MINUBUMWE yagaragaje uko ubumwe bw’Abanyarwanda buhagaze n’ikibubangamira

  • Imvaho Nshya
  • Kanama 11, 2023
  • Hashize amezi 10
Image

Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) yatangaje ko ubumwe bw’Abanyarwanda bwifashe neza kandi ko bugeze ku kigero cyiza cyane.

Minisitiri Dr Bizimana Jean Damascène yavuze ko ubumwe bw’Abanyarwanda butaragera ku 100%.

Avuga ko hari abantu birengagiza amateka u Rwanda rwanyuzemo ibyo bikaba bibangamiye ubumwe bw’Abanyarwanda.

U Rwanda rwamaze imyaka isaga 700 igihugu gikomeye, kiri mu mahoro, cyiyubaka, cyaguka ariko ngo kigira imyaka iri hafi 35 mibi cyane.

Dr Bizimana agaragaza ko kuva mu 1956 hatangiye politiki y’ivangura, yimika urwango, politiki yimika ubwicanyi bigeza ku ndunduro haba Jenoside yakorewe Abatutsi mu 1994.

Politiki yateye iyo Jenoside yamaze imyaka isaga 30, yasize ibikomere kandi hari bamwe bakibona muri iyo politiki. 

Yagize ati “Hari bamwe batarayireka, haba mu myemerere yabo no mu mikorere yabo. 

Abo batarayireka hari abari mu gihugu ariko hari n’abari mu mahanga bakomeza kwanduza abari mu gihugu bitewe n’uko ikoranabuhanga ryoroshye”.

Avuga ko iyi ari imbogamizi yo kumva ko politiki ya CDR, iya Hutu Pawa, iya MRND, politiki ya Parmehutu ko hari ibyiza byazirangaga kandi mu by’ukuri ngo nta na kimwe.

Ikindi kibangamiye ubumwe bw’Abanyarwanda ni ingengabitekerezo ya Jenoside kugira ngo bushobore kugerwaho ku gipimo gishimishije 100%.

Agira ati “Ingengabitekerezo ya Jenoside irangwa cyane cyane no kugoreka nkana amateka ya Jenoside yakorewe Abatutsi uko yagenze.

Iyo ugoretse amateka ntabwo ushobora kubaka igihugu kuko ibyaranze amateka ntibisibangana bikomeza kuba uko biri”.

Jenoside yakorewe Abatutsi ni ihame ridashobora kwirengagizwa uko biri kose ariko ngo hari abigiza nkana, yaba ari abayigizemo uruhare, cyangwa bamwe mu nshuti zabo ndetse n’ababakomokaho.

Hari abandi mu Rwanda batemera ko uruhare rw’abo mu miryango yabo ruvugwa kandi kuterekana amateka, kuterekana ukuri kw’amateka ntabwo bishobora kubaka ubumwe kuko ubumwe bwubakirwa ku kuri.

Ati “Ibyo hari ababyibagirwa bagashaka kuvuga ngo mwibagirwe, mwibivuga, mwigaragaza uko amateka yagenze hanyuma dukomeze iterambere.

Twirengagije icyo ngicyo, rya terambere tumaze kugeraho rishobora kongera gusenywa na ba bandi bagifite ibitekerezo bibi nubwo ari bakeya”.

MINUBUMWE igaragaza ko ari ngombwa kumenya aho igihugu cyavuye, amateka akigishwa akamenyekana.

Hazakomeza gusobanurwa itegeko rihana ingengabitekerezo ya Jenoside n’ibyaha bifitanye isano na yo ariko ngo no gukurikirana mu butabera abakoze ibyo byaha.

Minisitiri Dr Bizimana ahamya ko ubumwe bw’Abanyarwanda bukomeye ku buryo kubutesha agaciro atari ikintu cyoroshye.

Ubumwe ni ihame ntakuka, ni ihame rishimangira Itegeko Nshinga mu mahame remezo. 

Mu cyerekezo cya Guverinoma cy’imyaka 7, Perezida Kagame yatangiye kuva mu 2017 – 2024, kubaka ubumwe bw’Abanyarwanda biza ku isonga.

Yanditswe na KAYITARE JEAN PAUL

  • Imvaho Nshya
  • Kanama 11, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE