MINALOC yagaragaje ishyirwa mu bikorwa ry’umwanzuro wa Serivisi z’Irembo

  • KAYITARE JEAN PAUL
  • Mutarama 22, 2024
  • Hashize amezi 4
Image

Umwanzuro wa 5 mu myanzuro yafatiwe mu Nama y’Igihugu y’Umushyikirano ku nshuro ya 18 yateranye ku wa 27-28 Gashyantare 2023, ni ukurushaho kunoza serivisi zitangwa n’Irembo no kongeramo izikenerwa zose.

Minisiteri y’Ubutegetsi bw’Igihugu, MINALOC, yatangaje ko serivisi 800 zihabwa abaturage, zashyizwe ku rubuga rw’Irembo.

Serivisi zitangwa n’Inzego z’ibanze zashyizwe ku Irembo bituma horoshywa ibyangombwa bisabwa n’abaturage ndetse bimwe bitangirwa ubuntu.

Mu kiganiro Minisitiri w’Ubutegetsi bw’Igihugu Musabyimana Jean Claude yahaye RBA, yagize ati “Mu minsi ishize ibyishyurwaga amafaranga ubungubu byagabanyirijwe amafaranga ndetse hanoroshywa n’uburyo bwo kubigeraho”.

Akomeza agira ati “Aho twavuga ko uwo mwanzuro washyizwe mu bikorwa. Ni ibibazo abaturage bagaragaje ubushize bavugaga uburyo bwo gushyiraho imigereka (Attachments) uburyo ijyaho ndetse n’ibindi mu ikoranabuhanga, byarorohejwe ku buryo kubigeraho byoroshye”.

MINALOC yavuze ko ikibazo cy’ihuzanzira (Network) cyagaragajwe cyashakiwe igisubizo.

Iminara yarongerewe n’ubu ngo hari indi irimo kongerwa binyuze mu bigo bishinzwe ikoranabuhanga bifatanya na Minisiteri ya Inovasiyo n’ikoranabuhanga.

Minisitiri Musabyimana yasobanuye ko uyu mwanzuro uzakomeza kubera ko hari ibintu bidakorerwa rimwe ngo birangire. Ati “Ikoranabuhanga rihora rihinduka ku buryo yaba serivisi z’Irembo n’ibijyanye nabyo bizakomeza kugenda binozwa ariko ibyagaragaraga umwaka ushize ubungubu byose byarakemutse”.

Gahunda zo gufasha abaturage kwivana mu bukene

MINALOC yatangaje ko gahunda zo gufasha abaturage kwivana mu bukene zizakomeza.

Minisitiri Musabyimana yavuze ko hari VUP ifasha abaturage batishoboye kwivana mu bukene bihereye mu kubiganiraho kugira ngo umuntu uri mu bukene yumve ko mbere na mbere ko agomba gufata icyemezo cyo kwivana mu bukene.

Abafatanyabikorwa b’abaturage bafatanya n’imiryango iri mu bukene bityo buri wese akagira icyo azana kugira ngo bafashe guherekeza imiryango kwikura mu bukene.

Kurwanya ubukene bihera mu gufata icyemezo cyo kubuvamo noneho ubufasha bwose bushoboka bukaza buje gufasha umuturage kubuvamo.

Ati “Ibyo ni byo turimo gukora dufatanyije n’izindi nzego za Leta, abikorera, amadini n’amatorero kugira ngo duherekeze iyo miryango gukora urwo rugendo.

Dufite imiryango igera hafi ku 400,000 turimo kujyana nayo mu kuyifasha kwivana mu bukene”.

Muri gahunda zijyanye n’igwingira hashyizweho gahunda y’imyaka ibiri ihuriweho n’inzego zose bireba.

Minisiteri y’Ubutegetsi bw’Igihugu ivuga ko gahunda yo kurwanya igwingira ari gahunda y’imyaka ibiri kandi itangiye gutanga umusaruro.

Hari uburyo bwabonetse bufasha imiryango itishoboye kunoza imirire, igahabwa inyunganizi y’abagore batwite ndetse n’abana bo mu miryango ikennye.

Ni mu gihe kandi hari indi gahunda yatangijwe na Minisiteri y’Ubuzima aho hatangwa inyunganiramirire izajya ihabwa umugore utwite irimo intungamubiri zose zishobora kumufasha kugira ngo hirindwe kuba havuka umwana ugwingiye.

Uko abaturage bazakurikira inama y’umushyikirano

MINALOC yavuze uburyo Abanyarwanda bazakurikira inama y’Umushyikirano igiye kuba ku nshuro ya 19.

Yavuze ko Umushyikirano uzakurikirwa mu buryo busanzwe.

Hari site zashyizweho muri buri Ntara aho abaturage bahagarariye abandi bazakurikiranira Umushyikirano.

Bazawukurikiranira kuri Televiziyo Rwanda, kuri radiyo no ku mbuga nkoranyambaga ku buryo ngo buri muturage wese afite ubushobozi bwo gukurikirana umushyikirano ndetse n’abatuye mu mahanga.

Inama y’Umushyikirano iratangira kuri uyu wa Kabiri ukazarangira ku wa Gatatu tariki 24 Mutarama 2024.

  • KAYITARE JEAN PAUL
  • Mutarama 22, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE