IBUKA itewe inkeke na IRMCT yasubitse urubanza rwa Kabuga Felicien

  • Imvaho Nshya
  • Kanama 11, 2023
  • Hashize amezi 10
Image

Umuryango Uharanira inyungu z’Abacitse ku icumu rya Jenoside yakorewe Abatutsi (IBUKA) watangaje ko utewe inkeke n’imyanzuro y’Urukiko rw’Ubujurire rw’Urwego Mpuzamahanga rwashyiriweho Imanza z’Insigarira z’Inkiko (IRMCT).

Urukiko rw’Ubujurire rwa IRMCT rwategetse ko urubanza ruregwamo Kabuga Félicien ku byaha bya Jenoside yakorewe Abatutsi ruhagarikwa igihe kitazwi.

Kabuga afatwa nk’umuterankunga ukomeye wa Jenoside ndetse abayirokotse bumvaga ko agiye gushyikirizwa ubutabera akaryozwa ibyo yakoze.

IBUKA yibutsa ko Akanama ka Loni gashinzwe umutekano kashyizeho ICTR/IRMCT mu rwego rwo gutanga umusanzu muri gahunda z’ubumwe n’ubwiyunge ndetse no kugarura amahoro mu Rwanda.

Itangaza ko imyanzuro ya IRMCT ari ugutsindwa k’Umuryango Mpuzamahanga hejuru y’Abatutsi basaga miliyoni bishwe mu 1994.

Dr Gakwenzire Philbert, Perezida wa IBUKA (Foto Internet)

Umuryango IBUKA usaba abarokotse gukomeza gukoresha ubushake bwa politiki, amategeko, dipolomasi n’uburyo bwo kubona ubutabera kugira ngo abarokotse bashobore kubona uburenganzira bw’ibanze mu butabera.

Ibi ngo bigaragaza inyungu z’umuryango mpuzamahanga mu gucira imanza abajenosideri.

IBUKA ihamagarira IRMCT n’Umuryango mpuzamahanga ko gusubika kuburanisha Kabuga ari ukudaha agaciro imiryango y’abarokotse Jenoside  kandi bakabaye bahabwa ubutabera.

Uyu muryango uhamya ko gushyira mu bikorwa ibirebana n’amategeko mu rubanza rwa Kabuga bitoroshye mu gihe harebwa no ku miterere y’ubuzima bwa Kabuga, ariko ngo Umuryango Mpuzamahanga ukwiye kuzirikana ko gusubika by’agateganyo iburanisha bidakuraho gahunda yo gukurikirana ubutabera ku byaha ndengakamere byakozwe muri Jenoside yakorewe Abatutsi.

IBUKA yemera ko ukurikiranyweho ibyaha bya Jenoside agira ubuzima n’imibereho byiza, cyane ko bijyanye n’izabukuru. Ariko ngo ubutabera ntibukwiye kwirengagizwa cyangwa ngo butinzwe maze abarenganye bagakomeza kurengana.

Uti: “Nubwo bimeze bityo ntihitawe nkana ku buhamya bw’abarokotse bategereje urubanza rwa Kabuga rumaze hafi imyaka 30 bityo ko kurutinza byatumye hatabaho ubutabera”.

Uti “Ibi ni uburyo bwo kwirinda ko hakongera kubaho Jenoside ku Isi ndetse ni uko hafatwa ibyemezo bimwe nk’ibya IRMCT iherutse gufata”.

Yanditswe na KAYITARE JEAN PAUL

  • Imvaho Nshya
  • Kanama 11, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE