Abiga mu Ishuri Rikuru rya gisirikare basobanuriwe ibya Dipolomasi

Itsinda rigizwe n’Abanyeshuri n’abarimu bo mu Ishuri Rikuru rya Gisirikare ry’u Rwanda (National Defence College-Rwanda) basuye Minisiteri y’Ububanyi n’Amahanga n’Ubutwererane (MINAFFET).MINADEF itangaza ko ari uruzinduko rugamije kurushaho gusobanurira abo banyeshuri ibijyanye na politiki y’u Rwanda mu by’ububanyi n’amahanga, imikorere ya dipolomasi, umubano mpuzamahanga n’ubufatanye hagati y’ibihugu.

Iryo tsinda ryahawe ikiganiro kirambuye na Abel Buhungu, uhagarariye u Rwanda mu bya dipolomasi muri Repubulika ya Sudani, wari uhagarariye Minisiteri.

Muri icyo kiganiro, hasobanuwe politiki y’u Rwanda mu by’ububanyi n’amahanga, ibyihutirwa mu bikorwa bya dipolomasi n’uruhare rwabyo mu guteza imbere umutekano w’Igihugu, gushimangira umubano w’ibihugu n’ubufatanye mu rwego mpuzamahanga, guteza imbere no kurengera inyungu z’u Rwanda.

Umuyobozi w’Ishuri Rikuru rya Gisirikare ry’u Rwanda, Brig Gen (Rtd) Didace Ndahiro, yavuze ko urwo ruzinduko ari ingenzi kuko rwunganira amasomo y’inyigisho abanyeshuri bahawe ku mubano mpuzamahanga na politiki y’ububanyi n’amahanga.

Yagaragaje ko uru ruzinduko rwahaye abanyeshuri amahirwe yo kumenya mu buryo bufatika uko politiki y’ububanyi n’amahanga ishyirwa mu bikorwa, imbogamizi ku bayishyira mu bikorwa, ndetse n’uruhare rwa dipolomasi mu kurinda umutekano w’Igihugu n’uw’amahanga.

Muri urwo ruzinduko, iryo tsinda ryanasuye Ambasade ya Repubulika ya Nigeria n’Ambasade ya Repubulika y’Abarabu ya Misiri mu Rwanda.

Uruzinduko rwafashije abanyeshuri n’abarimu kurushaho gusobanukirwa imikorere ya dipolomasi, imikoranire hagati y’ibihugu n’akamaro k’ubufatanye mpuzamahanga mu guteza imbere inyungu z’ibihugu n’umutekano muri rusange.