Kwigisha abakobwa ikoranabuhanga ni ukuziba icyuho cy’abiga siyansi- MIGEPROF

  • Imvaho Nshya
  • Ugushyingo 3, 2023
  • Hashize amezi 4
Image

Minisiteri y’Uburinganire n’Iterambere ry’Umuryango ihamya ko uko abanyeshuri b’abakobwa barushaho kwigishwa ikoranabuhanga bizakemura ikibazo cy’icyuho cy’ubuke bw’abiga siyansi, bikazasubiza ibibazo bya sosiyete.

Byagarutsweho kuri uyu wa Gatanu tariki ya 3 Ugushyingo 2023, mu Karere ka Rulindo mu ishuri rikuru rya IPRC Tumba, mu gikorwa cyo gusoza amahugurwa y’ibyumweru 2 yahawe abakobwa 50, muri gahunda yo guhugura abakobwa bo muri Afurika biga siyansi batsinze neza ibizamini bya Leta yiswe African Girls Can Code Initiative.

Mu Rwanda abahuguwe muri icyo cyiciro ni abatsinze neza amasomo ya siyansi kurusha abandi mu bizamini bya Leta by’umwaka ushize, bahabwa amasomo yo kuziga amashami atandukanye muri kaminuza arimo ubuvuzi, ikoranabuhanga, ubukungu n’ibindi bahuguwe ku buryo bwo kubyaza ikoranabuhanga ibisubizo by’ibibazo biri muri sosiyete no kubafasha mu masomo baziga muri Kaminuza.

Umunyamabanga Uhoraho muri Minisiteri y’Uburinganire n’Iterambere ry’Umuryango (MIGEPROF) Batamuriza Mireille yagaragaje ko guteza imbere imyigishirize y’ikoranabuhanga mu mashuri by’umwihariko ku bakobwa ngo bizaziba icyuho kikiri mu bakobwa batinya kwiga siyansi.

Ati: “Kuri ubu hari ababobwa bari ku kigero cya 47,7% bari mu siyansi ubwo rero iyo turenze kuri siyansi tubona abana biga ikoranabuhanga rya Coding, bizazamuka n’ubwo barenza tukanagira 50% kuko ubu tubona ko abakobwa barimo kujya muri siyansi zikomeye nk’imibare, ubugenge. Ubundi wasangaga abenshi biyigira ibinyabuzima ariko ubu turabona umubare ugenda wiyongera ku biga siyansi itavanze(pure).

Yongeyeho ko ayo mahugurwa azatanga umusanzu mu kububakira ubushobozi ndetse n’ubumenyi bakava ku gutekereza ko mudasobwa ari iyo gukoreraho ibintu byorohereje, ahubwo ko yakwifashishwa mu gukemura ibibazo byugarije sosiyete nyarwanda.

Ati: ”Bareke gutekereza ko mudasobwa ari iyo kureberaho filimi gusa…. Dufite abana muri Kaminuza bize amasiyansi, uyu munsi noneho bakaba bongereye ubumenyi mu gukoresha ikoranabuhanga.  Nk’uko mwabyumvise hari abiga icungamari cyangwa ubucuruzi, ibi iyo ubihuje n’ikoranabuhanga bitanga igisubizo mu buzima, mu bucuruzi bwambukiranya ibihugu n’ibindi, ni ibikorwa dushyigikiye”.

Yongeyeho ati: “Kandi birahuza na gahunda dufite nk’igihugu yo gukoresha ikoranabuhanga ntawe usigaye ariko by’umwihariko gusubiza ibibazo bihari, ni gute noneho twakoresha ikoranabuhanga mu bijyanye no kuhira, ni gute ikoranabuhanga ryafasha kwihutisha serivisi z’ubuvuzi,mu bucuruzi bwambukiranya imipaka ibyo ni byo dutekereza ko bizazana ibisubizo nibarangiza aya masomo barimo.”

Bizimungu Sangwa Natasha umwe mu bakobwa bahuguwe avuga ko mbere yumvaga ko mudasobwa ari iyo gukoresha ibintu byoroheje nko kwandika ibaruwa n’ibindi, ariko aya mahugurwa yamwunguye ubumenyi buhambaye.

Ati: ”Ntaraza hano narinzi ko robo ikoreshwa n’abantu bafite ubumenyi buhambaye, ubu namenye kuyikoresha kandi namenye ko abagore tukiri hasi mu gukoresha ikoranabuhanga mbona natwe dushobora kurikoresha kandi tukarishobora.

Ubusanzwe benshi bumva ko gukoresha mudosobwa ari ukwandika amaburawa, ikinyamakuru,urugero twaje kubona ko hari ikibazo ko ibihe birimo bihunduka tubona abahinzi bahomba, twagize igitekerezo cyo gukora robo  ivoma amazi iyakuye kure hanyuma ikaba yayazana hafi igafasha nko mu kuhira, ibi numvaga ari ibikorwa by’abantu bafite ubwenge buhanitse ariko si ko bimeze”.

Muhoza Denise we avuga ko yahigiye gukoresha robo zikoresha ikoranabuhanga ryifashishwa mu butabera.

Ati: ”Ikintu namenye ni ukumenya gukora uburyo bwo gufasha abantu mu nzego z’ubucamanza, gukora robo ishobora kumenya umuntu niba abeshya cyangwa atabeshya, iyi ishobora kwifashishwa mu nzego z’umutekano n’izubugenzacyaha ku buryo byagabanya abantu bari muri za gereza barengana”.

Rose Baguma, Umuyobozi ushinzwe Politiki y’Uburezi n’Isesengura muri Ministeri y’Uburezi avuga ko aba bana b’abakobwa bitezweho gutanga umusaruro mu gukemura ibibazo bimwe mu nzego zitandukanye z’ubuzima bw’Abanyarwanda.

Yagize ati: “Abatoranyije ni abakobwa babiri muri buri Karere batsinze neza amasomo ya siyansi mu bizamini bya Leta byo mu mwaka ushize, muri iki cyiciro cya kabiri kigiye kuza, muri uyu mwaka dutekereje ko abazatsinda ibizamini bya Leta tuzareba abatsinze n’ubundi na bo bahabwe ubwo bumenyi bahabwe na za mudasobwa atari uguhabwa ubumenyi gusa ahubwo kudufasha kwigisha n’abandi”.

Minisiteri y’uburezi ivuga ko nyuma yo kwigisha aba banyeshuri ikoranabuhanga, bagiye kurikoresha mu buzima busanzwe, nko mu gukemura ibibazo mu nzego z’ubuhinzi, ubutabera n’ibindi no kubyigisha bagenzi babo.

Gahunda yiswe African Girls Can Code Initiative yatangiye mu mwaka wa 2018 yigishwa muri Afurika yose, aho aba bakobwa bigishwa uko babyaza ikoranabuhanga rya mudasobwa gukemura ibibazo biri muri sosiyete.

Ni amahugurwa (African Girls Can Code Initiative) yateguwe na Ministeri y’Uburezi, Ishami ry’Umuryango w’Abibumbye ryita ku Burezi, Ubumenyi n’Umuco (UNESCO) n’Umuryango w’Afurika yunze Ubumwe.

Mu Rwanda yatangiye   mu kwezi kwa karindwi uyu mwaka,yagenewe abakobwa bafite kuva  ku myaka 17 kugeza kuri  25, biteganyijwe ko muri Afurika hazigishwa abanyeshuri b’abakobwa bize siyansi 2000.

Imibare ya Minisiteri y’Uburezi igaragaza ko mu mwaka w’amashuri 2021/2022 abahungu bigaga siyansi bari 52.3% mu gihe abakobwa bari ku ijanisha rya 47.7%

ZIGAMA THEONESTE

  • Imvaho Nshya
  • Ugushyingo 3, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE