Abahoze ari Abasirikare basabwe gukora nk’abari ku rugamba

  • Sedar Sagamba
  • Gashyantare 4, 2022
  • Hashize imyaka 2
Image

Perezida wa Komisiyo y’Igihugu yo Gusezerera Abasirikare no Kubasubiza mu Buzima Busanzwe (RDRC), Nyirahabimana Valerie, yasabye abahoze ari abasirikare gukora bagateza imbere imiryango yabo n’Igihugu muri rusange.

Yabigarutseho kuri uyu wa Gatanu tariki 04 Gashyantare 2022 mu Murenge wa Nyarugunga mu Karere ka Kicukiro, mu muhango wo gutanga ibikoresho birimo iby’ubudozi, ubwubatsi n’ubuhinzi ku bahoze ari abasirikare 233 basoje amasomo y’ubumenyingiro.

Ubuyobozi bwa RDRC busobanura ko abahoze ari abasirikare bize imyuga itandukanye, ikiciro cya mbere kirangiza mu 2019 mu gihe ikindi cyarangije mu 2020.

Aba biganjemo abahoze ari abasirikare mu gisirikare cy’u Rwanda RPA cyahindutse RDF, harimo abahoze mu ngabo zatsinzwe (EX-FAR) n’abavuye mu mashyamba ya Repubulika Iharanira Demokarasi ya Congo.

Nyirahabineza yabasabye gukorera igihugu no gukomeza kugikundisha abana babo.

Yasabye gukora cyane. Ati: “Iyo ukora umurimo neza uba uri ku rugamba kandi muzarutsinde. Muzabe inkeragutabara ziharanira gukora”.

Yabibukije ko ibikoresho bahawe ari iby’igihugu kiba cyabahaye by’umwihariko Perezida Paul Kagame. Ati “Icyo tubasaba ni ugukunda u Rwanda no kurwitangira igihe icyo ari cyose”.

Maj Gen Eric Murokore wari uhagarariye inkeragutabara muri uyu muhango, yasabye abarangije amasomo y’ubumenyingiro bahawe ibikoresho kutabipfusha ubusa.

Avuga ko nk’ubuyobozi bw’umutwe w’inkeragutabara bufite inshingano zo gukurikirana abahawe ibikoresho.

Ati: “Aba bagabo n’abagore dufite inshingano zo kubakurikirana no kubagira inama. Muzakore ibyo mwize n’abandi babarebereho kuko igikozwe ni ukubaremamo ubushobozi bwo kwiteza imbere n’imiryango yanyu”.

Yabasabye kandi ko abana babo badakwiye kubwirirwa. Ibi yabikomoje ku mvugo igira iti ‘umwana w’umufundi arabwirirwa ntaburara’.

Uwamahoro Géneviève, Umunyamabanga Nshingwabikorwa w’Umurenge wa Nyarugunga wari uhagarariye ubuyobozi bw’Akarere ka Kicukiro, yabasabye kuzafatanya n’abo basanze kandi ko uzagira ikibazo azegere ubuyobozi.

Yagize ati: “Ibikoresho muhawe bizabafasha mu mibereho yanyu ariko n’uzagira ikibazo azegere umuyobozi kandi muzatubere ijisho”.

Ntawiheba Jean Marie Vianney utuye mu Karere ka Kirehe mu Murenge wa Nyamugari, akaba yaranyuze mu kigo cya Mutobo, avuga ko yahisemo kwiga amasomo y’ubumenyingiro ashingiye ku buhinzi bitewe n’imbagara yari afite.

Ati: “Nahageze mvuye mu kigo gisezerera abahoze ari ingabo i Mutobo. Nyuma yo kujya gutura i Kirehe bantumyeho kujya kwiga imyuga mpitamo kwiga ubuhinzi.

Ibikoresho mpawe bizamfasha kwiteza imbere n’umuryango wanjye ndetse n’Igihugu. Ndashimira ubuyobozi bw’Igihugu budutekerezaho bukanatwitaho butitaye ngo wari mu nyeshyamba”.

Uwimbabazi Martha wo mu Karere ka Nyamasheke mu Ntara y’Iburengerazuba, avuga ko yize ubudozi bityo akaba ashimishijwe n’ibikoresho bigiye kumufasha kwiteza imbere.

Yagize ati: “Amasomo nize ngiye kuyashyira mu bikorwa nkoresheje ibi bikoresho kugira ngo bigire aho bimvana n’aho binjyana”.

Ubuyobozi bwa Komisiyo y’Igihugu yo Gusezerera Abasirikare no Kubasubiza mu Buzima Busanzwe, butangaza ko mu kigo cya Mutobo hari abagera kuri 700 barimo kwiga amasomo y’ubumenyingiro azabafasha kwiteza imbere.

Bimwe mu bikoresho abarangije amasomo bahawe (Foto Kayitare J.Paul)
Maj Gen Murokore Eric yabasabye gufata neza ibikoresho bahawe (Foto Kayitare J.Paul)
  • Sedar Sagamba
  • Gashyantare 4, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE