U Rwanda na Oman byasinyanye amasezerano umunani y’imikoranire

Guverinoma y’u Rwanda n’Ubwami bwa Oman basinyanye amasezerano abiri n’inyandiko esheshatu z’imikoranire mu nzego zitandukanye, zirimo gukuriraho viza ku bafite pasiporo z’abadipolomate, izihariye n’iz’akazi ku mpande zombi, kudasoresha ibicuruzwa inshuro ebyiri, guteza imbere ishoramari n’ibindi.

Ni amasezerano yasinywe kuri uyu wa 8 Nzeri 2026, mu ruzinduko Perezida Kagame ari kugirira muri iki gihugu cyo mu Burasirazuba bwo Hagati. Uru ruzinduko rwatangijwe n’umuhango wo kwakira Perezida Kagame, ukurikirwa n’ibiganiro byihariye yagiranye na Sultan Haitham bin Tariq ndetse n’ibyahuje intumwa z’ibihugu byombi.

Ubutumwa bwashyizwe ku rubuga rwa X rw’Ibiro by’Umukuru w’Igihugu, Village Urugwiro, buvuga ko “abayobozi bombi bashimangiye umubano w’amateka uri hagati y’u Rwanda na Oman, amahirwe uru ruzinduko rutanga yo kubakira kuri uwo musingi, harimo ubufatanye mu nzego zitandukanye zirimo ingufu, ubwikorezi no kwihaza mu biribwa.”

Ni uruzinduko rwatanze umusaruro kuko ibihugu byombi byasinyanye mu nzego zitandukanye zirimo gukuriraho viza ku bafite Pasiporo z’abadipolomate, izihariye n’iz’akazi ku mpande zombi no kudasoresha ibicuruzwa inshuro ebyiri.

Hashyizwe umukono ku masezerano ku bijyanye no gutwara ibintu, guteza imbere ibyambu byo ku butaka n’uruhererekane rwa serivisi, kuzamura urwego rw’ubuhinzi ndetse n’ubutwererane mu by’ubucuruzi no guteza imbere ishoramari.

Aya masezerano yiyongereye ku yandi ibihugu byombi byashyizeho umukono mu 2025 agamije guteza imbere ubufatanye mu itumanaho no guteza imbere ubukungu bushingiye ku ikoranabuhanga.

Ku munsi wa kabiri w’uruzinduko, biteganyijwe ko Perezida Kagame asura Inzu Ndangamurage ya Frankincense (Museum of the Frankincense Land), iri muri Al Baleed Archaeological Park, ahantu hashyizwe ku rutonde rw’Umurage w’Isi rwa UNESCO.

Iyo nzu ndangamurage igizwe n’ibice bibiri by’ingenzi: ‘Heritage Hall’ igaragaza amateka y’ibisigaratongo, umurage w’akarere n’uruhare ubucuruzi bw’imibavu ya ‘frankincense’ bwagize ku mibereho n’ubukungu bw’akarere ka Dhofar. Maritime Hall yo igaragaza amateka ya Oman mu bijyanye n’ingendo n’ubucuruzi bwo mu nyanja.

Perezida Kagame ateganyijwe kandi gusura Urwuri rw’i Bwami (Razat Royal Farm) rufite ubuso burenga hegitari 404. Ni kimwe mu bigo by’ingenzi by’ubuhinzi muri Dhofar Governorate. Hanifashishwa mu bukerarugendo bushingiye ku buhinzi no mu bikorwa by’uburezi.

U Rwanda na Oman bisanzwe bifitanye umubano ushingiye ku mateka, aho ibihugu byombi byatangiye umubano ushingiye kuri dipolomasi mu 1982.