Umunyarwenya Dudu yakabije inzozi zo kwamamara

  • MUTETERAZINA SHIFAH
  • Gashyantare 12, 2024
  • Hashize ibyumweru 3
Image

Mugabo Alan uzwi ku izina rya Dudu, Umuyayi n’utundi tuzina ahimbwa bitewe n’akazi akora ko gutera urwenya, avuga ko yakabije inzozi yahoranaga zo kwamamara, nubwo yamenyekaniye mu byo atatekerezaga.

Mu kiganiro yagiranye na Imvaho Nshya, Dudu yahishuye ko atigeze amenya ko afite impano yo gusetsa, uretse ko yakundaga kwisanga abara inkuru nyinshi ku inshuri, agatungurwa no kubona bagenzi be bishimye ndetse bifuza ko akomeza.

Ati: “Ntabwo nigeze menya ko mfite impano yo gusetsa, gusa mu rugo nabaga nabasekeje, ku ishuri nakundaga kugira ibiganiro byinshi wasangaga mvuga na filime, hakaba igihe mbabwira ngo dusubike tuzasubukura ejo, ku buryo umunsi wageraga bansaba gukomereza aho twari tugeze ubwo nkakomeza.”

Agaruka ku gihe yamenyeye ko yifitemo impano yo gusetsa, Dudu avuga ko ahantu babaga yakundaga kubwira abaturanyi inkuru kugeza ubwo bamubwiye ko hari aho yavugira ibyo ababwira.

Ati: “Ahantu twabaga nakundaga kubabwira inkuru, nuko umusore umwe twari duturanye agera aho arandambirwa arambwira ngo ariko izo nkuru utubwira wagiye ujya kuzivugira aho abandi bazivugira? Anyereka GEN-Z Comedy, mbonye ibyo bavuga numva nanjye nabikora ntangira kwandika inzenya gutyo.”

Dudu avuga ko yakuze umubyeyi we (nyina) amubwira ko yari afite inzozi zo kuba umushoramari, ariko amaze kumenya ubwenge yahinduye akumva azaba icyamamare.

Ati: “Nari mfite inzozi zo kwamamara, numvaga nzamenyekana, kubera gukina basketball, biranga, nkumva nzamenyekana kubera gusobanura filime, na byo ntibyaba, numva nzamenyekana kubera kuzisobanura, na byo biranga, ariko uyu mwaka inzozi nagezeho ni ukumenyekana nubwo namenyekaniye mu byo ntakekaga.”

Dudu ukunzwe n’abatari bake mu bitabira iseka rusange rikorwa n’abanyarwenya b’ikiragano gishya (GEN- Z Comedy), avuga ko uretse gusetsa, afite izindi mpano kandi akora neza, harimo gushushanya.

Ati: “Njye buriya ikintu nakoze cyose ngikora neza, mbere yo kujya mu rwenya nagerageje izindi mpano mfite, narashushanyaga, nkanasobanura filime, nakinnye na Basketball, yo nayitangiriye mu mashuri abanza kandi numvaga nzayikina kugeza menyekanye, ariko namenyekaniye mu rwenya ibintu ntari niteze.”

Impano yo gusetsa ngo Dudu ayikomora ku muryango we, kuko n’ababyeyi be bombi basetsa.

Dudu avuga ko imbogamizi yahuye na zo mu mwuga akora w’abanyarwenya babigize umwuga, ari ukugira ngo ashobore kujya agaragara mu mubare w’abakorera muri GEN-Z Comedy.

Ati: “Nkihagera byari bigoye kumenya uko bikorwa, aho wamenera, kugira ngo mu banyarwenya bakomeye nanjye ngaragare, byarangoye kugira ngo nanjye nigaragaze, gusa nyine nta mbogamizi zikomeye nahuye na zo kuko nagezemo nsangamo abahungu turahuza, banyereka uko bikorwa, kuko mu banyarwenya barenga 100 kuba wamenyekana nka Dudu biba bitoroshye.”

Dudu nk’umuntu ukunda gusenga kandi ukiri muto, asanga abakiri bato bakwiye gukora buri kimwe, kugira ngo batere imbere, bakigirira icyizere, kandi bakiyaturiraho ibyiza.

Yatangiye kugeragereza mu gukina basketball ntibyamuhira nk’uko mu rwenya birimo kumuhira
  • MUTETERAZINA SHIFAH
  • Gashyantare 12, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE