Uko u Rwanda rushyize imbere amashyamba mu guhangana n’imihindagurikire y’ikirere 

  • NTAWITONDA JEAN CLAUDE
  • Gicurasi 6, 2022
  • Hashize imyaka 2
Image

Amashyamba yo mu Rwanda abarirwa ku buso bwa hegitari 724,695 zingana na 30.4% by’ubuso bwose bw’Igihugu nk’uko bitangazwa muri raporo ya vuba igaragaza ubutaka buriho amashyamba (Rwanda Forest Cover Mapping Report/2019). 

Muri ayo mashyamba 53% ni ayatewe, 21 ni aya cyimeza ari mu mukenke, 19% ni amashyamba ya cyimeza yo mu misozi ibonekamo imvura nyinshi   mu gihe 6.2% ari ibihuru. 

Kongera ubuso buteyeho amashyamba biri mu bikorwa n’imishinga by’u Rwanda bigamije kongera ubushobozi bwo guhangana n’imihindagurikire y’ikirere, kubyaza ubukerarugendo amadovize menshi, kongera umusaruro ukomoka ku bimera no kuzamura imibereho y’Abanyarwanda muri rusange.

Buri mwaka Abanyarwanda batera amamiliyoni y’ibiti muri gahunda ngarukamwaka bafite intego imwe yo kubungabunga amashyamba no kongera umusaruro. Gahunda y’Igihugu y’Ubukungu Butangiza Ibidukikije yatangijwe mu mwaka wa 2011 nk’uburyo burambye buyobora Igihugu ku kubaka iterambere rizira guhumanya ikirere bitarenze mu mwaka wa 2050.

Ni gahunda yimakaza agaciro k’amashyamba kandi ikubiyemo ingamba 14 zirimo no gutera ibiti no kubungabunga amashyamba mu buryo burambye hagamijwe guharanira ko amashyamba ya Leta n’ay’abantu ku giti cyabo acungwa mu buryo bwiza kandi burambye.

Bimwe mu byagezweho muri Gahunda y’Igihugu y’Ubukungu Butangiza Ibidukikije, by’umwihariko mu mushinga urambye wo gutera ibiti no kubungabunga amashyamba ni ibi bikurikira:

1. Ubuso buriho amashyamba mu Rwanda bwageze kuri 30.4%

Binyuze mu cyerekezo cy’Igihugu na politiki yo kureba kure heza, u Rwanda rwabaye kimwe mu bihugu byatangiye hakiri kare gushyira mu bikorwa Intego y’Isi yose yiswe “Bonn Challenge” yo kugarura amashyamba ku butaka yahozeho kugeza kuri hegitari zisaga miliyoni 150 bitarenze mu mwaka wa 2020, na hegitari miliyoni 350 bitarenze mu 2030. 

Mu mwaka wa 2011, ni bwo u Rwanda rwihaye intego yo kugarura amashyamba kuri hegitari miliyoni ebyiri yahozeho akaba yarangijwe bitarenze mu 2020.

Imbaraga u Rwanda rwashyize mu kubungabunga amashyamba ariho, gutera amashyamba mashya, kuvugurura amashyamba mu bice bitandukanye by’Igihugu no guharanira kugera ku ntego za Bonn Challenge ni byo byatumye u Rwanda rugera ku ntego yo kugira 30.4% by’ubuso bw’Igihugu buriho amashyamba. 

Aha ni mu Isanteri ya Huye, ahatunganyirizwa ingemwe z’ibiti

Izo nzego zifite akamaro gakomeye ko gushimangira uruhare rw’u Rwanda mu guhangana n’imihindagurikire y’ikirere. 

Kuri ubu hashyizwe ingufu mu gutera ibiti ahahurira abantu benshi mu mijyi itandukanye y’u Rwanda nk’uko bigaragara mu gishushanyombonera kirimo gukoreshwa ubu aho Icyerekezo 2050 gitegeka ko imijyi yose n’amasanteri agenda atera imbere bikwiye kuba ifite ibyanya byahariwe amashyamba bifatanye n’ubundi butaka bukorerwamo ibikorwa bitandukanye.

Igihugu nanone cyashyizeho ahatunganyirizwa Ingemwe z’Ibiti (Tree Seed Centres) muri pepiniyeri ziherereye mu Karere ka Gatsibo n’Aka Huye, mu rwego rwo kongera ingemwe z’ibiti zuzuje ubuziranenge. 

Aha hatunganyirizwa ingemwe z ibiti hagira uruhare mu micungire y’amashyamba, umusaruro  w’amakara yo gucana, ibiti byifashishwa mu bwubatsi, gukoresha izindi ngufu zitangiza ibidukikije no kubona ingemwe zujuje ubuziranenge by’umwihariko. 

Ni ihuriro kandi ry’ibikorwa bigize uruhererekane rwo gutunganya no gukwirakwiza ingemwe, birimo gukora ubwoko bushya, kunoza ubwoko busanzwe, kubungabunga utunyangingo tw’ibiti, gukusanya ingemwe, kuzirera no kuzikwirakwiza. 

Nanone kandi zizakomeza kubakira ku ntsinzi yo kuvugurura amashyamba y’u Rwanda no gushyigikira imbaraga zashyizwe mu buhinzi bw’amashyamba mu bice bitandukanye mu Gihugu. 

2. Gahunda ngarukamwaka yo gutera ibiti n’Umuganda 

Leta y’u Rwanda yashoye akayabo mu gutera amashyamba mashya no kuyasubiza aho yari asanzwe binyuze muri gahunda ngarukamwaka yo gutera ibiti n’amashyamba. Nko mu gihembwe cy’umwaka wa 2020/2021 Abanyarwanda bateye ibiti miliyoni 25 byagize uruhare mu kuvugurura amashyamba muri gahunda yo guhangana n’imihindagurikire y’ikirere. 

Muri icyo gihembwe, hegitari 7,400 zateweho ibiti bisanzwe, izindi hegitari 900 zihingwaho ibiti mu mashyamba ya cyimeza ndetse haterwa n’ibiti byeraho imbuto 77,000. Hanavuguruwe hegitari 500 z’amashyamba ahingwamo ibiti bicanwamo amakara mu rwego rwo kongera umusaruro. 

Mu gihe cy’Umuganda, abaturage bagira uruhare rukomeye mu gutera ibiti no kuvugurura amashyamba yari yarangijwe

Biteganyijwe ko muri uyu mwaka hazaterwa ibiti bibarirwa muri miliyoni 43. 

Igikorwa ngarukakwezi cy’Umuganda na cyo gihuriza hamwe abaturage mu Nzego z’ibanze bagamije kugera ku musaruro uhuriweho. Umuganda ni gahunda yihariye y’Igihugu yahaye abaturage amahirwe yo kugira uruhare mu gutera ibiti mu rwego rwo kongera ubuso bw’Igihugu buteweho amashyamba no kubungabunga ibidukikije uhereye mu Nzego z’ibanze. 

Hagati y’umwaka wa 2009 n’uwa 2019, ubuso buriho amashyamba bwiyongereyeho 27.7% byose bikaba umusaruro wa gahunda zitandukanye zo gutera amashyamba mashya no kuvugurura ayari yarangijwe. 

3. Kwegurira (gukodesha) abikorera amashyamba yari aya Leta mu kuyacunga neza 

Binyuze muri gahunda y’Igihugu yo kwegurira abikorera ibikorwa bimwe, Leta y’u Rwanda yagiranye ubufatanye n’urwego rw’abikorera mu guharanira imicungire iboneye y’amashyamba ya Leta.  

Minisiteri y’Ibidukikije yatangije ubufatanye bwayo bwa mbere n’abikorera bujyanye no gucunga amashyamba mu mwaka wa 2019, kuyabungabunga no kongera umusaruro atanga. Kugeza ubu Hegitari 23,456.15 zingana na 38.4% by’amashyamba ya Leta zicungwa n’abashoramari bigenga binyuze mu masezerano y’igihe kirekire basinyanye na Leta. 

4. Ihangwa rya Pariki y’Igihugu ya Gishwati-Mukura

U Rwanda ruherutse guhanga Pariki y’Igihugu ya Gishwati-Mukura, imwe muri Pariki nshya muri Afurika, mu rwego rwo kurinda amashyamba kimeza ya kera n’inguge ziyacumbitsemo.Iyo Pariki igizwe n’amashyamba abiri ari yo irinini rya Mukura n’irito rya Gishwati aherereye ku musozi ugabaya icyogogo cy imigezi ya Congo na  Nili, agakurikira urwunge rw’ibibaya by’Albertine (Albertine Rift) bigizwe n’urusobe rw’ibinyabuzima rutandukanye. 

Pariki y’Igihugu ya Gishwati-Mukura yashyizwe ku rutonde rw’ibyanya bikomye mu Murage w’Isi

Kuvugurura ishyamba rya Gishwati-Mukura no kurihindura Pariki byashobotse ku bufatanye na Global Environment Facility/GE na Banki y’Isi, binyuze mu Mushinga wa LAFREC (Landscape Approach to Forest Restoration and Conservation) washyizwe mu bikorwa n’Ikigo cy’Igihugu cyo kubungabunga Ibidukikije (REMA), Urwego rushinzwe Iterambere mu Rwanda (RDB) n’Uturere iyo Pariki iherereyemo. 

Uwo mushinga w’imyaka 5 wubakiye ku mirimo yakozwe na “Forest of Hope Association”, ugera ku ntego yo kuvugurura Gishwati-Mukura binyuze mu kuhindura ahantu nyaburanga mu rwego rwo kurushaho kubungabunga urusobe rw’ibinyabuzima ruhabarizwa no kwegereza imiryango ituriye Pariki inyungu urwo rusobe rutanga. 

Kuri ubu RDB irimo gutegura gahunda iri mu byiciro bitandukanye ijyanye no kubungabunga urwo rusobe rw’ibinyabuzima no guteza imbere ubukerarugendo muri Pariki y’Igihugu ya Gishwati – Mukura. Iyo gahunda ikubiyemo kuyiha abayirinda, gukaza ingamba zo kuyibungabunga, guteza imbere ubushakashatsi, ubufatanye na Koperative ziyakoreramo, gukemura amakimbirane y’abantu n’inyamaswa, kugenzura imiterere y’ibidukikije no guteza imbere ubukerarugendo bugendera ku mategeko. 

Iyi gahunda irimo gutegurwa ku bufatanye n’Inzego z’ibanze ndetse n’Ikigo “Imizi”, Ishami rya   Wilderness Safaris.

5. Kwagura Pariki y’Igihugu y’Ibirunga 

U Rwanda rwatangiye umushinga ukomeye wo kwagura Pariki y’Igihugu y’Ibirunga no guharanira ahazaza heza h’ingagi zo mu misozi zita mu rugo ishyamba ry’Ibirunga. Iyi gahunda y’imbonekarimwe igamije kwagura pariki ku kigero cya 23% ikiyongeraho kilometero kare 37.4, ubunini bwayo bukava kuri kilometero kare 160 bukagera kuri kilometero kare 197.4. 

Biteganyijwe ko izo hegitari zizongerwaho izindi hegitari 6,620 z’icyanya cy’ubuhumekero (buffer zone) gitandukanya Pariki n’ubutaka bw’abaturage.

Pariki y’Igihugu y’Ibirunga ifite urusobe rw’ibinyabuzima rudatekanye kandi buri kuri kilometero kare 160 gusa, ari na yo mpamvu u Rwanda rwiyemeje kuyagura ikongerwaho hafi kimwe cya kane cy’ubunini ifite ubu. 

Pariki yagutse yitezweho guteza imbere imibereho y’ingagi zo mu misozi zitagiraga ubwisanzure buhagije kandi ishyigikire ubwiyongere bwazo ku kigero kiri hagati ya 15% na 20% n’igabanyuka ry’imfu z’abana b’ingagi ku kigero kiri hejuru ya 50%.

Kwagura Pariki y’Igihugu y’Ibirunga byitezweho no guhindura imibereho y’imiryago iyizengurutse kandi bizanatuma gusura ingagi birushaho kuba ubunararibonye buhebuje. 

Byinshi ku bijyanye no kwagura Pariki y’Igihugu y’Ibirunga wabisanga kuri www.visitrwanda.com/gorillas

Gahunda yo kwagura Pariki y’Igihugu y’Ibirunga izagira uruhare rukomeye mu mutekano n’imibereho by’ingagi zinjiriza u Rwanda akayabo k’amadovize
  • NTAWITONDA JEAN CLAUDE
  • Gicurasi 6, 2022
  • Hashize imyaka 2
TANGA IGITEKEREZO
Guaranteed Bed Bugs Removal says:
Gicurasi 24, 2022 at 6:16 am

Hello! This is my first visit to your blog!
We are a team of volunteers and starting a new initiative in a
community in the same niche. Your blog provided us useful information to
work on. You have done an outstanding job.

slot anti rungkat says:
Gicurasi 24, 2022 at 8:13 am

Ahaa, its nice conversation about this paragraph here at this weblog, I have read all that, so now me also commenting here.

SHALOM.NINJA MARKET CC CVV says:
Nyakanga 2, 2022 at 11:16 am

My relatives always say that I am wasting my time here at web, but I know I am getting knowledge
every day by reading such good content.

Andika igitekerezo

AMATEGEKO AGENGA IYANDIKA RY'IGITEKEREZO CYAWE