Umukozi wo mu rugo yanyuzwe n’ubumuntu bwa Perezida Kagame amuhimbira indirimbo

Wumvise amagambo, injyana ibereye amatwi bigize indirimbo yahimbiye Perezida wa Repubulika y’u Rwanda Paul Kagame, ushobora gutekereza ko uwayihanze yaba yarahawe ikiraka cyo kuyikora, ni iy’umukobwa ukora akazi ko mu rugo wakozwe ku mutima n’ubumuntu bw’uwo muyobozi  bimutera gukora mu nganzo.

Uwo ni Nyiransabimana Vestine uvuka mu Murenge wa Rugabano mu Karere ka Karongi, akaba akora akazi ko mu rugo mu Mujyi wa Kigali, washyize hanze indirimbo yise ‘Ugirubumuntu’ yahanze yibanda ku  bikorwa by’ubumuntu bya Perezida Kagame,  bigaragarira mu byemezo afata, uko yita ku batagira kivurira n’ibindi.

Igika  cya mbere gitangira kigira kiti: “Ndebye ibikorwa byawe ndatangara, ndebye uburyo wita ku baturage ubaha Girinka, ndebye ubumuntu bwawe nkora mu nganzo…”

Mu kiganiro cyihariye yagiranye n’Imvaho nshya, Nyiransabimana yashimangiye ko ibikorwa bya Perezida Kagame ari byo byamukoze ku marangamutima bikamutera guhimba indirimbo.

Ati: “Niteregeje uburyo Umukuru w’Igihugu yita ku Banyarwanda abaciye bugufi n’abakomeye abikoranye impuhwe nyinshi, bintera kuyandika ngo mugaragarize ko tubizi kandi bitunyura.”

Yongeraho ati: “Ubutumwa buri muri iyi ndirimbo, kwari ukugaragariza Abanyarwanda umutima wa kimuntu ufitwe n’Umukuru w’Igihugu, ubutumwa bw’iyi ndirimbo bugenewe abantu bose muri rusange, ariko by’umwihariko Abanyarwanda bose.”

Agaruka ku ruhare rw’imiyoborere myiza ya Perezida Kagame, Nyiransabimana avuga iyo miyoborere ari kimwe mu bimutera imbaraga zo gukora cyane aharanira kwiteza imbere.

Ati: “Atuyobora neza birumvikana, kuba Igihugu gifite umutekano ukagenda mu nzira nta muntu waguhohotera, mbese ufite umudendezo wose, ni ibintu binezeza bimfasha bikantera imbaraga mu gutegura ejo hanjye hazaza.”

Ngo uretse iyi ndirimbo Nyiransabimana ashyize ahagaragara, afite n’izindi nubwo ngo iyi ari yo yari yarafashe mu mutwe mu gihe izindi yaziburiye kuri telefoni ye kandi nta hantu yari yarazanditse.

Ati: ”Nari mfite indirimbo nyinshi ariko amajwi yayo nyafatisha telefone (recording), telefone iza kugira ikibazo ndazibura, kuko nta n’imwe nari naranditse ahantu, ariko nsigarana ijwi ry’indirimbo Ugirubumuntu, kuko nakundaga kuyisubiramo kenshi gashoboka. Nbonye nyisigaranye mu mutwe nyijyana muri situdiyo, kuko agira ubumuntu bunkora ku mutima.”

Avuga ko gukora iyo ndirimbo byamusabye gukora akazi ke neza yizigamira kugeza ubwo abasha gutinyuka yegera abatunganya amajwi baramufasha.

Yabanje kujya ahantu gucurangisha injyana, abivuyemo ahita ajya muri sitidiyo, abamufashije baramugabanyirije nyuma yo gutungurwa n’uburyo yitinyutse agakora ibyo benshi badatekereza.

Avuga ko mu gihe uwamutunganyirije amajwi yashoboraga kumwishyura ibihumbi ijana, yamwemereye kumukorera ku mafaranga y’u Rwanda ibihumbi 40. Gusa avuga ko kugeza ubu nta bushobozi yabona bwo kuba yayishyira mu mashusho.

Kimwe mu byo Nyiransabimana yifuza, ni uko Perezida Kagame yakomeza kuyobora Igihugu ngo kuko igihe cyose Igihugu cyimufite gifite Impano ihebuje.

Ati: ”Akomeje kuyobora byanezeza cyane, kubera ko Igihugu cyarushaho gutera imbere, ariko adakomeje kuyobora byambabaza cyane, kubera ko twaba duhombye umuntu w’ingenzi.”

Nyiransabimana avuga ko kuririmba akumva ibihangano bye byagera ku Banyarwanda bose ngo abiterwa ahanini no kwitinyuka avoma kuri Politiki nziza y’u Rwanda yahaye abagore n’abakobwa ijambo, umusanzu wabo mu kubaka igihugu ukaba ugaragara mu mpande zose.