Intumwa za Namibia zigiye ku mikoranire y’Inzego z’u Rwanda

  • NTAWITONDA JEAN CLAUDE
  • Werurwe 29, 2023
  • Hashize umwaka 1
Image

Mu gitondo cyo kuri uyu wa Gatatu, Minisitiri w’Intebe Dr. Ngirente Edouard  yakiriye Hon. Lukas Sinimbo Muha, Perezida w’Inama y’Igihugu (Sena) muri Namibia n’itsinda ayoboye, mu ruzinduko bagiriye mu Rwanda guhera mu ntangiriro z’iki cyumweru.

Ibiro bya Minisitiri w’Intebe byatangaje ko Dr. Ngirente n’abagize iryo tsinda  baganiriye ku mikoranire y’Inteko Zishinga Amategeko na Guverinoma mu bihugu byombi.

Abagize iryo tsinda bishimira ko bakuye amasomo menshi ku mikoranire y’Inzego zo mu Rwanda, by’umwihariko uburyo Ibiro bya Minisitiri w’Intebe bikorana bya hafi n’Inteko Ishinga Amategeko.

Kwakirwa na Minisitiri w’Intebe bibaye nyuma y’aho izo ntumwa zasuye Inteko Ishinga Amategeko y’u Rwanda, aho baganiriye n’abagize imitwe yombi bakanabyaza umusaruro amahirwe yo kwigira ku mikorere n’imikoranire y’iyo mitwe yombi.

Wabaye n’umwanya wo kurema amahirwe mashya ku Nteko Zishinga Amategeko z’ibihugu byombi, yo kurushaho gusangira ubunararibonye.

Hon. Lukas Sinimbo Muha yemeje ko hari byinshi bungutse nk’isomo bakuye mu Biro bya Minisitiri w’Intebe no mu Nteko Ishinga Amategeko y’u Rwanda. 

Minisitiri w’Intebe Dr. Ngirente Edouard aganira n’intumwa za Namibia ziri mu Rwanda

Yagize ati: “Twungutse byinshi, by’umwihariko mu birebana no kwibanda ku kubazwa inshingano, ari na byo dusubiranye iwacu. Ku munsi wa gatatu w’uruzinduko rwacu aho twazanywe no kwiga, Ibiro bya Minisitiri w’Intebe ari na byo bihuza ibikorwa byose bya Guverinoma byadufashije guhuza ibyo twabonye, uko hano mu Rwanda ibintu bikorwa maze tukagereranya n’uko bikorwa muri Namibia.”

Ibiganiro ku butwererane n’imikoranire ya Sena y’u Rwanda n’iya Namibia birakomeje ndetse impande zombi zumvikanye ku masezerano ashobora kuzasinywa mu gihe kizaza ubwo ibiganiro byo ku rwego rwo hejuru bizaba bimaze gusozwa. 

Senateri John Bonds Bideri, Umuyobozi wa Komisiyo Ishinzwe Ububanyi n’Amahanga muri Sena y’u Rwanda, yavuze ko uruzinduko rw’iryo tsinda ryaturutse muri Sena ya Namibia ari amahirwe yo kubaka umubano n’ubufatanye mu nzira zitandukanye, cyane cyane hashingiwe ku bubasha bw’Inteko Zishinga Amategeko z’Ibihugu byombi. 

Yakomeje agira ati: “‘Muri Sena, dukora dipolomasi y’Inteko isaba gukorana bya hafi n’ibindi bigo cyangwa Inteko Zishinga Amategeko, dusangira ubunararibonye ku buryo dukora cyangwa bo bakora, ahakeneye kuba twashyigikirana  tukabikora.”

Uretse kwigira ku Nteko Ishinga Amategeko y’u Rwanda, Senateri Bideri yanavuze ko intumwa za Namibia zasobanuriwe izindi gahunda zirimo kwegereza ubuyobozi abaturage, Umwiherero, Inama y’Igihugu y’Umushyikirano n’izindi. 

Bamenyeshejwe ko izo gahunda ziri mu bishobora kongerera imbaraga imiyoborere y’Igihugu cyabo igihe zaba zishyizwe mu bikorwa uko bikwiye. 

Sen. Bideri yavuze ko icy’ingenzi muri ubu bufatanye ari uko nk’ibihugu by’Afurika byifuza kubyaza umusaruro amahirwe y’ubutwererane bw’ibihugu bikiri mu nzira y’amajyambere hagamijwe kunoza Politiki no kuzishyira mu bikorwa. 

  • NTAWITONDA JEAN CLAUDE
  • Werurwe 29, 2023
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE