Pilote Mbabazi yinjiye mu ihuriro ry’abagore batwara indege

Esther Mbabazi uherutse gushyirwa mu rwego rwa ‘Captain’ mu gutwara indege, yinjiye muri ‘Captain’s Club’, icyiciro kigize Ihuriro ry’Abagore batwara Indege ku Isi.

Ihuriro ry’Abagore b’Abapilote ryo muri Leta Zunze Ubumwe za Amerika, ‘International Society of Women Airline Pilots’, ryatangaje ko Esther Mbabazi yagizwe ‘Captain’ ku wa 23 Kamena 2024, kuko ari bwo yakoze urugendo rwa mbere rw’indege ari we uyoboye.

Mu nshingano yahawe nka ‘Captain’, Esther Mbabazi afite ubushobozi bwo gutwara Boeing 737.

Ubusanzwe Mbabazi yari afite ubushobozi bwo gutwara nk’umwungiriza indege zirimo Airbus A330 na Bombardier CRJ900.

Amasomo yo gutwara indege Esther Mbabazi yayigiye muri East African Civil Aviation Academy hagati ya 2008 na 2010, ayakomereza muri Flight Safety International muri Leta Zunze Ubumwe za Amerika hagati ya 2011 na 2011.

Kuva mu 2011 kugeza ubu ni umupilote muri Sosiyete Nyarwanda y’Ubwikorezi bw’Ingendo zo mu Kirere, RwandAir.