Menya amabonekerwa yatumye Kibeho imenyekana ku Isi

  • NTAWITONDA JEAN CLAUDE
  • Kanama 15, 2023
  • Hashize amezi 9
Image

Ku itariki ya 15 Kanama, hizihizwa Ijyanwa mu ijuru rya Bikira Mariya, by’umwihariko mu Rwanda, haba hari ibirori  i Kibeho ku musozi wa Nyarushishi, mu Murenge wa Kibeho, Akarere ka Nyaruguru mu Ntara y’Amajyepfo, ahabereye amabonekerwa ya Bikira Mariya ku bakobwa batatu bigaga mu Rwunge rw’amashuri Mère du Verbe i Kibeho, ari  bo Alphonsine Mumureke, Anathalie Mukamazimpaka,  na Marie Claire Mukangango.

Mumureke Alphonsine

Hari ku itariki ya 28 Ugushyingo 1981, ubwo mu ishuri ryisumbuye ry’abakobwa ry’i Kibeho mu masaha ya nyuma ya saa sita habaye ibitangaza, aho umukobwa wo mu kigero cy’imyaka 16 yabonekewe na Bikira Mariya.

Mumureke Alphonsine yagiye kumva yumva ijwi rito rimuhamagara rigira riti “Mwana wanjye”, nawe ntiyazuyaza ahita arikurikirana mu kirongozi cy’inzu, ni ko kubona umugore ufite ubwiza budasanzwe imbere ye.

Mu myambaro yera, n’umwenda w’ubururu yari yitwikirije mu mutwe, Alphonse yamubajije n’ubwoba bwinshi ati “Uri nde?”, uwo mugore yamusubije ko ari Nyina wa Jambo, muri ako kanya Alphonsine yahise asa n’ufashwe n’imbaraga zidasanzwe, yitegereza uwo mugore yibaza uko yageze aho.

Uwo mubyeyi yongeye kumubaza ati “Ni nde ukunda kurusha abandi ?”, Alphonsine ngo yamushubije vuba cyane dore ko yanavukaga mu muryango w’Abakirisitu ati” Nkunda Imana na Bikira Mariya”,

Bikira Mariya yashimishijwe n’icyo gisubizo ni ko kumubwira ko azanywe no kumukomeza, ko yumvise amasengesho ye, ati “Ndifuza ko inshuti zawe zikomera mu kwemera”.

Uwo mubyeyi ngo yazamutse ajya hejuru ari nako arembera, Alphonsine nawe akomeza gusenga, ayo mabonekerwa akaba yarabaye mu gihe cy’iminota nka 15.

Icyatangaje abari aho ni ukuntu Alphonsine yari yemye, yewe banagerageje kumuvugisha no kumunyeganyeza ntibyakunda, bigaragara ko yari afite imbaraga zidasanzwe.

Bamwe baketse byinshi birimo n’amarozi, dore ko ngo kubera ko yanakomokaga i Kibungo, bamwe baketse ko ari amarozi yakundaga kuhavugwa.

Ku nshuro ya kabiri, ubwo yari mu cyumba abanyeshuri bararagamo, Bikira Mariya yongeye kumubonekera noneho afite ibara ridasanzwe, ndetse buri wa Gatandatu ayo mabonekerwa akajya akomeza kumubaho.

Gusa, muri icyo gihe cyose ngo uwo mwana yahuye n’ibigeragezo bikomeye mu bandi bana, bamwe bavugaga ko yasaze ariko abandi bakumva ari ibitangaza byanageze n’aho abandi bana basenga bagiye bamuzanira amashapure ngo ayahe uwo mubyeyi ayabahere umugisha.

Mukamazimpaka Anathalie

Ntibyatinze, Bikira Mariya aba abonekeye undi w’imyaka 21, wagaragaragaho imyitwarire idasanzwe kuko we yikundiraga amaraha, ndetse ntakozwe ibyo gusenga, dore ko ari mu ba mbere banabereye ikigeragezo Alphonsine.

Nathalie nawe yagiye kumva yumva ijwi rimuhamagara riti “Nathalie mwana wanjye” Nawe aramwikiriza, ni ko kongera kumuvugisha amuha ubutumwa bukurikira:

Ati “Nimusenge cyane kuko Isi ari mbi , mukunde ibyo mu ijuru kuko iby’Isi bishira vuba. Mwitonde kandi murangwe n’urukundo, kwitanga no kwiyoroshya kandi mugarukire Imana”.

Ayo magambo yamuteye ubwoba, ariko yayafashe nk’ubutumwa bukomeye bwanahise bumuhindura, abari bamuzi mbere batangazwa cyane n’ibyamubayeho.

Mukangango Marie Claire

Mu mabonekerwa 15 yahuye nayo kugeza mu kwezi k’Ukuboza 1982, Marie Claire Mukangango nawe yagiye ahabwa ubutumwa bwo kwamamaza ishapure y’ububabare.

Uwo mubyeyi yanamuhishuriye byinshi birimo ko Isi igenda imera nabi cyane, amubwira ko abantu bakwiriye guhinduka no gusenga cyane.

Ayo mabonekerwa afatwa nk’aya mbere akomeye yabaye muri aka gace k’Ibiyaga Bigari akaba yarabaye mu 1981, kandi yagize impinduka nziza ku Bakirisitu ba Kiliziya Gatolika, ndetse n’Abanyarwanda muri rusange, dore ko byanatumye i Kibeho haba ahantu hakomeye ndetse n’Akarere ka Nyaruguru karamenyekana ku Isi hose.

 Kibeho kuba ari ku Butaka Butagatifu byanatumye hakorerwa ubukerarugendo nyobokamana.

Yanditswe na NYIRANEZA JUDITH

  • NTAWITONDA JEAN CLAUDE
  • Kanama 15, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE