Urukundo Mbonyi yeretswe rwatumye haba impinduka mu gitaramo afite mu Bubiligi

  • MUTETERAZINA SHIFAH
  • Mata 23, 2024
  • Hashize ibyumweru 4
Image

Umuhanzi umenyerewe mu ndirimbo zo kuramya no guhimbaza Imana, Israel Mbonyi yatangaje ko urukundo yeretswe n’abafana be rwatumye haba impinduka mu gitaramo ateganya gukorera i Buruseli (Brussel) mu Bubiligi.

Uyu muhanzi ukunzwe n’abatari bake yifashishije imbuga nkoranyambaga ze, avuga ko kubera urukundo ababa n’abatuye mu Bubiligi bamweretse, byatumye asaba abarimo kumufasha kugitegura guhindura Salle, bagashaka inini kurushaho, kugira ngo bifashe abazitabira kwisanzura.

Yagize ati: “Kubera ukuntu mwatweretse urukundo, twahisemo guhindura Salle dufata ahantu hanini cyane kandi heza hazatuma dutarama twisanzuye. Amatike nayo twayongereye kugira ngo hatazagira abongera kubura uko binjira nkuko byagenze ubushize, ubu wareba aderese (Address) nshya yaho tuzataramira.”

Akimara kwandika ubu butumwa abenshi mu bamukurikira bamusabye gutangira gutekereza ku buryo yazajya gutaramira mu bihugu baherereyemo, birimo abari muri Kenya, Tanzania, u Bwongereza n’ahandi, mu gihe abaherereye i Buruseli bo bishimiye ayo makuru.

Kayitesi charlotte yagize ati: “Ubushyuhe bwaratwishe, ubu nizere ko tuzabyinira Imana ivumbi rigatumuka.”

Uwitwa Ni nziza kuri Instagram yungamo ati “Wooow,Woow, Imana ihabwe icyubahiro cyane yabahaye ahagutse, ubushize wabonaga yuko abantu bishimye ariko babyigana, umuntu atabona n’aho abyinira, oooh my God hazashya, Imana iguhe umugisha muntu w’Imana.”

Biteganyijwe ko icyo gitaramo kizaba tariki 8 Nyakanga 2024, muri Salle yitwa Boulevard Lambermont 1, 1000 Bruxelles (Docks)

Ni igitaramo cyateguwe na sosiyete isanzwe itegura ibitaramo ikanatumira abahanzi, yitwa Team Production ihagarariwe na Karenzi Justin.

Umuramyi Israel Mbonyi yaherukaga gutaramira mu Bubiligi tariki 11 Kamena umwaka ushize, Icyo gihe amatike yari yashyizwe ku isoko yashize igitaramo kitaratangira, ibintu byatangaje Justin Karenzi akavuga ko mu gihe amaze ategura ibitaramo ari bwo byari bimubayeho.

  • MUTETERAZINA SHIFAH
  • Mata 23, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE