Uko umuhanzi w’injyana gakondo afata  Umunsi w’Intwari z’Igihugu 

  • MUTETERAZINA SHIFAH
  • Gashyantare 1, 2024
  • Hashize amezi 4
Image

Umunsi w’Intwari ni umunsi ngarukamwaka wizihizwa mu Rwanda buri ku wa 01 Gashyantare, ahaba hizizwa ibikorwa bitandukanye by’Intwari z’Igihugu, muri uyu mwaka ukaba wizihijwe ku nshuro ya 30.

Umwe mu bahanzi bakora injyana ya gakondo Daniel Ngarukiye, avuga ko Umunsi w’Intwari kuri we usobanuye umukoro, kubera ko umuhanzi ari umuntu igihe cyose uba uri mu mwanya mwiza kubera ijwi rye ryumvikana rikanagera ku bantu benshi.

Daniel Ngarukiye ni umuhanzi umaze igihe akora injyana gakondo, kuri ubu akaba atuye mu gihugu cy’u Bufaransa ari na ho akorera ibihangano bye. 

Mu kiganiro cyihariye yagiranye n’Imvaho Nshya, yayitangarije ko umunsi w’Intwari wongera kumwibutsa ko ubutumwa buba mu njyana zabo hari icyo bugomba kubasigira.

Yagize ati: “Umunsi w’Intwari nk’umuhanzi gakondo bisobanuye umukoro, kuko buriya umuhanzi ni umuntu uba uri mu mwanya mwiza, aho ijwi rye ryumvikana cyane rikagera ku bantu benshi icyarimwe. 

Kubera icyo kintu umunsi w’Intwari wongera kwibutsa ko mu buhanzi bwawe, ubutumwa bwawe buba burimo iyo bugiye bukagera ku bantu bubasigira iki? Barabyumva bigacaho gusa, cyangwa haba harimo n’ubutumwa bw’ingenzi?”

Akomeza agira ati: “Buriya igikorwa cy’ubutwari ni ntagereranywa, ntabwo gipfa kugerwaho n’ubonetse wese. Ni wa wundi ufite indangagaciro yo gukotana, idangagaciro y’ub’umuntu, ni yo mpamvu nanjye Umunsi w’Intwari unyibutsa ngo mu bihangano byanjye ubutumwa ntanga ni ubuhe? 

Iyo ugeze wongera gutuma umutima unkomanga, ngo niba mu buhanzi bwanjye ndi ku murongo mwiza nkomereze aho, kandi niba hari icyo gukosora ngikosore, kugira ngo ubutumwa bukomeze bugirire abantu bose akamaro.” 

Kuri Ngarukiye asanga umusanzu w’umuziki gakondo mu gusigasira ubutwari bw’Abanyarwanda ari ntagereranywa, kubera ko umuziki gakondo ubaye utariho, nta n’inkomoko yaba iriho.

Ati: “Kubera ko umuziki gakondo ari yo nkomoko, ufite umusanzu utanga, kuko indangagaciro zose z’Igihugu akenshi uzisanga muri wa muziki gakondo, ni yo mpamvu umuziki gakondo ku butwari bivuze ikintu gikomeye cyane, kuko n’ingabo iri ku rugamba, ikumva umuziki gakondo, umuziki waho ituruka yongera kumva yiremyemo imbaraga, nubwo yaba igeze ahantu hagoranye cyane.”

Kuba umuziki gakondo uba ubumbatiye amateka n’indangagaciro, bituma abakora iyo njyana badapfa kuririmba ibyo babonye byose nkuko Ngarukiye ukora iyo njyana abisobanura.

Ati: “Abahanzi turirimba injyana gakondo ntabwo dupfa kuririmba ibyo tubonye byose, turi abantu duhimba dukurikije indangagaciro z’umuco w’Igihugu, umuco w’u Rwanda. Ni yo mpamvu iyo ufashe umuziki gakondo usanga ufatiye runini icyo twese twita ubutwari.”

Abahanzi barasabwa gukomeza guhanga ibihangano bifite indangagaciro kugira ngo ibihangano byabo bizabe ari byo byivugira, bikazabafasha gutera ikirenge mu cy’Intwari. 

Hashingiwe ku byo itegeko No 13 bis/2009 riteganya, Intwari irangwa no kugira umutima ukomeye kandi ukeye udatinya, akarangwa no gushyigikira icyiza, akagaragaza ikibi kandi agahangara kukirwanya, azi neza ingaruka.

Intwari irangwa no gukunda Igihugu, gushyira imbere no guharanira ubusugire, iterambere n’ishema by’Igihugu n’ubumwe bw’abagituye.

Intwari kandi ni umuntu urangwa no kwitanga cyangwa kwigomwa inyungu ze bwite aharanira inyungu rusange, byaba ngombwa agahara ubuzima.

  • MUTETERAZINA SHIFAH
  • Gashyantare 1, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE