Ibitaro bya Nyabikenke bahawe na Perezida Kagame byakira abarwayi 35 ku munsi

  • AKIMANA JEAN DE DIEU
  • Ugushyingo 23, 2023
  • Hashize amezi 3
Image

Abagana Ibitaro by’Akarere ka Muhanga bya Nyabinkenke biherereye mu Murenge wa Kiyumba, Akarere ka Muhanga, baravuga ko batabonera serivisi ku gihe kubera ubuke bw’abaganga, bagahitamo kujya kuzishakira i Ruli mu Karere ka Gakenke bambutse Nyabarongo.

Bamwe mu bavuganye na Imvaho Nshya, bavuga ko hari serivisi zikenerwa n’abarwayi batahabona bikabagiraho ingaruka, zo kuba barembera mu rugo kandi Perezida wa Repubulika Paul Kagame yarabahaye Ibitaro bigezweho ngo bibakure mu bwigunge.

Munyankindi Jean de Dieu avuga ko bibabaje kuba batavurwa kubera ko nta baganga baraboneka, bikaba bituma bakora ingendo zishyira ubuzima bwabo mu kaga igihe bambuka uruzi rwa Nyabarongo.

Yagize ati: “Turababaye kuko Umukuru w’Igihugu yaduhaye ibi bitaro kugira ngo bitugabanyirize ingendo twari dusanzwe dukora binaduhe serivisi iwacu, ariko twabuze abaganga bo kutuvura duhitamo kongera kwambuka Nyabarongo tukajya i Ruli muri Gakenke,  cyangwa tukajya kwivuriza i Shyira mu Karere ka Nyabihu”.

Uwimana Mediatrice avuga ko yagiye kwivuza mu byumweru 2, bishize agataha batamuvuye bamubwira ko muganga wagombaga kumuvura ntawuhari. Gusa ngo yabwiwe ko yazajya i Kabgayi cyangwa i Ruli kuko abaganga bose bazanywe bigendeye kubera imiterere yaho.

Yagize ati: “Mu byumweru bibiri bishize nagiye kwivuza ntaha ntavuwe barambwira ngo umuganga wamvura ntabwo ahari ndetse bangira inama ko najya kwivuriza ahandi harimo Ibitaro bya Kabgayi cyangwa nkajya ku bindi bitaro birimo ibya Shyira cyangwa i Ruli, gusa hari inshuti mpagira ku bitaro yambwiye ko nta muganga uhamara igihe bose bahita bigendera ntawuhakora kabiri.”

Umuyobozi Mukuru w’Ibitaro bya Nyabikenke Dr. Nkikabahizi Fulgence, avuga ko kuva ibyo bitaro byatangira gukora mu mwaka wa 2022 bidashobora kurenza barwayi 35 ku munsi, bavurwa n’abaganga bane bari ku rwego rw’Abadogiteri.

Yagize ati: “Ni byo dufite abaganga bake bari ku rwego rw’Abadogiteri bavura, ariko nibura twakira abarwayi bari hagati ya 30-35 ku munsi bakavurwa bagataha, gusa turacyari bake cyane kandi hanakora serivisi 3 zonyine.”

Akomeza avuga ko mu ntangiriro z’ukwezi k’Ukuboza 2023 hari izindi serivisi zigomba gutangira kuko ibikoresho byose bihari, akemeza ko n’abajyaga ahandi bazajya babagana.

Yongeraho ko hari serivisi z’umwihariko bashobora kuzahabwa zatuma bagira umubare mwinshi w’abarwayi ubagana.

Dr Nkikabahizi yemeza kandi ko nibamara  gufungura serivisi zo kubyaza no kubaga guhera mu ntangiriro z’Ukuboza 2023, bazaba bafite abaganga bagera ku 10 bakora nk’Abadogiteri bitewe n’uko hari abo bagiye guhabwa, harimo 3 bazaba bashinze gutera ikinya abagiye kubagwa.

Abaganga batahamara kabiri banenga umushahara utajyanye n’imiterere yaho

Bamwe mu baganga bahoherezwa bavuga ko banenga umushahara bahembwa kuko batabona aho bakora ibiraka  ndetse n’uburyo bwo kuhagera bukaba butoroshye kubera imihanda idakoze.

Umwe mu baganga utashatse kuvuga izina rye avuga ko bigoye gukorera kuri ibi bitaro bigaragara ko byitaruye cyane, kandi n’umushahara w’intica ntikize udashobora gufasha umukozi kugira ubuzima bwiza.

Yagize ati: “Niba ntibeshye hasigaye abaganga batagera kuri 3 kuko ntabwo byadushobokera ko tuhakorera, n’umushahara duhembwa ni muke kandi hariya ntiwabona aho utera ikiraka nibura cyazamura ibyo winjiza, bigatuma n’abahaweyo akazi bagata kubera hatagendeka kubera imihanda mibi ihari itoroshya imigendereranire”.

Undi nawe yavuze ko bitewe n’imiterere yaha hantu nta mukozi wifuza kujyayo hari umuhanda utari Nyabagendwa kuko nta modoka wahabona ndetse nta shuri rigezweho abana babo bakwigamo mu gihe baba bafashe icyemezo cyo kuhimukira bakahatura.

Dr Nkikabahizi na we yemeza ko umwihariko w’ahantu ibitaro byubatse hatorohera abaganga kuhagera bitewe n’umuhanda utaratunganywa neza, no kuba nta modoka zihari zitwara abagenzi.

Yemeza ko kuhagera umuntu akoresha amafaranga y’u Rwanda ari hagati ya 5000 na 6000 ateze moto imukura ahandi hantu gagendeka hose.

Mu mwaka wa 2003 ni bwo Perezida Kagame yemereye abaturage b’I Nyabikenke ibyo bitaro byatangiye kubakwa mu mwaka wa 2013, ariko biza guhindurirwa igishushyanyo ku buryo byadindiye ariko bikarangira byuzuye mu mwaka wa 2021.

Ibi bitaro byubakwa byagombaga guha serivisi abaturage bagera ku 121 000, bikaba byarateganyijwemo icyumba cy’ikoranabuhanga kizajya cyifashishwa n’abaganga b’inzobere bari mu mahanga bagasuzuma kandi bakavura umurwayi bari mu bindi bihugu.

  • AKIMANA JEAN DE DIEU
  • Ugushyingo 23, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE