U Rwanda n’u Bushinwa byinjiye mu bufatanye mu muco, uburezi n’ubukungu

Ibigo bibiri by’u Rwanda n’u Bushinwa byasinyanye amasezerano abiri y’ubufatanye, agamije kurushaho guteza imbere umubano mu bijyanye n’umurage ndangamuco, uburezi bw’imyuga n’ubumenyingiro ndetse n’iterambere ry’ubukungu.

Ni amasezerano yasinywe ku Cyumweru, tariki ya 25 Ukwakira 2026, mu ruzinduko Umunyamabanga Mukuru w’Umuryango FPR-Inkotanyi, Christophe Bazivamo, yagiriye mu Bushinwa, mu Mujyi wa Changsha, umurwa mukuru w’Intara ya Hunan.

Amasezerano ya mbere yasinywe hagati y’Inzu Ndangamurage ya Changsha mu Bushinwa n’Inteko y’Umuco y’u Rwanda (RCHA), aho uru rwego rwari ruhagarariwe n’Intebe y’Inteko, Ambasaderi Robert Masozera.

Amasezerano ya kabiri yasinywe hagati y’Ishuri rya Tekeniki ry’u Rwanda (RP) n’Ikigo cy’imyuga n’Ubumenyi ngiro cya Changsha Vocational and Technical College. RP yari ihagarariwe n’Umuyabozi Mukuru wacyo, Mucyo Sylvie.

Muri urwo ruzinduko, Amb Bazivamo yanagiranye ibiganiro n’abayobozi b’Intara ya Hunan byibanze ku buryo bwo kwagura ubufatanye hagati y’Umujyi wa Changsha na Kigali, ndetse n’uburi hagati y’agace ka Loudi mu Bushinwa n’Akarere ka Muhanga.

Ubu bufatanye buteganyijwe hagati y’iyo mijyi yombi buzibanda ku bucuruzi, ishoramari, ubuhinzi, ikoranabuhanga n’uburezi, hamwe n’izindi nzego.

Amb Bazivamo yatangiye urwo ruzinduko rwe ku wa Kane, tariki ya 22 Ukwakira 2026, agirana ibiganiro na Liu Haixing, Minisitiri ushinzwe ishami ry’imibanire mpuzamahanga muri Komite Nkuru y’Ishyaka rya Gikomunisiti ry’u Bushinwa (CPC).

Ibyo biganiro byibanze ku gushimangira umubano hagati y’amashyaka yombi ayoboye ibihugu byayo, harimo ubufatanye mu mahugurwa y’abayobozi  b’ishyaka, ubushakashatsi no kubungabunga umurage ndangamuco.

Yanasuye Ishuri ry’Ishyaka rya Gikomunisiti ry’u Bushinwa rikorera muri Komite Nkuru yaryo, agirana ibiganiro na Visi Perezida waryo ku bufatanye mu mahugurwa, ubushakashatsi n’iterambere.