Abafungiwe muri gereza zo mu Rwanda bateguriwe integanyanyigisho

Kuri uyu wa 20 Nyakanga 2022, i Kigali habereye umuhango wo kumurika ku mugaragaro integanyanyigisho igenewe gutegurira imfungwa n’abagororwa gusubira mu buzima busanzwe bw’Umuryango Nyarwanda.

Biteganyijwe ko uyu munsi ari bwo Urwego rw’Igihugu rushinzwe Imfungwa n’Abagororwa(RCS), ruza kwemeza iyo Nteganyanyigisho (Curriculum) igiye gushyirwa muri gereza zose zo mu Rwanda kugira ngo ijye yifashishwa mu kugorora no kwigisha abafunzwe bategurirwa kuzasubira mu Muryango Nyarwanda.

Ni integanyanyigisho izafasha RCS mu guharanira ko abazajya basubizwa mu Muryango  Nyarwanda bajya baba  baragororotse, ariko bashobora no kugira umusanzu batanga mu kubaka Igihugu cyabo binyuze mu gukora ibikorwa bijyanye n’ayo masomo bigishirijwe muri gereza.

Iyo nteganyanyigisho, yakozwe ku bufatanye n’Abafatanyabikorwa barimo Umuryango Mpuzamahanga uharanira Amahoro arambye (Interpeace), ndetse n’Ikigo cyo Kwigisha no guteza imbere Amategeko (ILDP).

Iyo nteganyanyigisho nshya igizwe n’amasomo 8 azajya yigishwa mu gihe cy’amazi 6. 

Amasomo ayikubiyemo arimo ajyanye no gukemura amakimbirane (conflict management), ubuzima bwo mu mutwe, gukuza impano y’ibyo umuntu ashoboye gukora no kwihangira imirimo, amasomo ku kibazo cy’ibiyobyabwenge, uburenganzira bwa muntu n’ubumenyi ku mategeko, uburere mboneragihugu n’ikibazo cy’ingengabitekerezo ya Jenoside no gusubira mu muryango amahoro no kwihuza n’umuryango n’abaturanyi.

Mu Rwanda hari abagororwa barengaho gato ibihumbi 80, abagore ni ibihumbi 5,500 bahwanye na 7%, abana babana n’ababyeyi babo muri za gereza bagera kuri 440. 

Abangana na 26.2% bari muri za gereza bafungiye icyaha cya Jenoside n’ingengabitekerezo yayo, abangana na 17.2% bafungiwe ubujura, abafungiye icyaha cy’ibiyobyabwenge bangana na 11.4%, gukubita no gukomeretsa 11.2%,  mu gihe guhohotera abana 10.3%