Amajyepfo: Inganda nshya 11 zitezweho gutanga akazi

  • Imvaho Nshya
  • Kanama 11, 2023
  • Hashize amezi 10
Image

Intara y’Amajyepfo igaragaza ko mu ngengo y’imari y’umwaka wa 2022/2023 yashoboye kubaka inganda nshya 11 zitezweho gutanga imirimo ku baturage no guha abaturage batandukanye ku byo zikora bashobora gukenera mu buzima bwabo bwa buri munsi.

Zimwe muri izo nganda zongerera agaciro ibiribwa birimo inyama, izindi zikora imyenda, izitunganya icyayi, izikora akawunga n’izindi zitezweho kuzaha akazi abaturage bakabasha kwiteza imbere.

Guverineri w’Intara y’Amajyepfo yagize ati: “Hahanzwe inganda 11 zikora  mu Ntara y’Amajyepfo muri uyu mwaka ushize w’ingengo y’imari, harimo ebyiri mu Karere ka Muhanga, ebyiri Gisagara, eshatu  Huye by’umwihariko uruganda rw’ibishyimbo rwahawe abashoramari rwongeye gukora, muri Nyanza hari uruganda rw’imyenda rushya, muri Nyaruguru harimo kubakwa uruganda rw’icyayi, muri Nyamagabe uruganda rw’ingano rwari rwarahagaze rwongeye gukora neza, mu Karere ka Kamonyi hiyongereyeho uruganda rw’ibigori”.

Guverineri akomeza avuga ko hari inganda zimwe na zimwe nk’urwo mu Karere ka Gisagara rwatunganyaga inyama rwari rwarahagaze Gisagara Meat Processing -GMP Ltd, hasobanuwe impamvu n’aho zigeze zongera kubyutsa imirimo yazo.

Ati: “Ku bijyanye n’uruganda rutunganya inyama mu Karere ka Gisagara rwari rwarahagaze ariko imashini ziri mu nzira, kandi nyirarwo ni na we ufite urw’ibishyimbo rwa Huye, yadusobanuriye ko inganda zombi zitatangirira rimwe”. 

Yavuze kandi ko yishimira uko ibijyanye n’inganda bihagaze mu Ntara y’Amajyepfo.

Ati: “Twishimira ko ibyanya by’inganda bya Huye na Muhanga  byakomeje gukorerwamo imirimo yo kubitunganya. Kwimura abaturage mu icyanya cya Muhanga irakomeje abari babangamiwe n’inganda  bakaba bimurwa ni igikorwa kigikomeza, ariko hakomeje kongerwamo ibikorwa remezo bijyanye n’imihanda ndetse n’amazi”.

Yongeraho ati: “Huye twishimira by’umwihariko uruganda rw’ibishyimbo CONAFO rwari rumaze igihe rudakora ubu rukaba rwarongeye, bikaba byaranasubiye ku isoko kandi biri ku biciro bitagoyeabaturage bashobora kwigondera”.

Ku bijyanye n’uruganda rwo mu Karere ka Nyanza rwo gutunganya ibikorwa mu ibumba (ceramique / ceramic), Umuyobozi w’Akarere ka Nyanza Ntazinda Erasme yasobanuye ko hari byinshi bakinoza.

Yagize ati: “Uruganda rwa ceramique ruri mu maboko y’abikorera, impavu rwari rwarahagaze ni uko hari byinshi bari bakinoza, ibikoresho ngo uruganda rube ruri ku rwego bifuza”.

Guverineri w’Intara y’Amajyepfo Kayitesi Alice yabigarutseho mu kiganiro yagiranye n’abanyamakuru, avuga ko izashoboye gucumbukura imirimo kimwe n’izahanzwe bushyashya zizaha abaturage akazi bakabasha kwiteza imbere.

Izo nganda zitanga imirimo ku baturage nko mu ruganda rwa sima ruherutse gutahwa rwuzuye  mu cyanya cy’inganda i Muhanga rufite abakozi 205 barimo Abanyarwanda 185, hitezwe ko bazaba bageze kuri 250 bitarenze mu mpera z’uyu mwaka wa 2023.

Ikigo cy’Ibarurishamibare mu Rwanda giherutse kugaragaza ko umusaruro w’inganda wavuye ku 9.1% mu  2022 ugera ku 10.3% mu gihembwe cya kabiri cya 2023, ibitunganyirizwa mu nganda bizamukaho 23.3%.

Yanditswe na NYIRANEZA JUDITH

  • Imvaho Nshya
  • Kanama 11, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE