Abakozi ba REG banyuze mu Itorero bitezweho gukorera u Rwanda

  • Imvaho Nshya
  • Gicurasi 25, 2022
  • Hashize imyaka 2
Image

Ku wa Kabiri taliki 24 Gicurasi 2022, mu Kigo cy’Ubutore cya Nkumba giherereye mu Karere ka Burera, hatangijwe ku mugaragaro itorero Indemyabusugire V ry’abakozi ba Sosiyete y’u Rwanda Ishinzwe Ingufu (REG).

Iri torero rizamara iminsi icyenda, rizasoza ku wa 31 Gicurasi 2022, aho abatozwa barenga 300 bazahabwa amasomo atandukanye ajyanye no gukunda Igihugu, amateka y’u Rwanda, ndetse n’indangagaciro zikwiye kubaranga zigatuma barushaho gutanga serivisi inoze kandi bakageza Igihugu ku ntego cyiyemeje z’iterambere n’ubumwe bw’Abanyarwanda.  

Umuhango wo gutangiza iri torero wayobowe n’Umuyobozi Nshingwabikorwa muri Minisiteri y’Ubumwe bw’Abanyarwanda n’Inshingano Mboneragihugu, Anita Kayirangwa, wari kumwe na Guverineri w’Intara y’Amajyaruguru, Nyirarugero Dancille, n’Abahagarariye Ingabo na Polisi muri iyo Ntara ndetse n’Umuyobozi w’Akarere ka Burera Uwanyirigira Marie Chantal.

Madamu Anita Kayirangwa yasabye izi ntore kurangwa n’umuco w’ubutore mu buzima bwabo bwa buri munsi no mu mikorere yabo.

Yagize ati: “Kora ndebe iruta vuga numve. Turifuza ko mu butore bwanyu mutazaba intore zo ku munwa, ahubwo muzabe intore zivuga iby’ubutore ariko zagera no mu bikorwa zikaba intore koko. Indangagaciro na kirazira ni byo bigira umuntu uwo ari we. Si amashuri yize, si amafaranga atunze, si amazu yubatse, ahubwo ni indangagaciro.”

Yibukije kandi abitabiriye iri torero guharanira ko amateka mabi u Rwanda rwanyuzemo atazongera kubaho ukundi.

Ati:  “Hari amateka twanyuzemo aza asharira. Ariko na yo ni ayacu, tugomba kuyigiraho tugaharanira kuvuga ngo ayo mateka twanyuzemo tugomba kubigiramo uruhare kugira ngo abana bacu, abuzukuru n’abuzukuruza n’abandi benshi bazadukomokaho batazongera kubonesha amaso yabo ibyo amaso yacu yabonye.”

Guverineri y’Intara y’Amajyaruguru, ubwo yahaga ikaze aba bakozi ba REG, yabasabye kuzatekereza ku bibazo bibangamiye abaturage ndetse n’uruhare rwabo mu kubikemura.

Yagize ati: “Mu Ntara y’Amajyaruguru no mu gihugu muri rusange, hari umubare munini w’abaturage utegereje ibisubizo kuri mwebwe. Ibyo rero muzabitekerezeho, uko mwafasha abaturage batarabona amashanyarazi, cyane cyane ubu turimo gusoza umwaka w’imihigo, muzadufashe rero tubashe kwesa imihigo hirya no hino mu Turere”.

Yasabye izi ntore gukomeza gutanga serivisi inoze mwirinda gusiragiza abaturage, kubahoza mu nzira, mwirinda ruswa kandi muyamagana hose ndetse n’akarengane. Buri wese muri serivisi arimo agomba gukora ibishoboka byose umuturage tukamuha serivisi inoze”.

Umuyobozi mukuru wa REG, Ron Weiss, yashimiye MINUBUMWE ku mahirwe yahaye abakozi yo kwitabira itorero, asaba abakozi ba REG kuzirikana amasomo bazahabwa muri iri torero.

Ati: “Iki gikorwa gifite akamaro gakomeye. Hano muziga amateka, indangagaciro, ndetse n’ibindi bitandukanye bijyanye n’umuco nyarwanda. Umuco nyarwanda ugomba kubatera ishema nk’Abanyarwanda. Ndahamya ntashidikanya ko muzigira byinshi muri iri torero, kandi muzarisoza mufite ishema ryinshi kurushaho ryo kwitwa Abanyarwanda no kwitwa abakozi bakorera igihugu cyababyaye.”

Iki cyiciro cya 5 ni cyo cya nyuma cy’Itorero Indemyabusugire ry’abakozi ba REG. Mu byiciro 4 byabanje, abakozi bagera kuri 857 ni bo batojwe, mu gihe muri iki cyiciro harimo gutozwa abagera kuri 311. Abakozi ba REG kandi batojwe mu gihe iyi sosiyete irimo ishyira mu bikorwa intego Leta y’u Rwanda yiyemeje yo kugeza amashanyarazi kuri bose bitarenze umwaka wa 2024.

Guverineri w’Intara y’Amajyaruguru, Nyirarugero Dancille
Umuyobozi Mukuru wa REG, Ron Weiss
Umuyobozi Nshingwabikorwa muri Minisiteri y’Ubumwe bw’Abanyarwanda n’Inshingano Mboneragihugu, Anita Kayirangwa
  • Imvaho Nshya
  • Gicurasi 25, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE