Miliyari 10 Frw zinjijwe n’ubukerarugendo zafashije imishinga 1000 y’abaturiye Pariki

  • Imvaho Nshya
  • Kanama 11, 2023
  • Hashize amezi 10
Image

Kuva gahunda yo gusaranganya inyungu iva mu bukerarugendo mu baturiye Pariki, amafaranga y’u Rwanda asaga miliyari 10 amaze kwifashishwa mu mishinga y’iterambere ry’abaturiye Pariki. 

Ubuyobozi bw’Urwego rushinzwe Iterambere mu Rwanda (RDB) buvuga ko gahunda yo gusaranganya inyungu z’ubukerarugendo mu baturiye Pariki zitandukanye yatangiye mu mwaka wa 2005, aho abaturage basubizwa 10% by’amadovize yinjijwe. 

Bivugwa ko izo miliyari 10 Frw zimaze gushorwa mu mishinga irenga 1000 y’iterambere ry’abaturage baturiye Pariki y’Igihugu y’Akagera, Pariki y’Igihugu ya Nyungwe, Pariki y’Igihugu y’Ibirunga na Pariki y’Igihugu ya Gishwati- Mukura. 

Umuyobozi Mukuru wa RDB Clare Akamanzi, yavuze ko muri uyu mwaka wa 2023 biteguye gutangiza imishinga mishya ari yo kwegereza inzu ababyeyi baruhukiramo (maternité) no gutanga imbuto z’indobanure ku baturage bo mu Murenge wa Muganza, Akarere ka Nyaruguru mu Ntara y’Amajyepfo.   

Nanone kandi biteganyijwe ko RDB ifatanyije na Kaminuza Nyafuria yigisha Ubuyobozi bizategura Inama y’Ubucuruzi mu kubungabunga urusobe rw’ibinyabuzima y’uyu mwaka, izaba ku ya 29-31 Kanama 2023. 

Ibyo bikorwa kimwe n’amarushanwa yiswe Rhino Race muri Pariki y’Igihugu y’Akagera, ingendo zimenyereza ba mukerarugendo n’abanyamakuru, hamwe n’igitaramo cyo kwita Izina bizaba nka bimwe mu bigize Umuhango wo Kwita Izina abana b’ingagi 23.

Umuhango wo Kwita Izina ku nshuro ya 19 uzaba tariki 1 Nzeri 2023 mu Kinigi mu Karere ka Musanze, aho RDB itangaza ko muri uyu mwaka, abana b’ingagi 23 ari bo bazitwa amazina.

Buri muhango wo Kwita Izina abana b’ingagi uba ufite umwihariko cyane cyane mu kwakira abashyitsi no kugaragaza isura ya nyayo y’ubukerarugendo mu Rwanda.

Umwaka ushize wa 2022, abana b’ingagi biswe amazina bari 24, umuhango wabaye ku itariki ya 2 Nzeri. 

Ku nshuro ya 17 hiswe abana b’ingagi 24 ku itariki 24 Nzeri 2021, bihuzwa no kwizihiza umunsi mpuzamahanga wo kubungabunga ingagi. Nk’uko byagenze umwaka wawubanjirije, uwo muhango wakozwe mu buryo bw’ikoranabuhanga hirindwa ikwirakwira ry’icyorezo cya COVID-19.

Ku nshuro ya 16 hiswe abana 24  ku itariki ya 4 Nzeri 2020, bikorwa mu buryo bw’ikoranabuhanga bitewe n’icyorezo cya COVID-19. Ku nshuro ya 15 hiswe abana 25 ku itariki ya 6 Nzeri 2019. 

RDB itangaza ko kuva iki gikorwa cyatangira muri 2005, abana b’ingagi 374 ari bo bamaze guhabwa amazina.

Ku munsi wo kwita izina hasobanurwa imbaraga u Rwanda rukoresha mu kwita ku ngagi zo mu misozi miremire, hakagarukwa ku buzima bwazo n’ibindi. 

Hanagaragazwa akamaro bifitiye igihugu muri rusange n’abaturage bahaturiye kuko bagezwaho ibikorwa bivuye mu mafaranga yijijwe n’ubukerarugendo.

  • Imvaho Nshya
  • Kanama 11, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE