U Rwanda rugiye kwakira iserukiramuco ryihariye ku bakobwa b’abirabura

  • MUTETERAZINA SHIFAH
  • Gashyantare 16, 2024
  • Hashize amezi 2
Image

Ku nshuro ya mbere mu Rwanda hagiye kubera Iserukiramuco mpuzamahanga ryihariye ku bakobwa b’abiraburakazi (Miss Black Festival), rigamije kugira ngo ribongerere guterwa ishema n’uruhu rwabo, ndetse amahirwe bavutswaga n’uko basa.

Ni iserukiramuco ryateguwe na Imanzi Agency Ltd, isanzwe imenyerewe mu bikorwa bitandukanye by’ubwiza, ku bufatanye na Minisiteri  y’Urubyiruko n’Iterambere  ry’ubuhanzi, rikazatangira tariki 23 Werurwe 2024, aho bazahitamo abakobwa 20 bazahatana.

Umuyobozi wungirije wa Imanzi Agency Ltd Chear Sebudwenge, avuga ko aya marushanwa yateguwe mu rwego rwo kugira ngo yongerere abiraburakazi guterwa ishema n’uruhu rwabo ndetse amahirwe bavutswaga nuko ari abirabura.

Ati: “Iri serukiramuco rije gukemura ibibazo bigera kuri 2 byari bihari, aho hari abakobwa b’abiraburakazi cyangwa bashiki bacu baterwa ipfunwe no kuba bafite uruhu rw’abirabura. Icya kabiri n’uwabashije guterwa ishema n’uko afite uruhu rw’abirabura, hari aho agera agatakaza amahirwe runaka kubera afite uruhu rw’abirabura.”

Yongeraho ati: “Rije kwongerera agaciro no kuzamura ishema ku mwana w’umwiraburakazi, kandi imuhe urubuga agaragaze impinduka yakora.”

Ni iserukiramuco rizaba rigizwe n’ibice bitatu, aho abazaryitabira bagira umwanya wo kwerekana impano bifitemo, hakazabamo amarushanwa aha amahirwe umukobwa yo kugaragaza umwihariko we mu cyo arusha abandi, cyangwa umuco w’Igihugu cye.

Igice kindi ni aho umukobwa azagaragaza umushinga we, ugomba kuba ugaragaza impinduka uzazana mu muryango yaturutsemo.

Imanzi Agency Ltd nubwo iheruka gutegura amarushanwa y’ubwiza ya ba Rudasumbwa akaza gukomwa mu nkokora akanahagarikwa, ubwo mu Rwanda hafatwaga icyemezo cyo guhagarika amarushanwa y’ubwiza yose, ntibacitse intege kuko bateguye iri serukiramuco mpuzamahanga rigamije guha amahirwe abana b’abakobwa b’abiraburakazi aho baherereye ku Isi.

Bahabwa urubuga rwo kugaragarizaho ubushobozi bwabo mu byagirira umumaro umuryango mugari bazaba bakomokamo.

Ubuyobozi bwa Imanzi Agency Ltd buvuga ko umwihariko w’iri serukiramuco ari uko nta mupaka nkuko bisanzwe mu yandi marushanwa, kubera ko umukobwa wese yaba uwabyaye, cyangwa se uwigeze gushaka ariko nyuma agatandukana n’umugabo, bose bemerewe kuryitabira, mu gihe bafite icyemezo cyemeza ko ari ingaragu.

Kimwe mu byo uwifuza kuryitabira asabwa, ni ukuba ari umwirabura, hatitawe ku ho yaba aturuka hose ku Isi, kandi afite imyaka y’amavuko iri hagati ya 18 na 35, kandi afite nibura impamyabumenyi y’amashuri yisumbuye.

Kwiyandikisha biratangira gukorwa hifashishijwe ikoranabuhanga guhera kuri uyu wa Gatanu tariki 16 Gashyantare kugeza 16 Werurwe 2024.

Iri serukiramuco rigizwe n’ibyiciro bitatu, aho icyiciro cya mbere kizatangira kuva tariki 23 Werurwe 2024, kikazatoranyirizwamo abakobwa 20 bazahiga abandi mu bazaba biyandikishije.

Icya kabiri kizatangira tariki 20 Mata 2024, aho mu bakobwa 20 bazaba batoranyijwe, hazavamo 10, hagakomeza abandi mu cyiciro cya nyuma.

Tariki 25 Gicurasi ni bwo mu bakobwa icumi hazatoranywamo batatu bazahembwa, barimo igisonga cya mbere n’icya kabiri bazahembwa ibihumbi bitanu by’amadolari y’Amerika, mu gihe uzegukana irushanwa azahembwa ibihumbi 15 by’amadolari y’Amerika.

Imanzi Agency Ltd isanzwe imenyerewe mu bijyanye no gutegura amarushanwa y’ubwiza, kuko iryo baheruka gutegura ryari irya ba Rudasumbwa mu Rwanda ryahagaritswe rigeze mu cyiciro cya nyuma.

  • MUTETERAZINA SHIFAH
  • Gashyantare 16, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE