Mu Rwanda ½ cy’abarwaye Kanseri ntibabizi-MINISANTE 

  • ZIGAMA THEONESTE
  • Gashyantare 4, 2024
  • Hashize amezi 4
Image

Minisiteri y’Ubuzima (MINISANTE) irakangurira Abanyarwanda kwisuzumisha kanseri hakiri kare kuko  ubushakashatsi bugaragaza ko kimwe cya kabiri cy’abanduye indwara za kanseri zo mu bwoko butandukanye baba batabizi, bikabakurira ibyago birimo n’urupfu.

Ni ibyagarutsweho na Minisitiri w’Ubuzima Dr Nsanzimana Sabin ubwo yatangizaga  ibikorwa ngarukamwa byo kuzirikana  ububi bwa Kanseri, aho abari mu nzego zifite aho zihuriye n’ubuzima baganira ku uburyo indwara ya Kanseri ihagaze basuzuma  mu mibare yaba mu Rwanda na mu mahanga no gushaka ingamba zo guhangana na yo.

Byabaye ku wa Gatandatu tariki ya 3 Gashyantare 2024.

Dr Nsanzimana yavuze ko imbare igaragaza ko abantu barwaye Kanseri mu Rwanda ½ baba batanabizi ko bayirwaye.

Yashimangiye ko uku gutinda kumenyekana  kw’indwara ya Kanseri bigira ingaruka ku buzima bw’uyirwaye harimo no kuba yamukururira urupfu.

Ati: “Bimenyekana bitinze cyangwa indwara iri hafi guhitana ubuzima bw’abantu. Ni ikibazo gikomeye cyane haba mu Rwanda no ku Isi, ni ukwibaza ngo twayikoraho iki tudategereje ko umuntu agera kwa muganga kanseri yarakwiriye umubiri wose?”

Yakomeje agira inama Abanyarwanda  kwirinda Kanseri kuko abantu bashobora kuzirinda ku kigero cya 40% binyuze mu kuyoboka imirire n’imibereho ikwiye, aho usanga Kanseri ziterwa ahanini n’ibyo kurya no kunywa abantu bafata.

Minisitiri Dr Nsanzimana ati: “Nka Kanseri y’inkondo y’umura ubundi ni yo iza imbere mu guhitana abantu; ni kanseri mu minsi iri imbere izagenda icika bitewe n’uko hari urukingo tumaze imyaka icumi duha abana b’abakobwa ndetse n’abakuru bashobora kurufata (ababyeyi) kugira ngo rurinde, ahari virusi ituma iyo kanseri ibaho ari na yo dukingira”.

Kibugu Decuir ni umwe mu Banyarwandakazi bakize Kanseri y’ibere, avuga ko kuyikira byaturutse ku kuba yarafatiranye hakira kare akajya kwisuzumisha bityo abaganga bamukurikirana itarakomera.

Avuga yabimenye umuvandimwe we imaze kumuhitana .

Ati: “Njye ndabivuga buri munsi, abantu bakwiye kumenya kwikunda, kwimenya bakisuzumisha. Njyewe namenye indwara hakiri kare ndivuza  indwara barayivura irakira.”

Kugeza ubu mu Rwanda, Minisiteri y’Ubuzima itangaza ko Kanseri zikunze kugaragara kenshi ari iy’inkondo y’umura n’iy’ibere zibasira abagore n’abakobwa cyane. 

Iyo Minisiteri ihamya ko 95% by’abana bahawe urukingo rwa Kanseri y’inkondo y’umura bibarinda ibyago byo kuyandura.

Minisiteri y’Ubuzima ivuga ko abakuze urukingo rutaraza barimo kuyirwara muri iki gihe, aho hafashwe ingamba zo kubasuzuma hakiri kare.

Ikigo cy’Igihugu cy’Ubuzima (RBC) gitangaza ko mu Rwanda habarurwa abantu 8,835 banduye kanseri zitandukanye, mu gihe abahitanwa na yo buri mwaka basaga 7500 nk’uko ubushakashatsi bwa 2018 bwabigaragaje.

Kanseri ni ikibazo gihangayikishije Isi kuko usanga imibare y’abayikira ikiri hasi by’umwihariko mu bihugu biri mu nzira y’amajyambere n’u Rwanda rurirmo.

Indwara ya Kanseri yibasira ababarirwa muri miliyoni z’abatuye Isi, ikaba ari iya kabiri mu guhitana abantu benshi ku Isi aho mu mwaka wa 2020 abisuzumishije bagasangwamo iyo ndwara ari miliyoni 19.3.

  • ZIGAMA THEONESTE
  • Gashyantare 4, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE