Umushoferi wa mbere wambukiye i Gatuna yavuze ibigwi ubuyobozi bw’u Rwanda

Baca umugani mu Kinyarwanda ngo ‘Ribara uwariraye’. Ntibyoroshye kumva ibyishimo by’umushoferi w’Umugande utwara imodoka nini ava i Kampala muri Uganda yerekeza muri Repubulika Iharanira Demokarasi ya Congo.

Ndugwe Fabrison ni we mushoferi wa mbere unyuze ku Mupaka wa Gatuna nyuma yaho Leta y’u Rwanda ifashe icyemezo cyo gufunga Umupaka uruhuza na Uganda.

Saa kumi n’imwe n’iminota icumi (5h10) ni bwo Ndugwe yari ageze i Gatuna avuye Kamanyora muri Kivu y’Amajyepfo.

Urugendo rurerure amaze imyaka itatu akora, ava mu Mujyi wa Kampala agakoresha umupaka wa Kagitumba, avuga ko rutari rworoshye.

Aha niho ahera ashimira ubuyobozi bw’igihugu cy’u Rwada bwafashe umwanzuro wo gufungura umupaka wa Gatuna.

Ati: “Ndashimira ubuyobozi bw’u Rwanda bwafunguye umupaka. Ndanashimira kandi ubuyobozi bw’ibihugu byombi bwakomeje kuganira hagamijwe gushaka igisubizo kirambye k’ibibazo bya politiki”.

Akomeza avuga ko yakoraga urugendo rurerure none ubu akaba yorohewe n’urugendo.

Inkuru y’ifungura ry’Umupaka wa Gatuna, Ndugwe avuga ko yayumvise mu makuru ari mu rugendo, bituma yiyemeza kunyura ku mupaka wa Gatuna.

Avuga ko anyuze kuri uyu mupaka avuye ahitwa Kamanyora muri Kivu y’Amajyepfo yerekeza i Kampala.

Amakuru Imvaho Nshya yamenye nuko imodoka itwara abagenzi ya ‘Trinity’, iza guhaguruka muri Gare ya Nyabugogo saa tatu yerekeza i Kampala muri Uganda.

Kugeza saa kumi n’ebyiri n’iminota 20 nta modoka iva mu gihugu cya Uganda yari yakambuka yinjira mu Rwanda.