Turangwe n’urukundo nk’urwa Mariya tumwiyambaze kenshi- Mgr Hakizimana

  • Imvaho Nshya
  • Kanama 15, 2023
  • Hashize amezi 10
Image

Musenyeri wa Diyoseze ya Gikongoro Hakizimana Celestin yibukije abantu bitabiriye urugendo nyobokamana i Kibeho, ko bagomba kurangwa n’urukundo nk’urwaranze Mariya Nyina wa Yezu.

Ubwo butumwa bwibanze ku kurangwa n’urukundo, Musenyeri Hakizimana  yabugarutseho mu gitambo cya misa i Kibeho, uyu munsi ku ya 15 Kanama 2023, hizihizwa Asomusiyo cyangwa ijyanwa mu ijuru rya Bikira Mariya.

Yavuze ko Asomusiyo yibutsa ko  Bikira Mariya yajyanywe mu ijuru ibyo bigatanga umukoro ku bakirisitu wo gukora neza, barangwa n’urukundo bakazajya babyibukirwaho.

Ati: “Asomusiyo itwibutsa ko Bikira Mariya yagiye mu ijuru akabaho neza, kubaho neza akaba ari ugukora ugushaka kw’Imana, ntituzapfe ngo abasigaye bishime, ahubwo tubarize kuko bari batwitezeho ibyiza”.

Ubutumwa buboneka mu Ivanjiri ya Luka 1:39-56, aho Mariya yagiye gusura Elizabeth.

Yagize ati: “Icyahagurukije Mariya ni urukundo, duhaguruke tugiye gufasha, dufite urukundo rugamije gusangiza abandi ibyiza Imana yatugabiye. Mariya ni we wabaye umuvugabutumwa wa mbere, yashyiriye Yezu abandi”.

Musenyeri yakomeje agaragaza ko Mariya yicishije bugufi, bityo ko ari byo bikwiye kuranga abakrisitu, bagasiga byose maze bakarangamira Imana.

Mariya yasanze Elisabeth abizi yabibwiwe na Roho w’Imana. Amuzaniye Yezu ngo abana bombi bishimane bamenyane hakiri kare.

Ati: “Mariya yasanze Elisabeth abizi yabibwiwe na Roho w’Imana. Amuzaniye Yezu ngo abana bombi bishimane, bamenyane hakiri kare.

Mariya amenye ko azabyara umwana[… ….], ntiyiremereje. Mariya yarahagurutse agenda yihuta, bishushanya kujya ahitaruye urusaku, iby’Isi n’ibyayo akihererana n’Imana, arazamuka agana Imana n’ibyayo. 

Tumwigireho uriya mwete, umurava ntiyitekerejeho yashyize nzira adaseta ibirenge, atiganyira ajya gufasha imirimo mubyara we Elisabeth wari ukuriwe. Kubonana kwabo bombi byababereye isoko y’umunezero”.

Ikindi, Musenyeri yagaragaje ko n’ubwo haba hari ibigoye, abantu badakwiye gucika intege kuko umuntu yacunguwe.

Ati: ” Agati gateretswe n’Imana ntigahungabanywa n’umuyaga […..] igihe turimo ni icyo gucungurwa. Dushingiye ku munsi wa asansiyo  ari wo Kirisitu yaducunguriyeho, urupfu n’izuka rya Yezu bigaragaza ubuhangange, ubutegetsi n’ububasha by’Imana. urwanya ibyo ni urupfu, Yezu azabitsonyora, abiribate abyohereze i kuzimu”.

 Mu gusoza yibukije ko abakrisitu bagomba kurangwa n’urukundo.

Ati: “Turatumirirwa kugira bene ruriya rukundo rwa Mariya wasanze Kwa zakariya ngo afashe Elizabeth imirimo yo mu rugo, agumayo kugeza igihe abyariye k’amezi 3.

Natwe tugumane na Mariya tubane nawe, tumwiyambaza kenshi tumwiyambaza muri Rozari, mu ishapure y’ububabare,tuzabana nawe mu mvugo no ku bikorwa.

 Twemerere Roho Mutagatifu  atuyobore, twemere ko ibyo atubwira bizaba, dusure abavandimwe bacu tubashyire ibyishimo”.

Yanditswe na NYIRANEZA JUDITH

  • Imvaho Nshya
  • Kanama 15, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE