U Rwanda na Namibia byasinyanye amasezerano y’ubutwererane

  • NTAWITONDA JEAN CLAUDE
  • Gashyantare 16, 2024
  • Hashize amezi 2
Image

U Rwanda na Namibia byasinyanye amasezerano rusange y’ubutwererane yitezweho kwihutisha ubufatanye mu bucuruzi, ubukungu no gusangizanya ubumenyi hagati y’ibihugu byombi.

Minisitiri w’Ububanyi n’Amahanga n’Ubutwererane Dr Vincent Biruta na Minisitiri w’Ububanyi n’Amahanga wa Namibia Jenelly Matundu, ni bo bashyize umukono kuri aya masezerano aho bahuriye i Addis Ababa mu Nama y’Umuryango w’Afurika Yunze Ubumwe (AU).

Umubano w’u Rwanda na Namibia mu bya dipolomasi watangiye mu mwaka wa 1990, ariko ukomeje gutera imbere mu nzego zitandukanye nyuma y’imyaka isaga 30 u Rwanda rumaze mu rugendo rwo kwiyubaka nyuma ya Jenoside yakorewe Abatutsi mu 1994.

Mu mwaka wa 2022, intumwa ya Libya mu Rwanda Lebbius Tangeni Tobias yasuye Minisiteri y’Ibikorwa Remezo (MININFRA) igirana ibiganiro n’abayobozi b’iyo Minisiteri, byo kurushaho kwimakaza ubutwererane mu bijyanye n’ubwikorezi bukorerwa ku butaka no mu kirere.  

Icyo gihe u Rwanda na Namibia byasinyanye ajyanye na agunda zo guhererekanya ubumenyi hagati y’Ikigo cy’Igihugu gishinzwe Iterambere rya Taransiporo (RTDA) ndetse n’Ikigo cya Namibia gishinzwe Imihanda (NRA).

Ayo masezerano yafashije impuguke za RTDA guha amahugurwa  anyuranye abo muri Namibia ku bijyanye n’ikoranabuhanga ryifashishwa mu gukora imihanda no mu kuyibungabunga.

Ibikorwa remezo by’imihanda muri Namibia byaje ku mwanya wa mbere muri Afurika mu myaka ine yikurikiranyije nk’uko byagaragajwe n’Ihuriro Mpuzamahanga ry’Ubukungu (WEF) muri raporo igaruka ku ireme ry’ibikorwa remezo by’imihanda.

Mu mwaka wa 2018, ibihugu byombi nanone byashyize umukono ku masezerano y’ubutwererane mu gusangira ikirere cy’ibihugu byombi (BASA), mu kwimakaza ubucuruzi, n’iterambere ry’ubukerarugendo no kwakira abantu mu Karere.

Abayobozi b’ibihugu byombi bashimangiye inyungu biteze ku gufungurirana ikirere kigakoreshwa na Sosiyete zitanga serivisi zo gutwara abantu n’ibintu mu bihugu byombi, aho RwandAir yafunguriwe amarembo yo kwagura ingendo zayo muri Namibia, na sosiyete y’icyo gihugu bikaba uko.

Nanone kandi ibihugu byombi bikomeje kuryaoherwa n’umusaruro w’ubutwererane mu rwego rw’umutekano, aho Polisi z’ibyo bihugu zasinye amasezerano y’ubufatanye mu kwezi k’Ugushyingo 2015.

Umubano w’ibihugu byombi washimangiwe n’uruzinduko Perezida wa Repubulika y’u Rwnada Paul Kagame yagiriye muri Namibia mu mwaka wa 2019, aho ibihugu byombi byiyemeje kurushaho kwimakaza ubutwererane no kurushaho kongerera abaturage amahirwe y’iterambere ku mpande zombi.

  • NTAWITONDA JEAN CLAUDE
  • Gashyantare 16, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE