya Leta y’u Rwanda n’iya Zimbabwe ajyanye no guhanahana abakozi mu rwego rw’uburezi. 

Ku ikubitiro, u Rwanda rwateganyaga kwakira abarimu bo muri icyo gihugu 477 nk’imwe mu ngamba zo kuziba icyuho mu bumenyi buhabwa abana b’u Rwanda no gukuraho imbogamizi z’ururimi mu burezi. 

Iyi ntambwe ya mbere itewe nyuma y’aho mu mpera za Nzeri 2021, Perezida wa Repubulika Paul Kagame yasabye  ko Zimbabwe yagoboka u Rwanda mu kuruha abarimu batanga umusanzu mu kuzahura ireme ry’uburezi, mu nama yahurije i Kigali abikorera bo mu bihugu byombi. 

  • NTAWITONDA JEAN CLAUDE
  • Ukwakira 20, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE